'യുണൈറ്റഡ് സ്റ്റേറ്റ്സ് ഓഫ് ഇന്ത്യ'യാകുമോ?
ചെന്നൈ: 'യുണൈറ്റഡ് സ്റ്റേറ്റ്സ് ഓഫ് ഇന്ത്യ' - കേള്ക്കാന് ഒരു ഗമയൊക്കെ ഉണ്ട് അല്ലേ. ലോക്സഭ തിരഞ്ഞെടുപ്പില് ജയിച്ചാല് രാജ്യത്തിന്റെ പേര് മാറ്റുന്നതടക്കമുള്ള പരിപാടികളാണ് വൈകോയുടെ എം ഡി എം കെ മുന്നോട്ടുവെക്കുന്നത്. എല് ടി ടി ഇക്കെതിരായ നിരോധനം പിന്വലിക്കും എന്നതാണ് എം ഡി എം കെയുടെ മറ്റൊരു വാഗ്ദാനം.
ബി ജെ പിക്കൊപ്പമാണ് ഡി എം ഡി കെ തമിഴ്നാട്ടില് ലോക്സഭ തിരഞ്ഞെടുപ്പില് മത്സരിക്കുന്നത്. തമിഴ്നാട്ടിലെ 40 സീറ്റുകള് ഇല്ലെങ്കില് പോലും നരേന്ദ്ര മോദി നയിക്കുന്ന എന് ഡി എ വിജയത്തിലെത്തും. രാജ്യത്തെങ്ങും നരേന്ദ്ര മോദി തരംഗം അലയടിക്കുകയാണ് - തമിഴ്നാട്ടിലെ തീപ്പൊരു നേതാവായ വൈക്കോ പറഞ്ഞു. ബി ജെ പി - ഡി എം ഡി കെ - എം ഡി എം കെ - പി എം കെ സഖ്യമാണ് തമിഴ്നാട്ടില് മത്സരിക്കുന്നത്.
ഫെഡറല് സര്ക്കാര് എന്നാണ് ഭരണഘടനയില് എഴുതിയിരിക്കുന്നത്. എന്നാല് നാനാത്വത്തില് ഏകത്വം എന്ന് പറഞ്ഞ് അധികാരത്തില് എത്തിയവര് ഇപ്പോള് അധികാരം കേന്ദ്ര സര്ക്കാരില് മാത്രമാക്കി ഒതുക്കിയിരിക്കുകയാണ്. തങ്ങള് തിരഞ്ഞെടുപ്പില് ജയിച്ചാല് വധശിക്ഷ നിര്ത്തലാക്കും എന്നും വൈക്കോ പറഞ്ഞു.
തമിഴ്നാട്ടില് ഏഴ് മണ്ഡലങ്ങളിലാണ് വൈക്കോയുടെ ഡിം എം ഡി കെ മത്സരിക്കുന്നത്. അണ്ണാ ഡി എം കെയ്ക്കല്ലാതെ മറ്റ് പാര്ട്ടികള്ക്ക് വോട്ട് ചെയ്താല് അത് വെറുതെയാകും എന്ന ജയലളിതയുടെ പരാമര്ശത്തെ വൈക്കോ വിമര്ശിച്ചു. അവര് അവരുടെ അഭിപ്രായമാണ് പറഞ്ഞത്. എന്നാല് ബി ജെ പിക്കും സഖ്യകക്ഷികള്ക്കുമല്ലാതെ വോട്ട് ചെയ്താല് ആ വോട്ടുകള് വെറുതെയാകും എന്ന് വൈക്കോ പറഞ്ഞു.