'എനിക്കൊരു മകളുണ്ട്, അപമാനിക്കരുത്'; വിമാന പീഡനക്കേസിലെ പ്രതി

ഭുവനേശ്വര്‍: വിമാനയാത്രയ്ക്കിടെ യുവതിയെ പിടിക്കാന്‍ ശ്രമിച്ചെന്ന ആരോപണവിധേയനായ പ്രതി തന്റെ തെറ്റിനെയോര്‍ത്ത് ഇപ്പോള്‍ അങ്ങേയറ്റത്തെ ദു:ഖത്തിലാണ്. ചെറിയൊരു നിമിഷത്തെ തെറ്റുകൊണ്ട് ഇന്ത്യ മുഴുവന്‍ അറിയപ്പെടുന്ന ഒരു പീഡകനായി മാറിയിരിക്കുകയാണ് പ്രമുഖ കമ്പനിയുടെ എംഡി കൂടിയായ പ്രതി രവീന്ദ്ര ജുന്‍ജുന്‍വാല. 'തെറ്റു ചെയ്യാത്തവരില്ല, എനിക്കും ഒരു തെറ്റു പറ്റി, ഒരു വലിയ തെറ്റ്. എനിക്കും ഒരു മകളുണ്ട്' അദ്ദേഹം പറഞ്ഞു.

ഇന്‍ഡിഗോ വിമാനത്തില്‍ ദില്ലിയില്‍ നിന്നും ഭുവനേശ്വരിലേക്കുള്ള യാത്രക്കിടെ യുവതിയെ ഇരിപ്പിടത്തിനിടയിലൂടെ പിടിക്കാന്‍ ശ്രമിച്ചെന്നാണ് ഇദ്ദേഹത്തിനെതിരെയുള്ള പരാതി. അറുപതുകാരന്റെ പ്രവര്‍ത്തിയില്‍ കുപിതയായ യുവതി ബഹളമുണ്ടാക്കുകയും അയാളുടെ വീഡിയോ മൊബൈല്‍ ഫോണില്‍ പകര്‍ത്തുകയുമായിരുന്നു.

വീഡിയോ പകര്‍ത്തുന്നതുകണ്ട് രവീന്ദ്ര മുഖം മറയ്ക്കാന്‍ ശ്രമിക്കുന്നത് പിന്നീട് യു ട്യൂബില്‍ വൈറലായിക്കഞ്ഞ ദൃശ്യത്തില്‍ നിന്നും വ്യക്തമാണ്. ലക്ഷക്കണക്കിന് ആളുകള്‍ കുറഞ്ഞദിവസത്തിനുള്ളില്‍ തന്നെ വീഡിയോ കാണുകയും സോഷ്യല്‍ മീഡിയയിലൂടെ പ്രചരിപ്പിക്കുകയും ചെയ്തു. ഇതോടെ, ബന്ധുക്കളുടെയും സുഹൃത്തുക്കളുടെയും മുഖത്ത് നോക്കാന്‍ പറ്റാത്ത അവസ്ഥയിലായി രവീന്ദ്ര.

ഒരു പെണ്‍കുട്ടിക്കും ഇത്തരം അനുഭവം ഉണ്ടാകാതിരിക്കാനാണ് താന്‍ വീഡിയോ പകര്‍ത്തിയതും യൂ ട്യൂബില്‍ അപ് ലോഡ് ചെയ്തതുമെന്ന് യുവതി പിന്നീട് പറഞ്ഞു. ആദ്യ തവണ താന്‍ ക്ഷമിച്ചെങ്കിലും വീണ്ടും വീണ്ടും അപമാനിക്കാന്‍ ശ്രമിച്ചതോടെ പ്രതികരിക്കുകയായിരുന്നെന്നും അവര്‍ വ്യക്തമാക്കി. യുവതിയുടെ പരാതിയില്‍ അറസ്റ്റ് ചെയ്യപ്പെട്ട രവീന്ദ്രയെ പിന്നീട് ജാമ്യത്തില്‍ വിട്ടയച്ചു.

English summary

Molestation; Man Filmed on Indigo Flight