'പ്ലേറ്റും സ്പൂണുമായി വരിക'; നീറ്റ് ക്രമക്കേടിനെതിരെ ദില്ലിയിൽ ഇന്ന് സിജെപിയുടെ 'പാത്രം കൊട്ടൽ' സമരം

വൻ വിവാദമായ നീറ്റ് പരീക്ഷാ ക്രമക്കേടിനെതിരെയുള്ള ജനകീയ പ്രക്ഷോഭങ്ങൾ കൂടുതൽ ശക്തമാകുന്നു. ക്രമക്കേടുകളിൽ പ്രതിഷേധിച്ച് കോക്രോച്ച് ജനത പാർട്ടി സംഘടിപ്പിക്കുന്ന രണ്ടാം ഘട്ട പ്രക്ഷോഭം ഇന്ന് ദില്ലിയിലെ ജന്തർ മന്തറിൽ നടക്കും. കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജി വെക്കാൻ തയ്യാറാകാത്ത സാഹചര്യത്തിലാണ് സിജെപിയുടെ നേതൃത്വത്തിൽ തലസ്ഥാനത്ത് വീണ്ടും പ്രതിഷേധം കടുപ്പിക്കുന്നത്. ആദ്യഘട്ട സമരം കഴിഞ്ഞ് രണ്ടാഴ്ചയ്ക്ക് ശേഷമാണ് ജന്തർ മന്തറിൽ രണ്ടാമത്തെ പ്രതിഷേധം സംഘടിപ്പിക്കുന്നത്. ഈ പ്രക്ഷോഭത്തിനായി ദില്ലി പൊലീസിന്റെ ഔദ്യോഗിക അനുമതി ലഭിച്ചതായി പാർട്ടി ഭാരവാഹികൾ വ്യക്തമാക്കിയിട്ടുണ്ട്.

ഇന്ന് ഉച്ചയ്ക്ക് കൃത്യം ഒരു മണിക്ക് ആരംഭിക്കുന്ന പ്രതിഷേധ പരിപാടിയിൽ വേറിട്ട ഒരു സമരരീതിയാണ് സിജെപി പ്രഖ്യാപിച്ചിരിക്കുന്നത്. സമരത്തിൽ പങ്കെടുക്കാൻ എത്തുന്നവർ കയ്യിൽ ഒരു പ്ലേറ്റും സ്പൂണും കരുതണമെന്ന് സിജെപി സ്ഥാപകൻ അഭിജീത് ദിപ്കെ സാമൂഹിക മാധ്യമങ്ങളിലൂടെ ആവശ്യപ്പെട്ടു.

പാത്രം കൊട്ടിയുള്ള പരിഹാസ സമരം

പ്രതിഷേധത്തിൽ പങ്കെടുക്കുന്ന എല്ലാവരും പ്ലേറ്റും സ്പൂണുമായി വരണമെന്നും 'ബാക്കി കഥ എല്ലാവർക്കും അറിയാമെന്നും' അഭിജീത് ദിപ്കെ പങ്കുവെച്ച വീഡിയോയിൽ പറയുന്നുണ്ട്. മുൻപ് കൊവിഡ് മഹാമാരിയുടെ സമയത്ത് രാജ്യത്തെ കോവിഡ് മുൻനിര പോരാളികൾക്ക് ആദരവും നന്ദിയും അറിയിക്കാൻ ജനങ്ങളോട് ബാൽക്കണികളിൽ നിന്ന് പാത്രങ്ങൾ കൊട്ടാൻ പ്രധാനമന്ത്രി നരേന്ദ്ര മോദി ആഹ്വാനം ചെയ്തിരുന്നു. കേന്ദ്ര സർക്കാരിന്റെ അന്നത്തെ ആ നീക്കത്തെ പരിഹസിച്ചുകൊണ്ടാണ് നീറ്റ് പരീക്ഷാ വിഷയത്തിൽ പാത്രങ്ങൾ കൊട്ടിയുള്ള ഈ പുതിയ പ്രതിഷേധത്തിന് പാർട്ടി ആഹ്വാനം നൽകിയിരിക്കുന്നത്. മുൻപും പല ജനകീയ വിഷയങ്ങളിലും ഇത്തരത്തിൽ പാത്രങ്ങൾ കൊട്ടിയുള്ള പ്രതിഷേധ രീതികൾ രാജ്യത്ത് ശ്രദ്ധ നേടിയിട്ടുണ്ട്.

നാളെ പുനഃപരീക്ഷ

ഒരു വശത്ത് രാജ്യവ്യാപകമായി പ്രതിഷേധങ്ങൾ കത്തുമ്പോൾ, മറുഭാഗത്ത് നാളെ (ഞായറാഴ്ച) നീറ്റ് പുനഃപരീക്ഷ നടത്താനുള്ള ഒരുക്കങ്ങളിലാണ് അധികൃതർ. മെയ് 3-ന് നടന്ന പരീക്ഷയിൽ 22 ലക്ഷത്തിലധികം വിദ്യാർത്ഥികളാണ് പങ്കെടുത്തത്. എന്നാൽ ചോദ്യപ്പേപ്പർ ചോർച്ചയും മറ്റ് ക്രമക്കേടുകളും പുറത്തുവന്നതോടെ പരീക്ഷാ ഫലം വലിയ തർക്കങ്ങൾക്ക് വഴിവെക്കുകയും തുടർന്ന് പരീക്ഷ റദ്ദാക്കാൻ അധികൃതർ നിർബന്ധിതരാവുകയുമായിരുന്നു.

പരീക്ഷാ നടത്തിപ്പിൽ മുൻപ് സംഭവിച്ച ഗുരുതരമായ വീഴ്ചകളും സുരക്ഷാ പിഴവുകളും പൂർണ്ണമായി ഒഴിവാക്കാനും സുതാര്യത ഉറപ്പാക്കാനുമുള്ള കടുത്ത സമ്മർദ്ദത്തിലാണ് നാഷണൽ ടെസ്റ്റിംഗ് ഏജൻസി. ഇതിന്റെ ഭാഗമായി, ഞായറാഴ്ച നടക്കുന്ന നീറ്റ് യുജി പുനഃപരീക്ഷയ്ക്ക് മുന്നോടിയായി നാഷണൽ ടെസ്റ്റിംഗ് ഏജൻസി ഇന്ന് രാജ്യവ്യാപകമായി മോക്ക് ഡ്രിൽ നടത്താൻ തീരുമാനിച്ചിട്ടുണ്ട്. പരീക്ഷാ കേന്ദ്രങ്ങളിലെ സുരക്ഷാ ക്രമീകരണങ്ങളും സാങ്കേതിക സംവിധാനങ്ങളും കൃത്യമാണെന്ന് ഉറപ്പുവരുത്താനാണ് പരീക്ഷയ്ക്ക് തൊട്ടുമുൻപുള്ള ദിവസം എൻടിഎ ഈ സുപ്രധാന നടപടി സ്വീകരിച്ചിരിക്കുന്നത്.