ഒടുവില് മാഗി തിരിച്ചെത്തി... ഇതാ 2 മിനിട്ട് നൂഡില്സ് വിപണിയില്
ദില്ലി: ഇനി വീണ്ടും രണ്ട് മിനിട്ടുകൊണ്ട് നൂഡില്സ് ഉണ്ടാക്കി കഴിയ്ക്കാം. നൂഡില്സ് എന്ന് കേള്ക്കുമ്പോള് മനസ്സിലേയ്ക്ക് ഓടിയെത്തുന്ന 'മാഗി' തന്നെ ഇനി ഇന്ത്യക്കാര്ക്ക് ധൈര്യമായി കഴിയ്ക്കാം.
മാസങ്ങള് നീണ്ട നിരോധനത്തിന് ശേഷം മാഗി നൂഡില്സ് വീണ്ടും വിപണിയില് എത്തിക്കഴിഞ്ഞിരിയ്ക്കുന്നു. രാജ്യത്തെ അംഗീകൃത ലാബുകളില് നിന്ന് അനുകൂല പരിശോധന ഫലങ്ങള് ലഭിച്ചതിനെ തുടര്ന്നാണിത്.
അനുവദനീയമായതിലും അധികം അളവില് ഈയവും എംഎസ്ജിയും കണ്ടെത്തിയതിനെ തുടര്ന്ന് അഞ്ച് മാസം മുമ്പാണ് മാഗി നൂഡില്സിന് വിലക്ക് വീണത്. പിന്നീട് ചില സംസ്ഥാനങ്ങളില് വിലക്ക് പിന്വലിച്ചെങ്കിലും ഭൂരിഭാഗം സംസ്ഥാനങ്ങളും അതിന് തയ്യാറായിരുന്നില്ല.
കഴിഞ്ഞ മാസം മുതലേ മാഗിയുടെ ഉത്പാദനം കമ്പനി പുനരാരംഭിച്ചിരുന്നു. സര്ക്കാര് അനുമതിയോടെ തന്നെ ആയിരുന്നു ഇത്. ഇതില് നിന്നുള്ള സാമ്പിളുകള്ക്ക് കൂടി ലാബുകളുടെ അംഗീകാരം കിട്ടിയതിന് ശേഷമാണ് ഇപ്പോള് വിപണിയില് തിരിച്ചെത്തിയിരിയ്ക്കുന്നത്.
തങ്ങളുടെ തിരിച്ച് വരവ് മാഗി ഗംഭീരമാക്കിയിട്ടും ഉണ്ട്. ഓണ്ലൈന് വില്പന ഭീമന്മാരായ സ്നാപ് ഡീലുമായി കൈകോര്ത്താണ് രംഗപ്രവേശനം. ഇനി ഉപഭോക്താക്കള്ക്ക് ഓണ്ലൈന് വഴിയും മാഗി നൂഡില്സ് വാങ്ങിയ്ക്കാം.