'സൈനിക സംഘര്ഷം ഒരു പ്രശ്നത്തിനും പരിഹാരമല്ല'; ഒടുവില് പ്രതികരിച്ച് പ്രധാനമന്ത്രി
ന്യൂഡല്ഹി: ഇറാന്-യുഎസ് സംഘര്ഷത്തില് പ്രതികരിച്ച് പ്രധാനമന്ത്രി നരേന്ദ്ര മോദി. നിയമവാഴ്ച, സംഭാഷണം, നയതന്ത്രം എന്നിവയിലാണ് ഇന്ത്യ വിശ്വസിക്കുന്നത് എന്നും സൈനിക സംഘര്ഷം ഒരു പ്രശ്നത്തിനും പരിഹാരമല്ലെന്നും മോദി പറഞ്ഞു. പശ്ചിമേഷ്യയുടെ ഭൂരിഭാഗത്തെയും ബാധിച്ച മാരകമായ യുഎസ്-ഇറാന് സംഘര്ഷത്തിനിടയിലാണ് പ്രധാനമന്ത്രിയുടെ പരാമര്ശം.
ഫിന്ലാന്ഡ് പ്രസിഡന്റുമൊത്തുള്ള സംയുക്ത പത്രസമ്മേളനത്തിലാണ് പ്രധാനമന്ത്രി മോദി ഇക്കാര്യം പറഞ്ഞത്. 'ഇന്ത്യയും ഫിന്ലന്ഡും നിയമവാഴ്ചയിലും സംഭാഷണത്തിലും നയതന്ത്രത്തിലും വിശ്വസിക്കുന്നു. സൈനിക സംഘര്ഷം കൊണ്ട് മാത്രം ഒരു പ്രശ്നവും പരിഹരിക്കാന് കഴിയില്ല, അത് ഉക്രെയ്നായാലും പശ്ചിമേഷ്യയായാലും. ആഗോള സ്ഥാപനങ്ങള്ക്ക് അടിയന്തര പരിഷ്കരണം ആവശ്യമാണെന്ന് ഞങ്ങള് രണ്ടുപേര്ക്കും ബോധ്യമുണ്ട്,' പ്രധാനമന്ത്രി പറഞ്ഞു.
കഴിഞ്ഞ വാരാന്ത്യത്തില് ഇറാനില് അമേരിക്കയും ഇസ്രായേലും നടത്തിയ ആക്രമണങ്ങളാണ് മിഡില് ഈസ്റ്റ് മേഖലയെ മുഴുവന് പിടിച്ചുകുലുക്കിയ തീവ്രമായ മിസൈല്, ഡ്രോണ് ആക്രമണത്തിന് കാരണമായത്. ഈ ആക്രമണത്തിനിടെയാണ് ഇറാന്റെ പരമോന്നത നേതാവായ ആയത്തുള്ള അലി ഖാംനഇ കൊല്ലപ്പെട്ടത്. ഇതോടെ സംഘര്ഷം തീവ്രമായ തലത്തിലേക്ക് വ്യാപിച്ചു.
ഏറ്റവും ഒടുവില്, ബുധനാഴ്ച ഇന്ത്യയുടെ അയല്രാജ്യമായ ശ്രീലങ്കയുടെ തീരത്ത് വെച്ച് ഒരു ഇറാനിയന് നാവിക കപ്പലായ ഐറിസ് ദേന ഒരു മിസൈല് ആക്രമണത്തില് തകര്ന്നു. ഇറാന് നാവിക കപ്പലിന് നേരെയുണ്ടായ ആക്രമണത്തില് അതിലുണ്ടായിരുന്ന 80 ലേറെ ആളുകള് കൊല്ലപ്പെട്ടു. ഈ നാവിക കപ്പല് ഇന്ത്യയുടെ സൈനികാഭ്യാസ അതിഥിയാണെന്ന് ഇറാന് അധികൃതര് പറഞ്ഞു.
എന്നാല് കപ്പലും അതിലെ ജീവനക്കാരും ഫെബ്രുവരി 16 മുതല് 25 വരെ മാത്രമാണ് ഇന്ത്യന് അതിഥികളെന്ന് സര്ക്കാര് വൃത്തങ്ങള് പറഞ്ഞു. കൂടാതെ, അതിനുശേഷം കപ്പല് ഇന്ത്യയില് നിന്ന് ഒരു സഹായവും തേടിയിട്ടില്ല എന്നും സര്ക്കാര് വ്യക്തമാക്കി. ഫെബ്രുവരി 16 മുതല് ഫെബ്രുവരി 25 വരെ വിശാഖപട്ടണത്ത് നടന്ന ഇന്റര്നാഷണല് ഫ്ലീറ്റ് റിവ്യൂവില് ഐറിസ് ദേന പങ്കെടുത്തിരുന്നു.
ഫെബ്രുവരി 28 നാണ് ഇറാനെതിരായ യുഎസ്-ഇസ്രായേല് ആക്രമണം നടന്നത്. അതേസമയം ലാകം ഇപ്പോള് അസ്ഥിരതയുടെയും അനിശ്ചിതത്വത്തിന്റെയും ഒരു കാലഘട്ടത്തിലൂടെയാണ് കടന്നുപോകുന്നത് എന്ന് ഫിന്ലാന്ഡ് പ്രസിഡന്റ് അലക്സാണ്ടര് സ്റ്റബ്ബിനൊപ്പം നടത്തിയ സംയുക്ത പത്രക്കുറിപ്പില് പ്രധാനമന്ത്രി നരേന്ദ്ര മോദി പറഞ്ഞു. ഉക്രെയ്ന് മുതല് പശ്ചിമേഷ്യ വരെ ലോകത്തിന്റെ പല ഭാഗങ്ങളിലും സംഘര്ഷം നിലനില്ക്കുന്നു.
അത്തരമൊരു ആഗോള അന്തരീക്ഷത്തില്, ലോകത്തിലെ രണ്ട് പ്രധാന നയതന്ത്ര ശക്തികളായ ഇന്ത്യയും യൂറോപ്പും അവരുടെ ബന്ധത്തിന്റെ സുവര്ണ കാലഘട്ടത്തിലേക്ക് പ്രവേശിക്കുകയാണ് എന്നും അദ്ദേഹം പറഞ്ഞു. 'നമ്മുടെ വളര്ന്നുവരുന്ന സഹകരണം ആഗോള സ്ഥിരത, വികസനം, പങ്കിട്ട സമൃദ്ധി എന്നിവയ്ക്ക് പുതിയ ശക്തി നല്കുന്നു,' പ്രധാനമന്ത്രി കൂട്ടിച്ചേര്ത്തു.
ചരിത്രപരമായ ഇന്ത്യ-യൂറോപ്യന് യൂണിയന് സ്വതന്ത്ര വ്യാപാര കരാര് അടുത്തിടെ ഒപ്പുവച്ചതായി അദ്ദേഹം എടുത്തുപറഞ്ഞു, ഈ കരാര് ഇന്ത്യയും ഫിന്ലന്ഡും തമ്മിലുള്ള വ്യാപാരം, നിക്ഷേപം, സാങ്കേതിക സഹകരണം എന്നിവയെ കൂടുതല് ശക്തിപ്പെടുത്തുമെന്ന് പറഞ്ഞു. ഡിജിറ്റല് സാങ്കേതികവിദ്യ, അടിസ്ഥാന സൗകര്യങ്ങള്, സുസ്ഥിരത തുടങ്ങിയ മേഖലകളില് ഇന്ത്യയും ഫിന്ലന്ഡും പ്രധാന പങ്കാളികളാണ്.
Click it and Unblock the Notifications
Sign in with Google