സ്ത്രീയുടെ നഗ്നഫോട്ടോ പ്രചരിപ്പിക്കുമെന്ന് ഭീഷണിപ്പെടുത്തി പണം തട്ടിയ എംബിഎക്കാരന്‍ അറസ്റ്റില്‍

ഇയാളുടെ ഫോണില്‍ നിന്നും നിരവധി സ്ത്രീകളുടെ മോര്‍ഫ് ചെയ്ത ചിത്രങ്ങളും കണ്ടെത്തി.

ദില്ലി: നഗ്നഫോട്ടോ പോണ്‍ വെബ്‌സൈറ്റുകളിലും, സോഷ്യല്‍ മീഡിയയിലും പ്രചരിപ്പിക്കുമെന്ന് ഭീഷണിപ്പെടുത്തി ഫേസ്ബുക്ക് ഫ്രണ്ടായ സ്ത്രീയില്‍ നിന്നും പത്ത് ലക്ഷം രൂപ തട്ടിയെടുത്ത എംബിഎ ബിരുദധാരിയായ യുവാവിനെ പോലീസ് അറസ്റ്റ് ചെയ്തു. ദില്ലി സ്വദേശിയായ രവി ചൗധരിയെയാണ് പോലീസ് അറസ്റ്റ് ചെയ്തത്.

ഇയാളുടെ ഫേസ്ബുക്ക് ഫ്രണ്ടായിരുന്ന യുവതിയുടെ പരാതിയിലാണ് പോലീസ് ഇയാളെ അറസ്റ്റ് ചെയ്തത്. ഫേസ്ബുക്കില്‍ വിവാഹിതരായ സ്ത്രീകള്‍ക്ക് ഫ്രണ്ട് റിക്വസ്റ്റ് അയക്കുന്ന ചൗധരി, പിന്നീട് സ്ത്രീകളുടെ ചിത്രങ്ങള്‍ ഡൗണ്‍ലോഡ് ചെയ്‌തെടുക്കും. ഇതിനിടയില്‍ സ്ത്രീകളുമായി സൗഹൃദത്തിലാകുകയും ചെയ്യും.

ഡൗണ്‍ലോഡ് ചെയ്ത ഫോട്ടോകള്‍ പിന്നീട് മോര്‍ഫ് ചെയ്ത് നഗ്നഫോട്ടോകളാക്കി സ്ത്രീകള്‍ക്ക് അയച്ചുകൊടുക്കുന്ന ഇയാള്‍ ആവശ്യപ്പെടുന്ന പണം നല്‍കിയില്ലെങ്കില്‍ നഗ്നഫോട്ടോകള്‍ ഭര്‍ത്താവിന് അയക്കുമെന്നും, ഇന്റര്‍നെറ്റില്‍ പ്രചരിപ്പിക്കുമെന്നും ഭീഷണിപ്പെടുത്തും. ഇങ്ങനെ ചതിയില്‍പ്പെട്ട ദില്ലി സ്വദേശിനിയായ യുവതി ആദ്യം ഇയാള്‍ക്ക് പത്ത് ലക്ഷം രൂപ നല്‍കിയിരുന്നു. പിന്നീടും പണം ആവശ്യപ്പെട്ടതോടെയാണ് യുവതി ഭര്‍ത്താവിനോട് സംഭവം പറയുന്നതും പോലീസില്‍ പരാതി നല്‍കിയതും.

ചൗധരിയുടെ അക്കൗണ്ട് നമ്പര്‍ പിന്തുടര്‍ന്നാണ് പോലീസ് ഇയാളെ അറസ്റ്റ് ചെയ്തത്. ഇയാളുടെ ഫോണില്‍ നിന്നും നിരവധി സ്ത്രീകളുടെ മോര്‍ഫ് ചെയ്ത ചിത്രങ്ങളും കണ്ടെത്തി. പത്തോളം സ്ത്രീകളില്‍ നിന്നും ഇതിന് മുന്‍പ് പണം തട്ടിയെടുത്തതായി പ്രതി പോലീസിനോട് പറഞ്ഞിട്ടുണ്ട്. എംബിഎ ബിരുദധാരിയായ ചൗധരി തൊഴില്‍രഹിതനാണ്. ഏപ്രിലില്‍ ഇയാളുടെ വിവാഹം നടക്കാനിരിക്കെയാണ് കേസില്‍ അറസ്റ്റിലാകുന്നത്.

English summary

MBA grad held for extorting Rs 10 lakh from FB friend.