മാഗി രാജ്യത്തെ എല്ലാ ഫാക്ടറികളില് നിന്നും ഉത്പാദനം ആരംഭിച്ചു
ഉധംസിങ് നഗര്; ആരോഗ്യത്തിന് ഹാനികരമാകുന്ന വസ്തുക്കള് കണ്ടെത്തിയതിനെ തുടര്ന്ന് നിരോധിക്കപ്പെട്ട മാഗി നൂഡില്സ് രാജ്യത്തെ എല്ലാ ഫാക്ടറികളില് നിന്നും ഉത്പാദനം പുന:രാരംഭിച്ചതായി അറിയിച്ചു. ഇന്ത്യയില് അഞ്ചു ഫാക്ടറികളില് നിന്നായാണ് മാഗി ഉത്പാദിപ്പിക്കുന്നത്. നേരത്തെ ഭാഗീകമായി ഉത്പാദനം തുടങ്ങിയിരുന്നു.
നഞ്ജന്ഗോഡ്(കര്ണാടക), മോഗ(പഞ്ചാബ്), ബിചോലിം(ഗോവ), ഹിമാചല് പ്രദേശിലെ തഹിവാല്, പന്ത്നഗര് എന്നിവിടങ്ങില് നിന്നായാണ് മാഗി ഉത്പാദിപ്പിക്കുന്നത്. സ്വിസ്സ് കമ്പനിയായ നെസ്ലെയുടെ മാഗി നൂഡില്സ് ഇന്ത്യയില് ജൂണില് നിരോധിച്ച് അഞ്ചുമാസത്തിനുശേഷം നവംബര് 9 നാണ് വീണ്ടും വിപണിയിലെത്തിയത്.
അനുവദനീയമായതിലും അധികം ലെഡ് കണ്ടെത്തിയതിനെ തുടര്ന്നായിരുന്നു നിരോധനം. ഇതേ തുടര്ന്ന് 450 കോടി രൂപയുടെ 30,000 ടണ് മാഗി ഉത്പന്നങ്ങള് കമ്പനിക്ക് നശിപ്പിക്കേണ്ടിവന്നു. ജൂണില് മാഗി നിരോധിച്ചശേഷം നിയമനടപടിക്കുശേഷമായിരുന്നു മാഗി വീണ്ടും വിപണിയിലേക്ക് തിരിച്ചെത്തിയത്.
മാഗി നിരോധിച്ചതിനെ തുടര്ന്ന് മാഗി ഫാക്ടറിയിലെ ആയിരക്കണക്കിന് ജീവനക്കാര് വഴിയാധാരമായിരുന്നു. റിക്ഷ വലിച്ചും കൂലിപ്പണിയെടുത്തും ജീവിക്കുന്ന ചിലരുടെ വാര്ത്തകള് മാധ്യമങ്ങളില് വലിയ വാര്ത്തയാകുകയും ചെയ്തു. എല്ലാ ഫാക്ടറികളിലും ഉത്പാദനം പുന:രാരംഭിച്ചതോടെ പഴയ ജീവനക്കാര് തിരികെ ജോലിക്കു കയറി. അതേസമയം, മാഗിയുടെ വിലക്ക് നീക്കിയെങ്കിലും അതിനെതിരെ മഹാരാഷ്ട്ര സര്ക്കാര് സുപ്രീംകോടതിയെ സമീപിക്കുമെന്നറിയിച്ചിരുന്നു.