കറണ്ടടിപ്പിക്കാൻ പറഞ്ഞവർക്ക് ഷോക്ക്, അതും ഹൈ വോൾട്ടേജ്! അമിത് ഷായെ ട്രോളി കശ്മീരിൽ നിന്ന് മെഹ്ബൂബ
ശ്രീനഗര്: ദില്ലിയില് ബിജെപിക്ക് വന് തിരിച്ചടി കൊടുത്ത അരവിന്ദ് കെജ്രിവാളിനും ആം ആദ്മി പാര്ട്ടിക്കും കശ്മീരില് നിന്ന് അഭിനന്ദനം. കശ്മീര് മുന് മുഖ്യമന്ത്രിയും പിഡിപി അധ്യക്ഷയുമായ മെഹ്ബൂബ മുഫ്തിയാണ് കെജ്രിവാളിനേയും ആപിനേയും അഭിനന്ദിച്ച് രംഗത്ത് വന്നത്. ട്വിറ്ററിലാണ് പ്രതികരണം. മാസങ്ങളായി വീട്ട് തടങ്കലില് കഴിയുന്ന മെഹ്ബൂബ മുഫ്തിയുടെ മകള് ഇല്ത്തിജ മുഫ്തിയാണ് ട്വിറ്റര് അക്കൗണ്ട് കൈകാര്യം ചെയ്യുന്നത്.
ട്വീറ്റ് ഇങ്ങനെയാണ്: '' മെഹ്ബൂബ മുഫ്തിക്ക് വേണ്ടി, ദില്ലിയില് ഗംഭീര വിജയം സ്വന്തമാക്കിയ അരവിന്ദ് കെജ്രിവാളിനെ അഭിനന്ദിക്കുന്നു. യഥാര്ത്ഥ വിഷയങ്ങളുടെ അടിസ്ഥാനത്തില് വോട്ട് ചെയ്ത, വിഷലിപ്തമായ വിഭജന രാഷ്ട്രീയത്തെ തളളിക്കളഞ്ഞ ദില്ലി ജനതയേയും അഭിനന്ദിക്കുന്നു''.
കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ മെഹ്ബൂബ മുഫ്തി ഒളിയമ്പെയ്തു. കറണ്ടടിപ്പിക്കാന് ദില്ലിക്കാരോട് ആഹ്വാനം ചെയ്തവര്ക്ക് തന്നെ ഷോക്കേറ്റിരിക്കുകയാണ്. അതും ഹൈ വോള്ട്ടേജില് എന്നാണ് മെഹ്ബൂബ മുഫ്തിയുടെ മറ്റൊരു ട്വീറ്റ്. ഷഹീന് ബാഗില് പൗരത്വ നിയമത്തിന് എതിരെ സമരം ചെയ്യുന്നവര്ക്ക് ഷോക്കേല്ക്കുന്ന തരത്തില് വേണം വോട്ടിംഗ് മെഷിനിലെ ബട്ടണ് അമര്ത്താന് എന്ന് അമിത് ഷാ തിരഞ്ഞെടുപ്പ് പ്രചാരണത്തിനിടെ അണികളോട് ആഹ്വാനം ചെയ്തിരുന്നു.
കശ്മീരില് ആര്ട്ടിക്കിള് 370 റദ്ദ് ചെയ്യുന്നതിന്റെ ഭാഗമായി കേന്ദ്ര സര്ക്കാര് വീട്ടുതടങ്കലിലാക്കിയ മെഹ്ബൂബ മുഫ്തിയും ഒമര് അബ്ദുളളയും ഫറൂഖ് അബ്ദുളളയും അടക്കമുളള നേതാക്കള് തടവില് തുടരുകയാണ്. മൂവര്ക്കും മേല് കേന്ദ്രം പൊതു സുരക്ഷാ നിയമവും ചുമത്തിയിരിക്കുകയാണ്. മുന് മുഖ്യമന്ത്രിമാര് അടക്കമുളള നേതാക്കളെ ഓഗസ്റ്റ് മുതല് വീട്ടുതടങ്കലില് പാര്പ്പിച്ചിരിക്കുന്നതിന് എതിരെ വലിയ വിമര്ശനം ഉയര്ന്നിട്ടുണ്ട്.
On behalf of Ms Mufti, I’d like to congratulate @ArvindKejriwal for his spectacular victory & especially Dilliwallahs for rejecting vitriolic divisive politics & voting on real issues instead
— Mehbooba Mufti (@MehboobaMufti) February 11, 2020