ബിഹാര്‍ മുഖ്യമന്ത്രി നിതീഷ് കുമാര്‍ രാജിവെച്ചു

പട്‌ന: ബിഹാര്‍ മുഖ്യമന്ത്രി നിതീഷ് കുമാര്‍ രാജിവെച്ചു. ലോക്‌സഭ തിരഞ്ഞെടുപ്പിലേറ്റ കനത്ത പരാജയത്തെ തുടര്‍ന്നാണ് രാജി. നാല്‍പത് സീറ്റുകളുള്ള ബിഹാറില്‍ വെറും രണ്ട് സീറ്റുകള്‍ മാത്രമാണ് നിതീഷ് കുമാര്‍ നയിച്ച ജെ ഡി യുവിന് കിട്ടിയത്.

നരേന്ദ്ര മോദി വിഷയത്തില്‍ തെറ്റി എന്‍ ഡി എ വിട്ട നിതീഷ് കുമാറിന് ശക്തമായ തിരിച്ചടി നല്‍കുന്നതായിരുന്നു 2014 ലോക്‌സഭ തിരഞ്ഞെടുപ്പ്. രാം വിലാസ് പാസ്വാന്റെ എല്‍ ജെ പിയുമായി ഒന്നിച്ചാണ് ബി ജെ പി ഇത്തവണ മത്സരിച്ചത്. ബി ജെ പിക്ക് 22 ഉം എല്‍ ജെ പിക്ക് ആറും സീറ്റുകള്‍ കിട്ടിയപ്പോള്‍ നിതീഷ് കുമാറിന് കിട്ടിയത് രണ്ട് സീറ്റുകളാണ്.

കാലാവധി പൂര്‍ത്തിയാക്കാന്‍ ഒന്നര വര്‍ഷം ബാക്കി നില്‍ക്കേയാണ് നിതീഷ് കുമാര്‍ രാജിവെക്കുന്നത്. സര്‍ക്കാര്‍ പിരിച്ചുവിടാനായി നിതീഷ് കുമാര്‍ ഗവര്‍ണറോട് അഭ്യര്‍ഥിച്ചു. 243 അംഗ സഭയില്‍ 115 അംഗങ്ങളുണ്ട് ജെ ഡി യുവിന്. ബിഹാറിലെ ഏറ്റവും വലിയ രണ്ടാമത്തെ കക്ഷിയായ ബി ജെ പിക്ക് 91 സീറ്റുണ്ട്. ആര്‍ ജെ ഡി 22, കോണ്‍ഗ്രസ് നാല് എന്നിങ്ങനെയാണ് മറ്റ് കക്ഷികളുടെ നില.

കോണ്‍ഗ്രസ് - ലാലു പ്രസാദ് സഖ്യവും ബി ജെ പി - ആര്‍ എല്‍ ഡി സഖ്യവും തിരഞ്ഞെടുപ്പിനെ നേരിട്ടപ്പോള്‍ ഒറ്റയ്ക്ക് മത്സരിച്ച ജെ ഡി യു പതറി. മമതാ ബാനര്‍ജി, ജയലളിത, മുലായം തുടങ്ങിയവരുമായി ചേര്‍ന്ന് മുന്നാം മുന്നണി രൂപീകരണം എന്ന സ്വപ്‌നവും ജെ ഡി യുവിന് കിട്ടാക്കനിയായി.

English summary

Nitish Kumar resigns as Bihar CM