വൈദ്യശാസ്ത്രത്തിലെ അത്ഭുതം;നവജാതശിശു രക്ഷപ്പെട്ടു

വിശാഖപട്ടണം: വൈദ്യശാസ്ത്രത്തെപ്പോലും ഞെട്ടിച്ച് ആന്ധ്രയിലെ ഏറ്റവും ഭാരം കുറഞ്ഞ നവജാത ശിശു രക്ഷപ്പെട്ടു. മാസം തികയാതെ പ്രസവിച്ച കുഞ്ഞാണ് ഇപ്പോള്‍ ഡോക്ടര്‍മാരെ പോലും അത്ഭുതപ്പെടുത്തിയിരിയ്ക്കുന്നത്. ജനിയ്ക്കുന്പോള്‍ 590 ഗ്രാം മാത്രമായിരുന്നു കുഞ്ഞിന്‍റെ ശരീരഭാരം. രക്ഷപ്പെടാന്‍ 30 ശതമാനം മാത്രമേ സാധ്യതയുണ്ടായിരുന്നുള്ളൂ. വിശാഖപട്ടണത്തെ നവജാത ശിശുക്കളുടെ ഇന്റന്‍സീവ് കെയര്‍ യൂണിറ്റില്‍ കുട്ടിയെ മൂന്ന് മാസം ചികിത്സിച്ചു. ഇപ്പോള്‍ ആണ്‍ കുഞ്ഞ് പൂര്‍ണ ആരോഗ്യവാനാണ്.

വിശാഖപട്ടണം സ്വദേശികളായ പുഷ്പലക്ഷ്മി മണി, എംവി വംശി എന്നിവരുടെ ആണ്‍കുഞ്ഞാണ് അത്ഭുകരമായി രക്ഷപ്പെട്ടത്. ദമ്പതികളുടെ വിവാഹം കഴിഞ്ഞ് രണ്ട് വര്‍ഷങ്ങള്‍ക്ക് ശേഷമാണ് ഈ കുഞ്ഞ് ജനിയ്ക്കുന്നത്. ഗര്‍ഭാവസ്ഥയുടെ 25 ആഴ്ചകള്‍ പിന്നിട്ടപ്പോഴാണ് കുട്ടിയെ ശസ്ത്രക്രിയയിലൂടെ പുറത്തെടുക്കുന്നത്. ആന്ധ്ര തീരത്ത് ജനിയ്ക്കുന്ന ഏറ്റവും ഭാരം കുറഞ്ഞ കുഞ്ഞാണിത്. മൂന്ന് മാസത്തിന് ശേഷം ഇപ്പോള്‍ കുഞ്ഞിന്റെ ശരീര ഭാരം 2.1 കിലോഗ്രാം ആയിട്ടുണ്ട്.

നവജാത ശിശുവിന്റെ ശരീരഭാരം 2.5 കിലോഗ്രം മുതല്‍ 3 കിലോഗ്രാം വരെയാണ് വേണ്ടത്. മണിപ്പാല്‍ ആശുപത്രിയിലാണ് കുഞ്ഞ് ജനിച്ചത്. കുഞ്ഞിന് നല്‍കിയ ചികിത്സാ രീതികളെപ്പറ്റി മണിപ്പാല്‍ ആശുപത്രിയിലെ ഡോക്ടര്‍ സായ് സുനില്‍ കിഷോര്‍ മാധ്യമപ്രവര്‍ത്തകരോട് വിശദീകരിച്ചു. തങ്ങളുടെ പ്രാര്‍ത്ഥനയുടെ ഫലം കൊണ്ടാണ് കുഞ്ഞിനെ തിരിച്ച് കിട്ടിയതെന്ന് മാതാപിതാക്കള്‍ പറഞ്ഞു.

English summary

In a medical miracle, a six-month premature baby weighing just 590 gm, that was born to a Vizag couple, survived after 17 days of ventilator support and almost three months of stay in the neonatal intensive care unit of a city hospital.