നൈറ്റ് ക്ലബ്ബ് വനിതാ മാനേജര്‍ക്കെതിരെ കേസ്

മുംബൈ: നൈറ്റ് ക്ലബ്ബിലെത്തിയ രണ്ടുപേരെ ഉള്ളിലേക്ക് കടത്തിവിട്ടില്ലെന്ന പരാതിയില്‍ വനിതാ നൈറ്റ് ക്ലബ്ബ് മാനേജര്‍ക്കെതിരെ കേസ് രജിസ്റ്റര്‍ ചെയ്തു. മുംബൈയിലെ സാന്റാക്രൂസിലെ ത്രിലോഗി നൈറ്റ് ക്ലബ്ബ് മാനേജരായ നടാഷയ്‌ക്കെതിരെയാണ് കേസ്. പുലര്‍ച്ചെ 2.30ന് ക്ലബ്ബിലെത്തിയ തങ്ങളെ തടഞ്ഞു നിര്‍ത്തെയെന്നായിരുന്നു പരാതി.

ജെന്നിഫര്‍ ചൗഹാന്‍, ഷാനു മാലിക്ക് എന്നിവരാണ് പരാതിക്കാര്‍. ഷാനുവിന്റെ ബര്‍ത്തഡേ ആഘോഷിക്കാനായാണ് ത്രിലോഗിയിലെത്തിയത്. എന്നാല്‍ തങ്ങള്‍ക്ക് വളരെ മോശം അനുഭവമാണ് മാനേജരില്‍ നിന്നും ഉണ്ടായതെന്ന് ജെന്നിഫര്‍ പറഞ്ഞു. ഇന്ത്യക്കാരെ അകത്തേക്ക് കടത്തിവിടില്ലെന്നായിരുന്നു മാനേജരുടെ നിലപാടെന്നും ജെന്നിഫര്‍ ആരോപിച്ചു.

പലവട്ടം ത്രിലോഗിയില്‍ ആഘോഷത്തിനായി എത്തിയിട്ടുണ്ട്. അന്നൊന്നും മോശം അനുഭവം ഉണ്ടായിട്ടില്ല. എന്നാല്‍, ഇത്തവണ തങ്ങള്‍ അമാനിക്കപ്പെട്ടു. മറ്റൊരു മാനേജരെ കണ്ടെങ്കിലും അവരും തങ്ങളെ കടത്തിവിടാന്‍ തയ്യാറായില്ല. ഇതേ തുടര്‍ന്നാണ് പോലീസില്‍ പരാതി നല്‍കിയതെന്നും ജെന്നിഫര്‍ വ്യക്തമാക്കി.

പരാതി ഗൗരവമായാണ് കാണുന്നതെന്ന് സാന്റാക്രൂസ് പോലീസ് സ്‌റ്റേഷനിലെ ഉദ്യോഗസ്ഥന്‍ അറിയിചച്ചു. എഫ്‌ഐആര്‍ രജിസ്റ്റര്‍ ചെയ്തു കഴിഞ്ഞു. പൗരന്റെ സ്വാതന്ത്ര്യം തടഞ്ഞതിനാണ് മാനേജര്‍ക്കെതിരെ കേസെടുത്തിട്ടുള്ളതെന്നും അദ്ദേഹം അറിയിച്ചു. വിഷയത്തില്‍ നൈറ്റ് ക്ലബ്ബ് അധികൃതര്‍ പ്രതികരിച്ചിട്ടില്ല.

English summary

mumbai Nightclub manager booked, mumbai Nightclub denying entry to couple, Nightclub woman manager booked