അഞ്ചുവര്ഷം മുന്പ് കാണാതായ പെണ്കുട്ടിയെ ഭിക്ഷാടന മാഫിയയില് നിന്നും രക്ഷപ്പെടുത്തി
ജയ്പൂര്: അഞ്ചുവര്ഷം മുന്പ് കാണാതായ സഹോദരി രക്ഷാ ബന്ധന് ദിവസം രാഖി കെട്ടാന് എത്തിയ സന്തോഷത്തിലാണ് പത്തുവയസുകാരനായ മഹേഷ്. ഇനിയൊരിക്കലും കണ്ടുമുട്ടില്ലെന്ന് കരുതി മകള് വീട്ടിലേക്ക് തിരിച്ചെത്തിയതിന്റെ സന്തോഷം പെണ്കുട്ടിയുടെ കുടുംബവും മറച്ചുവെക്കുന്നില്ല.
രാജസ്ഥാനിലെ നാഗുര് ജില്ലയിലെ നവാ ടൗണിനടുത്തുള്ള ഗ്രാമത്തില് നിന്നും 2010 മാര്ച്ച് 30നാണ് മമത എന്ന പെണ്കുട്ടിയെ കാണാതാകുന്നത്. ഒരു ബലൂണ് വില്പ്പനക്കാരനൊപ്പമാണ് പെണ്കുട്ടിയെ അവസാനമായി കണ്ടതെന്ന് പ്രദേശവാസികള് പറഞ്ഞെങ്കിലും പോലീസ് നടത്തിയ അന്വേഷണത്തില് പെണ്കുട്ടിയെ കണ്ടെത്താനായില്ല.
ഇക്കഴിഞ്ഞ ആഗസ്ത് രണ്ടിന് അജ്മീറില്വെച്ച് അഞ്ചു കുട്ടികളുമായി ഒരാള് അറസ്റ്റിലായതാണ് കേസിന് വഴിത്തിരിവായത്. ഭിക്ഷാടന മാഫിയയില് നിന്നും അഞ്ചുകുട്ടികളെ മോചിപ്പിച്ച കാര്യം പോലീസ് പത്രത്തിലൂടെ അറിയിച്ചിരുന്നു. പത്രത്തില് നിന്നും സൂചന ലഭിച്ചതിനാല് മമതയുടെ വീട്ടുകാര് സ്ഥലത്തെത്തിയപ്പോഴാണ് കുട്ടിയെ തിരിച്ചറിയുന്നത്.
കുട്ടി കാണാതായതിനുശേഷം ചെരുപ്പുകുത്തിയായ പിതാവ് മരിച്ചിരുന്നു. അമ്മ ഒരു ഫാക്ടറിയില് ജോലി ചെയ്താണ് മറ്റൊരു മകളെയും മകനെയും സംരക്ഷിക്കുന്നത്. രണ്ടാമത്തെ മകളെ തിരിച്ചുകിട്ടിയതിന്റെ സന്തോഷം പറഞ്ഞറിയിക്കാന് കഴിയാത്തതാണെന്ന് അമ്മ പറയുന്നു. രക്ഷാബന്ധന് ദിവസം ശനിയാഴ്ചയാണെങ്കിലും വെള്ളിയാഴ്ച തന്നെ സഹോദരന് മഹേഷിന്റെ കൈയ്യില് രാഖി കെട്ടിയാണ് മമത തന്റെ തിരിച്ചുവരവ് ആഘോഷിച്ചത്. സ്കൂളില് തുടര്ന്നു പഠിക്കണമെന്നാണ് മമതയുടെ ആഗ്രഹം. അതേസമയം, മമതയ്ക്ക് കുടുംബത്തെ തിരിച്ചു കിട്ടിയെങ്കിലും പോലീസ് മോചിപ്പിച്ച മറ്റു നാലു കുട്ടികളെ അന്വേഷിച്ച് ഇതുവരെ ആരും എത്തിയിട്ടില്ല.