അയല്‍ക്കാരനുമായി പ്രണയം; പതിനേഴുകാരിയായ മകളെ അമ്മ കൊലപ്പെടുത്തി

വിജയവാഡ: അയല്‍ക്കാരനുമായി പ്രണയത്തിലായ മകളെ അമ്മ കൊലപ്പെടുത്തിയതായി റിപ്പോര്‍ട്ട്. വിജയവാഡയില്‍ നിന്നുമാണ് ദുരഭിമാനക്കൊലയുടെ മറ്റൊരു വാര്‍ത്തകൂടി പുറത്തുവരുന്നത്. പതിനേഴു വയസുള്ള മകള്‍ അയല്‍ക്കാരുനുമായി പ്രണയത്തിലാണെന്നറിഞ്ഞ് അമ്മ മകളുമായി വഴക്കിടുന്നത് പതിവായിരുന്നു.

കഴിഞ്ഞദിവസം വൈകിട്ടും ഇരുവരും തമ്മില്‍ ഇക്കാര്യത്തില്‍ വഴക്കിട്ടു. പിന്നീട് രാത്രി മകള്‍ ഗാഢനിദ്രയിലായിരിക്കുമ്പോള്‍ അമ്മ തലയിണകൊണ്ട് ശ്വാസംമുട്ടിച്ചുകൊലപ്പെടുത്തുകയായിരുന്നു. പിറ്റേദിവസം രാവിലെ മകള്‍ മരിച്ചതായി അമ്മ കൃഷ്ണ ജില്ലയിലെ ബന്ധുക്കളെ വിളിച്ചറിയിക്കുകയും ചെയ്തു. മകള്‍ വയറുവേദനമൂലം മരിച്ചെന്നായിരുന്നു അമ്മ അറിയിച്ചിരുന്നത്.

ഇതിന് പിന്നാലെ ശവസംസ്‌കാരത്തിനായി മകളുടെ മൃതദേഹം കൃഷ്ണ ജില്ലയിലേക്ക് മാറ്റുകയും ചെയ്തു. എന്നാല്‍, കാമുകിയുടേത് കൊലപാതകമാണെന്നുകാട്ടി പെണ്‍കുട്ടിയുടെ സുഹൃത്ത് ദീപക് രംഗത്തെത്തിയതോടെയാണ് സംഭവത്തിന്റെ നിജസ്ഥിതി പുറത്തുവരുന്നത്. സംഭവത്തില്‍ പെണ്‍കുട്ടിയുടെ മാതാവ് ബിബി ജാനിനെ പോലീസ് പിന്നീട് കസ്റ്റഡിയിലെടുത്തു.

ബിബി ജാനും ഭര്‍ത്താവ് മൈസൂര്‍ ജാനും മകളുടെ വിദ്യാഭ്യാസത്തിനായാണ് വിജയവാഡയിലെത്തിയത്. ഇവിടെ വെച്ചാണ് മകള്‍ മറ്റൊരാളുമായി പ്രണയത്തിലാകുന്നതും. അന്യജാതിക്കാരനായ യുവാവുമായുള്ള പ്രണയത്തെ മാതാവ് ശക്തിയായി എതിര്‍ത്തിരുന്നു. ഇതിന്റെ തുടര്‍ച്ചയായാണ് കൊലപാതകം നടന്നതെന്നാണ് പോലീസ് സംശയിക്കുന്നത്.

English summary

Mother kills daughter for family honour in Vijayawada