സൗദിയില്‍ പോയി പന്നിയിറച്ചി തിന്നാല്‍ ധൈര്യമുണ്ടോ... വിഎച്ച്പിയുടെ വെല്ലുവിളി

ലഖ്‌നൗ: ബീഫ് വിവാദം കൊടുമ്പിരിക്കൊണ്ടിരിയ്ക്കുകയാണല്ലോ... അതിനിടെയാണ് കേന്ദ്ര സര്‍ക്കാരിന്റെ വര്‍ഗ്ഗീയ നിലപാടുകളില്‍ പ്രതിഷേധിച്ച് എഴുത്തുകാര്‍ വരിവരിയായി പുരസ്‌കാരങ്ങള്‍ തിരിച്ചേല്‍പിയ്ക്കുന്നത്.

എഴുത്തുകാരുടെ പ്രതിഷേധം ഇങ്ങനെ തുടര്‍ന്നാല്‍ വിശ്വഹിന്ദു പരിഷത്ത് പോലെയുള്ള സംഘടനകള്‍ക്ക് മിണ്ടാതിരിയ്ക്കാന്‍ പറ്റുമോ? ഉടന്‍ വന്നു ചോദ്യം... സൗദി അറേബ്യയില്‍ ചെന്ന് പന്നിയിറച്ച് കഴിയ്ക്കാന്‍ നിങ്ങള്‍ക്ക് ധൈര്യമുണ്ടോ എന്നാണ് ചോദ്യം.

വിശ്വഹിന്ദു പരിഷത്തിന്റെ ദേശീയ വക്താവ് സുരേന്ദ്ര ജെയിനാണ് ഇങ്ങനെ ഒരു വെല്ലുവിളി നടത്തിയിരിയ്ക്കുന്നത്. വെല്ലുവിളി മാത്രമല്ല കെട്ടോ....

സൗദിയില്‍ പന്നിയിറച്ചി

മുസ്ലീങ്ങള്‍ക്ക് പന്നി 'ഹറാം' ആണ്. ശരിയത്ത് നിയമം നടപ്പിലാക്കുന്ന സൗദി അറേബ്യയില്‍ അതുകൊണ്ട് പന്നിയിറച്ചിയ്ക്ക് നിരോധനവും ഉണ്ട്.

സൗദിയില്‍ ചെന്ന് പന്നി തിന്നാമോ

കേന്ദ്ര സര്‍ക്കാരിനെതിരെ പ്രതിഷേധിയ്ക്കുന്ന സാഹിത്യകാര്‍ക്ക് സൗദി അറേബ്യയില്‍ പോയി പന്നിയിറച്ചി കഴിയ്ക്കാനുള്ള ധൈര്യമുണ്ടോ എന്നാണ് വിഎച്ച്പി നേതവ് സുരേന്ദ്ര ജെയിന്റെ ചോദ്യം.

ജീവനോടെ തിരിച്ചുവന്നാല്‍

ഇനി അങ്ങനെ ആര്‍ക്കെങ്കിലും ധൈര്യം ഉണ്ടെന്ന് വയ്ക്കുക. അവര്‍ പോയി ജീവനോടെ തിരിച്ചെത്തിയാല്‍ അവരെ സ്വീകരിയ്ക്കാന്‍ താന്‍ മുന്നിലുണ്ടാകും എന്നാണ് ഇദ്ദേഹം പറയുന്നത്.

അല്ലെങ്കില്‍ നിര്‍ത്തണം

സൗദിയില്‍ പോയി പന്നിയിറച്ചി കഴിയ്ക്കാനുള്ള ധൈര്യമില്ലെങ്കില്‍ ഇപ്പോള്‍ നടത്തിക്കൊണ്ടിരിയ്ക്കുന്ന ഇരട്ടത്താപ്പ് നടപടികള്‍ നിര്‍ത്തണം എന്നും എഴുത്തുകാരോട് ഇദ്ദേഹം ആവശ്യപ്പെടുന്നു.

ഇറച്ചിയ്‌ക്കെതിരല്ല

ഇന്ത്യയിലെ മൂന്നില്‍ രണ്ട് വിഭാഗം ജനങ്ങളും മാംസാഹാരം കഴിയ്ക്കുന്നവരാണെന്ന് വിഎച്ച്പിയ്ക്കും സംഘപരിവാറിനും അറിയാമെന്നാണ് ഇദ്ദേഹം പറയുന്നത്. അതുകൊണ്ട് തങ്ങള്‍ മാംസാഹാരത്തിന് എതിരല്ല. പിന്നെ...?

ഗോമാതാവിനെ കൊല്ലരുത്

നിങ്ങള്‍ മറ്റ് മാംസം കഴിച്ചോളൂ... പക്ഷേ ഗോമാതവിനെ കൊല്ലരുത്. ഹിന്ദുവിശ്വാസത്തിന്റെ കേന്ദ്രമാണ് പശു. ഹിന്ദുക്കളുടെ വികാരത്തെ വ്രണപ്പെടുത്തരുത്.

സമ്പൂര്‍ണ നിരോധനം

രാജ്യത്ത് സമ്പൂര്‍ണ ഗോവധ നിരോധനമാണ് തങ്ങള്‍ ആവശ്യപ്പെടുന്നതെന്നും സുരേന്ദ്ര ജെയിന്‍ പറഞ്ഞു.

ഇന്ത്യ ജനാധിപത്യ രാജ്യമല്ലേ...

സുരേന്ദ്ര ജെയിന്റെ വാദങ്ങള്‍ വാദത്തിന്റെ പേരില്‍ വേണമെങ്കില്‍ അംഗീകരിയ്ക്കാം. പക്ഷേ ഒരു സംശയം. ഇന്ത്യ ഒരു മതേതര ജനാധിപത്യ രാജ്യമല്ലേ... സൗദി അങ്ങനെയാണോ?

സൗദിയെ പോലെ ആകണോ ഇന്ത്യ

സൗദി അറേബ്യയില്‍ മറ്റ് മതത്തില്‍ പെട്ട സ്ത്രീകള്‍ പോലും പുറത്തിറങ്ങുമ്പോള്‍ പര്‍ദ്ദയിടണം. ഇനിയിപ്പോ ഇന്ത്യയും ഏതാണ്ട് അങ്ങനെ ആകണം എന്നാണോ പറയുന്നത്.

English summary

Throwing a challenge to writers who are returning their awards, VHP national spokesman Surendra Jain on Sunday asked if they would go to Saudi Arabia and ask for pork there.