വെറുതെ കളയല്ലേ പണം; ലക്ഷങ്ങൾ പലിശ കിട്ടുന്ന പോസ്റ്റ് ഓഫീസിന്റെ ഈ സ്കീം എന്താണെന്ന് അറിയാം

സുരക്ഷിതവും ഉറപ്പുള്ളതുമായ മികച്ചൊരു നിക്ഷേപ മാർഗ്ഗം തിരയുന്നവർക്ക് എപ്പോഴും തിരഞ്ഞെടുക്കാവുന്ന ഒന്നാണ് പോസ്റ്റ് ഓഫീസിന്റെ നാഷണൽ സേവിംഗ്സ് സർട്ടിഫിക്കറ്റ് (NSC). കേന്ദ്ര സർക്കാർ പിന്തുണയുള്ള പദ്ധതിയായതിനാൽ തന്നെ ഇതിൽ യാതൊരുവിധ സാമ്പത്തിക നഷ്ടസാധ്യതയുമില്ല. ഓഹരി വിപണിയിലെ അസ്ഥിരതകളെ ഭയക്കാതെ, മികച്ച പലിശ നിരക്കിൽ പണം വളർത്താൻ ആഗ്രഹിക്കുന്ന സാധാരണക്കാർക്ക് ഏറ്റവും അനുയോജ്യമായ ദീർഘകാല നിക്ഷേപമാണിത്.

1 ലക്ഷം രൂപ നിക്ഷേപിച്ചാൽ 5 വർഷത്തിന് ശേഷം എത്ര ലഭിക്കും?

നിലവിൽ നാഷണൽ സേവിംഗ്സ് സർട്ടിഫിക്കറ്റിന് 7.7% പലിശ നിരക്കാണ് ലഭിക്കുന്നത്. പല പ്രമുഖ ബാങ്കുകളുടെയും 5 വർഷത്തെ ഫിക്സഡ് ഡിപ്പോസിറ്റ് (FD) പലിശ നിരക്കുകളേക്കാൾ ഉയർന്നതാണിത്. നിങ്ങൾ ഈ പദ്ധതിയിൽ 1 ലക്ഷം രൂപ നിക്ഷേപിക്കുകയാണെങ്കിൽ, 5 വർഷത്തെ കാലാവധി പൂർത്തിയാകുമ്പോൾ നിങ്ങൾക്ക് ലഭിക്കുന്ന മെച്യൂരിറ്റി തുക എത്രയെന്ന് അറിയാം.

ആകെ നിക്ഷേപ തുക: ₹1,00,000

നിലവിലെ പലിശ നിരക്ക്: 7.7% പ്രതിവർഷം

കാലാവധി: 5 വർഷം

ആകെ ലഭിക്കുന്ന പലിശ: ₹44,903

ആകെ മെച്യൂരിറ്റി തുക: ₹1,44,903

എൻ.എസ്.സി-യുടെ ഏറ്റവും വലിയ പ്രത്യേകത, ഇതിന്റെ പലിശ വാർഷികാടിസ്ഥാനത്തിൽ കൂട്ടുപലിശയായി കണക്കാക്കുമെങ്കിലും, ഈ തുക കാലാവധി പൂർത്തിയാകുമ്പോൾ മാത്രമേ കൈപ്പറ്റാൻ സാധിക്കുകയുള്ളൂ. നിക്ഷേപിക്കുന്ന സമയത്തുള്ള പലിശ നിരക്ക് 5 വർഷത്തേക്കും ലോക്ക് ചെയ്യപ്പെടുന്നതിനാൽ, ഭാവിയിൽ വിപണിയിൽ പലിശ നിരക്കുകളിൽ എന്ത് മാറ്റമുണ്ടായാലും നിങ്ങളുടെ മെച്യൂരിറ്റി തുകയെ അത് ബാധിക്കില്ല.

നിക്ഷേപവും നികുതി ആനുകൂല്യങ്ങളും

നിക്ഷേപകർക്ക് ആദായനികുതി ഇളവ് ലഭിക്കുമെന്നത് എൻ.എസ്.സി-യുടെ മറ്റൊരു ആകർഷണീയതയാണ്. ആദായനികുതി നിയമത്തിലെ സെക്ഷൻ 80C പ്രകാരം ഒരു സാമ്പത്തിക വർഷം പരമാവധി 1.5 ലക്ഷം രൂപ വരെയുള്ള നിക്ഷേപങ്ങൾക്ക് നികുതി ഇളവ് ക്ലെയിം ചെയ്യാം. എന്നാൽ ഈ ആനുകൂല്യം പഴയ നികുതി ഘടന തിരഞ്ഞെടുക്കുന്നവർക്ക് മാത്രമാണ് ലഭ്യമാകുക. പുതിയ നികുതി ഘടന പിന്തുടരുന്നവർക്ക് ഈ ഇളവ് ലഭിക്കില്ല.

അക്കൗണ്ട് കൈമാറ്റം ചെയ്യാനുള്ള നിയമങ്ങൾ

ചില പ്രത്യേക സാഹചര്യങ്ങളിൽ എൻ.എസ്.സി അക്കൗണ്ട് മറ്റൊരു വ്യക്തിയുടെ പേരിലേക്ക് മാറ്റാൻ നിയമം അനുവദിക്കുന്നുണ്ട്.

മരണം സംഭവിച്ചാൽ: അക്കൗണ്ട് ഉടമ മരണപ്പെട്ടാൽ (അല്ലെങ്കിൽ ജോയിന്റ് അക്കൗണ്ടിലെ എല്ലാവരും മരണപ്പെട്ടാൽ) നിക്ഷേപ തുക നിയമപരമായ അവകാശികൾക്കോ നോമിനിക്കോ മാറ്റാം.

കോടതി ഉത്തരവ്: കോടതിയുടെ പ്രത്യേക ഉത്തരവ് ഉണ്ടെങ്കിൽ അക്കൗണ്ട് കൈമാറാം.

പണയം വെക്കൽ: ലോണുകൾക്കായി ഔദ്യോഗിക സ്ഥാപനങ്ങളിൽ അക്കൗണ്ട് പണയം വെക്കുന്ന സാഹചര്യത്തിൽ.

ജോയിന്റ് അക്കൗണ്ട്: ജോയിന്റ് അക്കൗണ്ടിലുള്ള ഒരാൾ മരണപ്പെട്ടാൽ അവശേഷിക്കുന്ന ആളുടെ പേരിലേക്ക് അക്കൗണ്ട് മാറ്റാം.

കാലാവധിക്ക് മുൻപ് അക്കൗണ്ട് ക്ലോസ് ചെയ്യൽ

സാധാരണ ഗതിയിൽ 5 വർഷത്തെ കാലാവധിക്ക് മുൻപ് NSC അക്കൗണ്ട് ക്ലോസ് ചെയ്യാൻ സാധിക്കില്ല. എന്നാൽ താഴെ പറയുന്ന അടിയന്തര സാഹചര്യങ്ങളിൽ ഇതിന് അനുവാദമുണ്ട്.

*അക്കൗണ്ട് ഉടമയുടെ മരണം.

*അംഗീകൃത ഗസറ്റഡ് ഓഫീസർ മുൻപാകെയുള്ള പണയ തുക കണ്ടുകെട്ടൽ

*കോടതിയുടെ ഉത്തരവ് ഉണ്ടായാൽ.

കാലാവധിക്ക് മുൻപ് പിൻവലിക്കുമ്പോൾ ലഭിക്കുന്ന പലിശ

1 വർഷത്തിനുള്ളിൽ: അക്കൗണ്ട് തുടങ്ങി ഒരു വർഷത്തിനുള്ളിലാണ് ക്ലോസ് ചെയ്യുന്നതെങ്കിൽ പലിശ ഒന്നും തന്നെ ലഭിക്കില്ല. നിക്ഷേപിച്ച അസ്സൽ തുക മാത്രമേ തിരികെ കിട്ടൂ.

1 വർഷത്തിന് ശേഷം 3 വർഷത്തിനുള്ളിൽ: ഈ സമയത്താണ് ക്ലോസ് ചെയ്യുന്നതെങ്കിൽ, അസ്സൽ തുകയോടൊപ്പം പോസ്റ്റ് ഓഫീസ് സേവിംഗ്സ് അക്കൗണ്ടിന് ബാധകമായ പലിശ നിരക്ക് മാത്രമായിരിക്കും ലഭിക്കുക.

3 വർഷത്തിന് ശേഷം: മൂന്ന് വർഷം പൂർത്തിയായ ശേഷം ക്ലോസ് ചെയ്യുകയാണെങ്കിൽ, പദ്ധതിയുടെ നിയമപ്രകാരം ആ തീയതി വരെ ലഭിക്കേണ്ട കൃത്യമായ പലിശ സഹിതം തുക തിരികെ ലഭിക്കും.