ബീഹാറില്‍ 12കാരി കൂട്ടമാനഭംഗത്തിനിരയായി;കുട്ടിയുടെ നില ഗുരുതരം

By Pratheeksha

Updated: Thursday, June 23, 2016, 16:58 [IST]

പറ്റ്‌ന:ബീഹാറിലെ മോത്തിഹരിയില്‍ 12കാരി കൂട്ടമാനഭംഗത്തിനിരയായി. മധുവന്‍ ഗ്രാമത്തില്‍ ജൂണ്‍ 15 നാണ് സംഭവം. വീടിനടുത്തുളള തോട്ടത്തില്‍ മാങ്ങപെറുക്കാന്‍ പോയ കുട്ടിയെ രണ്ടു പേര്‍ ചേര്‍ന്നു മാനഭംഗപ്പെടുത്തുകയായിരുന്നുവെന്നാണ് കേസ്.

ആശുപത്രിയില്‍ പ്രവേശിപ്പിച്ച കുട്ടിയുടെ നില ഗുരുതരമായി തുടരുകയാണ്. ഗ്രാമത്തിലെ സര്‍ക്കാര്‍ ആശുപത്രിയില്‍ പ്രവേശിപ്പിച്ച കുട്ടിയെ വിദഗ്ദ ചികിത്സയ്ക്കായി പറ്റ്‌നയിലെ സ്വകാര്യ ആശുപത്രിയിലേക്കു മാറ്റിയിട്ടുണ്ട്. സംഭവത്തില്‍ പ്രതിഷേധിച്ച നാട്ടുകാര്‍ മോത്തിഹരി-മുസാഫര്‍പൂര്‍ ദേശീയ പാത ഉപരോധിച്ചു.

പ്രതികളെ അറസ്റ്റു ചെയ്‌തെങ്കിലും നിയമനടപടികള്‍ വേഗത്തിലാക്കി കടുത്ത ശിക്ഷ നല്‍കണ മെന്നാവശ്യപ്പെട്ടായിരുന്നു പ്രതിഷേധം. ഇതിനിടെ സംഭവത്തില്‍ പരാതി നല്‍കിയ കുട്ടിയുടെ പിതാവിനെ ഗ്രാമവാസികളില്‍ ചിലര്‍ കേസ് പിന്‍വലിക്കണമെന്നാവശ്യപ്പെട്ട് ഭീഷണിപ്പെടുത്തിയതായും പറയുന്നു.

പരാതി പിന്‍വലിച്ചില്ലെങ്കില്‍ പെണ്‍കുട്ടിയുടെ സഹോദരനെ തട്ടിക്കൊണ്ടു പോവുമെന്നായിരുന്നു ഭീഷണി. നാട്ടുകാരുടെ സഹായത്തോടെയാണ് കുട്ടിയുടെ ചികിത്സ നടത്തുന്നതെന്നു പിതാവ് പറഞ്ഞു. എന്നാല്‍ കുട്ടിയുടെ ചികിത്സാതുക വഹിക്കുമെന്ന് ജില്ലാഭരണകൂടം അറിയിച്ചിട്ടുണ്ട്.