മുലായം സിങ് യാദവിന് ദേഹാസ്വാസ്ഥ്യം; വീണ്ടും ആശുപത്രിയില്‍ പ്രവേശിപ്പിച്ചു

ഗുഡ്ഗാവ്: സമാജ്‌വാദി പാര്‍ട്ടി സ്ഥാപകന്‍ മുലായം സിങ് യാദവ് വീണ്ടും ആശുപത്രിയില്‍. ശാരീരിക തളര്‍ച്ച അനുഭവപ്പെട്ടതിനെ തുടര്‍ന്നാണ് അദ്ദേഹത്തെ ഗുഡ്ഗാവിലെ സ്വകാര്യ ആശുപത്രിയില്‍ പ്രവേശിപ്പിച്ചത്. കഴിഞ്ഞാഴ്ച ലഖ്‌നൗവിലെ രാം മനോഹര്‍ ലോഹ്യ ആശുപത്രിയില്‍ പ്രവേശിപ്പിച്ചിരുന്ന മുലായത്തെ ദിവസങ്ങള്‍ക്ക് ശേഷം ഡിസ്ചാര്‍ജ് ചെയ്തു.

തിങ്കളാഴ്ച ഉത്തര്‍ പ്രദേശ് മുഖ്യമന്ത്രി യോഗി ആദിത്യനാഥ് മുലായത്തെ ലഖ്‌നൗവിലെ വീട്ടിലെത്തി സന്ദര്‍ശിച്ചിരുന്നു. പഞ്ചസാരയുടെ അളവില്‍ വന്ന വ്യതിയാനമാണ് ക്ഷീണം വരാന്‍ കാരണമെന്ന് പാര്‍ട്ടി വൃത്തങ്ങള്‍ പറഞ്ഞു. തിങ്കളാഴ്ച രാത്രിയാണ് ഗുഡ്ഗാവിലെ മേദാന്ത ആശുപത്രിയില്‍ പ്രവേശിപ്പിച്ചത്. ആരോഗ്യനിലയിലെ പുരോഗതി ആശുപത്രി വൃത്തങ്ങള്‍ പുറത്തുവിട്ടില്ല.

തിങ്കളാഴ്ച മുലായത്തിന്റെ വിക്രമാദിത്യ മാര്‍ഗ് എന്ന വീട്ടിലെത്തിയ യോഗിയെ മുന്‍ മുഖ്യമന്ത്രിയും മുലായത്തിന്റെ മകനുമായ അഖിലേഷ് യാദവും അമ്മാവന്‍ ശിവപാല്‍ യാദവും ചേര്‍ന്ന് സ്വീകരിച്ചു. മറ്റു എസ്പി നേതാക്കളും മുലായത്തിന്റെ വീട്ടിലെത്തിയിരുന്നു. മുലായം സിങ് യാദവിന്റെ ആരോഗ്യ വിവരങ്ങള്‍ ചോദിച്ചറിഞ്ഞ യോഗി, ഈ വര്‍ഷം നടന്ന കുംഭമേളയെ കുറിച്ചുള്ള പുസ്തകം സമ്മാനിച്ചാണ് മടങ്ങിയത്.

ബിജെപിക്കെതിരെ മഹാസഖ്യം രൂപീകരിച്ച് ലോക്‌സഭാ തിരഞ്ഞെടുപ്പില്‍ മല്‍സരിച്ച എസ്പിക്ക് കനത്ത തിരിച്ചടിയാണ് നേരിട്ടത്. എസ്പിക്ക് തിരഞ്ഞെടുപ്പ് തന്ത്രങ്ങള്‍ മെനയുന്നതില്‍ പിഴവ് സംഭവിച്ചുവെന്നാണ് പാര്‍ട്ടിയിലെ വിലയിരുത്തല്‍. പാര്‍ട്ടി വിട്ടുപോയ എല്ലാ നേതാക്കളെയും തിരിച്ചുകൊണ്ടുവരണമെന്ന് മുലായം സിങ് അഖിലേഷിനോട് ആവശ്യപ്പെട്ടിട്ടുണ്ട്. അഖിലേഷും അമ്മാവന്‍ ശിവപാല്‍ യാദവും വീണ്ടും ഒരുമിക്കുമെന്നാണ് സൂചന.

English summary

Mulayam Singh Yadav admitted to hospital again