മോദി രജനിയുമായി കൂടിക്കാഴ്ച നടത്തി

Updated: Sunday, April 13, 2014, 20:08 [IST]

ചെന്നൈ: തമിഴ്‌നാട് രാഷ്ട്രീയം ഉറ്റുനോക്കുന്ന നരേന്ദ്രമോഡി-രജനികാന്ത് കൂടിക്കാഴ്ച പൂര്‍ത്തിയായി. ഗുജറാത്ത് മുഖ്യമന്ത്രിയും ബിജെപിയുടെ പ്രധാനമന്ത്രി സ്ഥാനാര്‍ത്ഥിയുമായ മോദി ചെന്നൈയിലെ പേസ് ഗാര്‍ഡനിലുള്ള സൂപ്പര്‍ സ്റ്റാറിന്റെ വീട്ടിലെത്തിയതിനെ ഏറെ പ്രാധാന്യത്തോടെയാണ് ഇന്ത്യന്‍ രാഷ്ട്രീയലോകം നോക്കി കാണുന്നത്.

തമിഴ് പുതുവര്‍ഷത്തോടനുബന്ധിച്ചുള്ള ഒരു സാധാരണ സന്ദര്‍ശനം എന്നാണ് ാേദി ഇതിനെ വിശേഷിപ്പിച്ചത്. എന്നാല്‍ തമിഴ്‌നാട്ടില്‍ ഏറ്റവും സ്വാധീനമുള്ള സിനിമാ താരങ്ങളില്‍ ഒരാളാണ് രജനി. ഇന്ത്യന്‍ സിനിമാ ലോകത്ത് ഏറ്റവും വലിയ ഫാന്‍സ് അസോസിയേഷന്‍ രജനിയുടെതാണെന്ന് പറഞ്ഞാല്‍ അത് അതിശയോക്തിയാവുകയുമില്ല.

ഭാരത് വിജയ് റാലിയുടെ ഭാഗമായി ചെന്നൈയിലെ എഎം ജെയിന്‍ കോളജില്‍ സംഘടിപ്പിച്ച റാലിയില്‍ പങ്കെടുക്കാനെത്തിയതായിരുന്നു മോദി. തമിഴ്‌നാട്ടില്‍ മോദി പങ്കെടുക്കുന്ന രണ്ടാമത്തെ റാലിയാണിത്. കോയമ്പത്തൂരില്‍ നടക്കുന്ന എന്‍ഡിഎ റാലിയിലും മോദി പങ്കെടുക്കും.

അഴിമതിയില്‍ മുങ്ങിക്കുളിച്ച ഡിഎംകെ, എഐഎഡിഎംകെയ്ക്ക് കാര്യമായ വെല്ലുവിളിയുയര്‍ത്തില്ലെന്ന തിരിച്ചറിവാണ് മോദിയുടെ ഈ നയതന്ത്രനീക്കത്തിനു പിന്നിലെന്ന് വ്യക്തമായിട്ടുണ്ട്. ഇലക്ഷനു മുമ്പുള്ള ഒരു സഖ്യത്തെയും ജയലളിത അംഗീകരിക്കുന്നില്ല. അതേ സമയം ഡിഎംകെയോട് കൂട്ടുകൂടുന്നത് പ്രതികൂലമായി ബാധിക്കുമെന്ന് ബിജെപി തിരിച്ചറിഞ്ഞിട്ടുണ്ട്. രജനിയുടെ പരോക്ഷമായ പിന്തുണ ഉറപ്പാക്കുന്നത് ചില മണ്ഡലങ്ങളിലെങ്കിലും സ്വാധീനമുണ്ടാക്കുമെന്നാണ് വിലയിരുത്തപ്പെടുന്നത്.