അപ്പോള്‍ മോദി ചായവിറ്റിട്ടില്ലേ... തെളിവില്ലെന്ന്!!!

ദില്ലി: ചായ വില്‍പനക്കാരനില്‍ നിന്ന് ഇന്ത്യയുടെ പ്രധാനമന്ത്രി പദത്തിലേക്ക്... നരേന്ദ്ര മോദിയെ കുറിച്ചുള്ള പ്രചാരണം ഇതായിരുന്നു. ഒരു ചായ വില്‍പനക്കാരനെ പോലും ഇന്ത്യയുടെ പ്രധാനമന്ത്രി പദത്തിലെത്തിക്കാന്‍ കഴിഞ്ഞ പാര്‍ട്ടിയാണ് ബിജെപി എന്നായിരുന്നു അവകാശ വാദം.

എന്നാല്‍ നരേന്ദ്ര മോദി ചായ വിറ്റിരുന്നു എന്നത് എന്താണ് തെളിവ്. പഴയ ഫോട്ടോ വല്ലതും കാണിച്ച് തരാമെന്ന് പറഞ്ഞിട്ട് കാര്യമില്ല. ശരിക്കും തെളിവ് വേണം.

എന്നാല്‍ ഔദ്യോഗികമായി അങ്ങനെ ഒരു തെളിവും ഇല്ലെന്നാണ് പറയുന്നത്. വെറുതേ പറയുന്നതല്ല. വിവാരാവകാശ നിയമപ്രകാരം അപേക്ഷിച്ചപ്പോള്‍ കിട്ടിയ മറുപടിയാണ്.

കോണ്‍ഗ്രസ് അനുഭാവിയും സോഷ്യല്‍മീഡിയ ആക്ടിവിസ്റ്റും ആയ തെഹ്‌സീന്‍ പൂനാവല്ല എന്ന ആളാണ് റെയില്‍വേയോട് ഇക്കാര്യം വിവരാവകാശ നിയമപ്രകാരം ചോദിച്ചത്. റെയില്‍വേ സ്‌റ്റേഷനില്‍ ചായവിറ്റുകൊണ്ടായിരുന്നു മോദിയുടെ ജീവിതത്തിന്റെ തുടക്കം എന്നായിരുന്നല്ലോ പ്രചാരണങ്ങള്‍.

അങ്ങനെയെങ്കില്‍ റെയില്‍വേയുടെ കയ്യില്‍ ഇത് സംബന്ധിച്ച് എന്തെങ്കിലും രേഖകള്‍ ഉണ്ടാകേണ്ടതല്ലേ... രജിസ്‌ട്രേഷന്‍ നമ്പറോ, പാസ് അനുവദിച്ചതിന്റെ രേഖയോ, അങ്ങനെ എന്തെങ്കിലും! എന്നാല്‍ അങ്ങനെ ഒരു രേഖയും റെയില്‍വേയുടെ കയ്യിലില്ലെന്നാണ് മറുപടി കിട്ടിയിരിക്കുന്നത്.

ഇനിയിപ്പോള്‍ മോദി ആരാധകര്‍ എന്ത് ചെയ്യും എന്നാണ് ചോദ്യം. തിരഞ്ഞെടുപ്പ് കാലത്ത് മോദി ചായയും, ചായക്കട വര്‍ത്തമാനവും ഒക്കെ തുടങ്ങുകയും ആഘോഷിക്കുകയും ചെയ്തവരായിരുന്നു അവര്‍.

English summary

No official record of Modi being tea seller: RTI