ഹൈദരാബാദ് പ്രതികളെ വെടിവച്ച് കൊന്ന സംഭവം; ദേശീയ മനുഷ്യാവകാശ കമ്മീഷൻ കേസെടുത്തു
ഹൈദരാബാദ്: വെറ്റിനറി ഡോക്ടറെ ക്രൂരമായി പീഡിപ്പിച്ച് കൊലപ്പെടുത്തിയ കേസിലെ പ്രതികളെ പോലീസ് വെടിവെച്ച് കൊലപ്പെടുത്തിയ സംഭവത്തില് സ്വമേധയാ കേസെടുത്ത് ദേശീയ മനുഷ്യാവകാശ കമ്മീഷന്. ഉടന് അന്വേഷണം നടത്തി റിപ്പോര്ട്ട് നല്കാന് മനുഷ്യാവകാശ കമ്മീഷന് കീഴിലെ ഇന്വസ്റ്റിഗേഷന് ഡയറക്ടര് ജനറലിന് കമ്മീഷന് നിര്ദ്ദേശം നല്കി.
എസ്പിയുടെ നേതൃത്വത്തിലുള്ള സംഘം ഉടന് സംഭവ സ്ഥലം സന്ദര്ശിച്ച് റിപ്പോര്ട്ട് നല്കണമെന്നും കമ്മീഷന് നിര്ദ്ദേശിച്ചു. 26 കാരിയായ വെറ്റിനറി ഡോക്ടറെ ബലാത്സംഗം ചെയ്ത് കൊന്ന കേസിലെ നാല് പ്രതികളേയും ഇന്ന് പുലര്ച്ചെയാണ് പോലീസ് വെടിവെയ്ച്ച് കൊന്നത്. തെലങ്കാനയിലെ നാരായണ് പേട്ട് ജില്ലക്കാരായ മുഹമ്മദ് ആരിഫ്, ശിവ, നവീന്, ചെല്ല കേശവലു എന്നിവരെയാണ് പോലീസ് വെടിവെയ്പ്പില് കൊല്ലപ്പെട്ടത്.
തെളിവെടുപ്പിനിടെ പ്രതികള് രക്ഷപ്പെടാന് ശ്രമിക്കവേയായിരുന്നു വെടിവെയ്ക്കേണ്ടി വന്നതെന്നാണ് സൈദരാബാദ് പോലീസ് കമ്മീഷ്ണര് വിസി സജ്ജനാര് വിശദീകരിച്ചത്. പ്രതികൾ വടികളും കല്ലുകളും ഉപയോഗിച്ചു പോലീസിനെ ആക്രമിച്ചവെന്നും ഉദ്യോഗസ്ഥരുടെ ആയുധങ്ങൾ തട്ടിയെടുത്തശേഷം പോലീസിന് നേരെ വെടിയുതിര്ക്കുകയായിരുന്നുവെന്നും സജ്ജനാര് പറഞ്ഞു.