മോദിയുടെ കുപ്പായത്തിലെ ആ സസ്‌പെന്‍സ്...?

By Soorya Chandran

Updated: Tuesday, January 27, 2015, 12:00 [IST]

ദില്ലി: നരേന്ദ്ര മോദി പ്രധാനമന്ത്രി ആകുന്നതിന് മുമ്പ് തന്നെ അദ്ദേഹത്തിന്റെ വസ്ത്രധാരണം ലോക ശ്രദ്ധ നേടിയിരുന്നു. 'മോദി കുര്‍ത്ത' എന്ന പേരില്‍ ചില വസ്ത്ര നിര്‍മാതാക്കള്‍ ബ്രാന്‍ഡഡ് കുര്‍ത്തകള്‍ പോലും നിര്‍മിച്ചു.

എന്നാല്‍ ഇപ്പോള്‍ മോദിയുടെ വസ്ത്രം വേറൊരു വിവാദത്തിനാണ് തുടക്കം കുറിച്ചിരിക്കുന്നത്. ഒബാമക്കൊപ്പം വാക്ക് ആന്‍ഡ് ടോക്ക് നടത്തുമ്പോള്‍ ധരിച്ച സ്യൂട്ട് ആണ് ചര്‍ച്ചകള്‍ക്ക് വഴിവച്ചത്.

നീല സ്യൂട്ട് ആണ് മോദി ധരിച്ചിരുന്നത്. അതില്‍ സ്വര്‍ണ നിറത്തിലുള്ള വരകള്‍. ഇങ്ങനെ ഒരു സ്യൂട്ട് എന്ത് വിവാദമുണ്ടാനാണല്ലേ... എന്നാൽ സംഭവം അങ്ങനെ അല്ല. ചില ഫോട്ടോഗ്രാഫര്‍മാര്‍ തങ്ങളെടുത്ത ചിത്രങ്ങള്‍ വലുതാക്കി നോക്കിയപ്പോഴല്ലേ ആ രഹസ്യം പുറത്ത് വന്നത്...

ആ വരകളൊന്നും വെറും വരകളല്ല. നരേന്ദ്ര ദാമോദര്‍ദാസ് മോദി എന്ന് ലംബമായി ഇംഗ്ലീഷില്‍ എഴുതിയതാണ്. ആയിരം തവണ മോദിയുടെ പേര് സ്യൂട്ടില്‍ എഴുതിയിട്ടുണ്ടെന്നൊക്കെയാണ് റിപ്പോര്‍ട്ടുകള്‍ വരുന്നത്.

സംഭവം ഇപ്പോള്‍ ഉഷാറായിട്ടുണ്ട്. സോഷ്യല്‍ മീഡിയകളില്‍ മോദിയുടെ സ്യൂട്ടിനെ അനുകൂലിച്ചും പ്രതികൂലിച്ചും പതിവുപോലെ ആളുകള്‍ രംഗത്തുണ്ട്. എന്തായാലും അമേരിക്കന്‍ പ്രസിഡന്റ് ബരാക് ഒബാമ തന്നെ കുപ്പായത്തിലെ ഈ സസ്‌പെന്‍സ് കണ്ട് ഞെട്ടിയത്രെ!