രാഷ്ട്രപതി ഭവനിൽ ജീർണിച്ച മൃതദേഹം; മരിച്ചത് ഓഫീസ് ജീവനക്കാരൻ, അഞ്ച് ദിവസത്തോളം പഴക്കം!
ദില്ലി: രാഷ്ട്രപതി ഭവൻ വളപ്പിലെ അടച്ചിട്ട മുറിയിൽ അഞ്ച് ദിവസത്തോളം പഴക്കമുള്ള മൃതദേഹം കണ്ടെത്തി. ദുര്ഗന്ധം വമിച്ചതിനെ തുടര്ന്ന് പരിസരവാസികളാണ് പോലീസില് വിവരമറിയിച്ചത്. പോലീസ് എത്തി മുറിയുടെ വാതില് പൊളിച്ച് നടത്തിയ പരിശോധനയിലാണ് അഴുകിത്തുടങ്ങിയ മൃതദേഹം കണ്ടെത്തിയത്.
ജീവനക്കാരുടെ താമസസ്ഥലത്തുള്ള മുറിയില് വ്യാഴാഴ്ച രാത്രിയാണ് മൃതദേഹം കണ്ടെത്തിയത്. രാഷ്ട്രപതിയുടെ ഓഫീസിലെ ജീവനക്കാരനായ ത്രിലോക് ചന്ദാണ് മരിച്ചത്. ത്രിലോക് ചന്ദ് അസുഖ ബാധിതനായിരുന്നതായി സംശയമുണ്ടെന്നാണ് പ്രാഥമിക നിഗമനം. പോസ്റ്റ്മോര്ട്ടത്തിനു ശേഷം മാത്രമേ മരണകാരണം വ്യക്തമാകൂ എന്ന് പോലീസ് വ്യക്തമാക്കി.
ഈ അടുത്തിടെയാണ് ഇദ്ദേഹം ജീവനക്കാർക്കുള്ള സ്ഥലത്ത് താമസം തുടങ്ങിയത്. ഹൃദയാഘാതമാകാം മരണകാരണമെന്നാണ് പ്രാഥമിക നിഗമനം. ഇതൊരു സാധാരണ മരരണമാണെന്നാണ് പ്രാഥമിക അന്വേഷണത്തിൽ തെളിഞ്ഞതെന്ന് ഡെപ്യൂട്ടി കമ്മീഷണർ പറഞ്ഞു.