മുഖ്യമന്ത്രി വിജയ് ഒഴിഞ്ഞ മണ്ഡലത്തിൽ സ്റ്റാലിൻ? തിരുച്ചിറപ്പള്ളി ഈസ്റ്റിൽ മത്സരിച്ചേക്കും

തമിഴ്‌നാട് രാഷ്ട്രീയത്തിൽ വൻ മാറ്റങ്ങൾക്ക് വഴിതുറന്നേക്കാവുന്ന പുതിയ നീക്കങ്ങൾ അണിയറയിൽ ഒരുങ്ങുന്നതായി സൂചന. തമിഴ്‌നാട് മുഖ്യമന്ത്രി വിജയ് രാജിവെച്ചതിനെ തുടർന്ന് ഒഴിഞ്ഞുകിടക്കുന്ന തിരുച്ചിറപ്പള്ളി ഈസ്റ്റ് മണ്ഡലത്തിലെ ഉപതെരഞ്ഞെടുപ്പിൽ ഡിഎംകെ അധ്യക്ഷനും മുൻ മുഖ്യമന്ത്രിയുമായ എം കെ സ്റ്റാലിൻ മത്സരിച്ചേക്കുമെന്നാണ് റിപ്പോർട്ടുകൾ.

നിയമസഭാ തെരഞ്ഞെടുപ്പിൽ പെരമ്പൂർ, തിരുച്ചിറപ്പള്ളി ഈസ്റ്റ് എന്നീ രണ്ട് മണ്ഡലങ്ങളിൽ നിന്നാണ് വിജയ് ജനവിധി തേടിയിരുന്നത്. രണ്ടു മണ്ഡലങ്ങളിലും വിജയിച്ചതിനെ തുടർന്ന്, നിയമപ്രകാരം ഒരു മണ്ഡലം നിലനിർത്തിക്കൊണ്ട് ട്രിച്ചി ഈസ്റ്റ് മണ്ഡലത്തിലെ എംഎൽഎ സ്ഥാനം അദ്ദേഹം രാജിവെക്കുകയായിരുന്നു.

ഈ സാഹചര്യത്തിലാണ് ഈ മണ്ഡലത്തിൽ നടക്കാനിരിക്കുന്ന ഉപതെരഞ്ഞെടുപ്പിൽ സ്റ്റാലിൻ നേരിട്ട് കളത്തിലിറങ്ങാൻ സാധ്യതയുണ്ടെന്ന വാർത്തകൾ പുറത്തുവരുന്നത്. നിയമസഭയിൽ സ്റ്റാലിന്റെ സാന്നിധ്യം ഉണ്ടാകണമെന്നത് ഡിഎംകെ പ്രവർത്തകരുടെയും മുതിർന്ന നേതാക്കളുടെയും ശക്തമായ ആവശ്യമാണ്. മുൻ മന്ത്രി കെ എൻ നെഹ്‌റു അടക്കമുള്ള പ്രമുഖ നേതാക്കൾ സ്റ്റാലിൻ ഉടൻ തന്നെ നിയമസഭയിൽ തിരിച്ചെത്തുമെന്ന സൂചനകൾ കഴിഞ്ഞ ദിവസം പൊതുവേദികളിൽ പങ്കുവെച്ചിരുന്നു.

നിയമസഭാ തിരഞ്ഞെടുപ്പിൽ കൊളത്തൂർ മണ്ഡലത്തിൽ നിന്നും മത്സരിച്ച സ്റ്റാലിൻ പരാജയപ്പെട്ടിരുന്നു. സ്റ്റാലിൻ നിയമസഭയിലേക്ക് തിരിച്ചെത്തേണ്ടത് പാർട്ടിക്കും പ്രതിപക്ഷത്തിനും അനിവാര്യമാണെന്നാണ് ഡിഎംകെ നേതാക്കളുടെ നിലപാട്. തിരുച്ചിറപ്പള്ളി ഈസ്റ്റ് മണ്ഡലത്തിൽ നിന്നും വിജയ് വൻ ഭൂരിപക്ഷത്തിൽ ആണ് വിജയിച്ചത്.
ഇവിടെ സ്റ്റാലിൻ മത്സരിച്ച് വീണ്ടും പരാജയപ്പെട്ടാൽ അത് പാർട്ടിയുടെ പ്രതിച്ഛായയെ കനത്ത രീതിയിൽ ബാധിക്കുമെന്ന ആശങ്കയും ഡിഎംകെ നേതൃത്വത്തിനുണ്ട്.

ഉപതെരഞ്ഞെടുപ്പിൽ മത്സരിക്കുമോ എന്ന മാധ്യമപ്രവർത്തകരുടെ ചോദ്യത്തിന് താൻ മത്സരിക്കാനുള്ള സാധ്യതകൾ സ്റ്റാലിൻ പൂർണ്ണമായി തള്ളിക്കളഞ്ഞിട്ടില്ല. നിലവിൽ ഈ കാര്യത്തിൽ അന്തിമ തീരുമാനം എടുത്തിട്ടില്ലെന്നാണ് അദ്ദേഹം പ്രതികരിച്ചത്.
വരും ദിവസങ്ങളിൽ മണ്ഡലത്തിലെ സ്ഥാനാർത്ഥി പ്രഖ്യാപനവുമായി ബന്ധപ്പെട്ട് കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്.

തമിഴ്‌നാട് നിയമസഭയിൽ കഴിഞ്ഞ ദിവസം മുഖ്യമന്ത്രി വിജയ്‌യും ഡിഎംകെ അംഗങ്ങളും തമ്മിൽ കടുത്ത വാക്പോര് നടന്നിരുന്നു. സ്റ്റാലിന്റെ നിയമസഭയിലെ അസാന്നിധ്യത്തെച്ചൊല്ലി 'നിങ്ങളുടെ അച്ഛൻ എവിടെ' എന്ന വിജയുടെ ചോദ്യത്തിന് "താൻ നിയമസഭയ്ക്ക് പുറത്താണെങ്കിലും ജനങ്ങളുടെ ഹൃദയത്തിലുണ്ട്" എന്ന് സ്റ്റാലിൻ മറുപടി നൽകിയിരുന്നു. ഈ രാഷ്ട്രീയ സാഹചര്യങ്ങൾക്കിടയിലാണ് തിരുച്ചിറപ്പള്ളിയിലെ ഉപതെരഞ്ഞെടുപ്പും സ്റ്റാലിന്റെ സ്ഥാനാർത്ഥിത്വവും തമിഴ്‌നാട് രാഷ്ട്രീയത്തിൽ വലിയ ചർച്ചയായി മാറിയിരിക്കുന്നത്.