ദേശീയ അവാര്ഡില് മലയാളി തിളക്കം, കീര്ത്തി സുരേഷ് മികച്ച നടി, എംജെ രാധാകൃഷ്ണനും പുരസ്കാരം
ദില്ലി: 66ാമത് ദേശീയ പുരസ്കാരങ്ങളില് മലയാളം തിളക്കം. വിവിധ ഭാഷകളിലായി അവാര്ഡിന്റെ തിളക്കമാണ് മലയാള താരങ്ങള് സ്വന്തമാക്കി. കീര്ത്തി സുരേഷ് തെലുങ്കില് മഹാനടി എന്ന ചിത്രത്തിലൂടെ മികച്ച നടിയായി. ദക്ഷിണേന്ത്യയിലെ എക്കാലത്തെയും മികച്ച നടിയായിരുന്ന സാവിത്രിയുടെ ജീവിതകഥ പറഞ്ഞ ചിത്രമാണ് മഹാനടി. അതേസമയം സുഡാനി ഫ്രൈം നൈജീരിയയാണ് മികച്ച മലയാളം ചിത്രം.
അതേസമയം ജോസഫിലെ അഭിനയത്തിന് ജോജു ജോര്ജിന് മികച്ച നടനുള്ള പ്രത്യേക പരാമര്ശം ലഭിച്ചു. ആയുഷ്മാന് ഖുറാനയും വിക്കി കൗശലുമാണ് മികച്ച നടന്മാര്. ഉറി, ദ സര്ജിക്കല് സ്ട്രൈക്കിലെ അഭിനയത്തിനാണ് വിക്കി കൗശലിനാണ് പുരസ്കാരം ലഭിച്ചത്. അന്ധാധൂനിലെ അഭിനയത്തിനാണ് ആയുഷ്മാന് ഖുറാനയ്ക്ക് പുരസ്കാരം ലഭിച്ചത്. അതേസമയം അന്തരിച്ച എംജെ രാധാകൃഷ്ണനാണ് മികച്ച ഛായാഗ്രഹകന്. ഷാജി എന് കരുണ് സംവിധാനം ചെയ്ത ഓള് എന്ന ചിത്രത്തിനാണ് പുരസ്കാരം ലഭിച്ചത്.
മികച്ച സംവിധായകന് ഉറി സംവിധാനം ചെയ്ത ആദിത്യ ധറാണ്. പ്രേക്ഷക ശ്രദ്ധ നേടിയ ചിത്രത്തിനുള്ള പുരസ്കാരം ബദായി ഹോ നേടി. മികച്ച എന്റര്ടെയ്നര് എന്ന ലേബലിലാണ് ഈ പുരസ്കാരം നല്കുന്നത്. മികച്ച ആക്ഷന് പുരസ്കാരം കന്നഡ ചിത്രം കെജിഎഫിനാണ്. മികച്ച നൃത്തസംവിധാനം പദ്മാവതിനാണ്. സ്പെഷ്യല് ഇഫക്ട്സ് അവാര്ഡ് എവ്, കെജിഎഫ് എന്നിവര് പങ്കിട്ടു.
മികച്ച പ്രൊഡക്ഷന് ഡിസൈനിനുള്ള പുരസ്കാരം കമ്മാരസംഭവം സ്വന്തമാക്കി. രതീഷ് അംബാട്ട് സംവിധാനം ചെയ്ത മലയാള ചിത്രമാണിത്. മികച്ച തിരക്കഥയ്ക്കുള്ള പുരസ്കാരം അന്ധാനധൂനിന് ലഭിച്ചു. മലയാളിയായ ശ്രുതി ഹരിഹരനും പ്രത്യേക പരാമര്ശം സ്വന്തമാക്കിയിട്ടുണ്ട്. നേരത്തെ സുഡാനി ഫ്രം നൈജീരിയ സംസ്ഥാന അവാര്ഡിലും മുന്നിലെത്തിയിരുന്നു.