നിര്‍മ്മാതാവിനെ ഭീഷണിപ്പെടുത്തി, ബോളിവുഡ് താരം സഞ്ജയ് ദത്തിനെതിരെ ജാമ്യമില്ലാ അറസ്റ്റ് വാറന്റ്...

വഞ്ചനാ കേസില്‍ സഞ്ജയ് ദത്തിനെതിരെ അന്ധേരി മെട്രോപൊളിറ്റന്‍ കോടതി 2013ല്‍ അറസ്റ്റ് വാറന്റ് പുറപ്പെടുവിച്ചിരുന്നെങ്കിലും പിന്നീട് ജാമ്യം ലഭിച്ചിരുന്നു.

മുംബൈ: ബോളിവുഡ് സൂപ്പര്‍ താരം സഞ്ജയ് ദത്തിനെതിരെ കോടതി ജാമ്യമില്ലാ അറസ്റ്റ് വാറന്റ് പുറപ്പെടുവിച്ചു. സിനിമ നിര്‍മ്മാതാവ് ഷക്കീല്‍ നൂറാനിയെ ഭീഷണിപ്പെടുത്തിയെന്ന കേസിലാണ് താരത്തിനെതിരെ അറസ്റ്റ് വാറന്റ് പുറപ്പെടുവിച്ചിരിക്കുന്നത്. ദത്തിനെതിരെ വഞ്ചനാ കുറ്റത്തിനും നൂറാനി നേരത്തെ പരാതി നല്‍കിയിരുന്നു.

വഞ്ചനാ കേസില്‍ സഞ്ജയ് ദത്തിനെതിരെ അന്ധേരി മെട്രോപൊളിറ്റന്‍ കോടതി 2013ല്‍ അറസ്റ്റ് വാറന്റ് പുറപ്പെടുവിച്ചിരുന്നെങ്കിലും പിന്നീട് ജാമ്യം ലഭിച്ചിരുന്നു. ഇതിന് ശേഷമാണ് സഞ്ജയ് ദത്ത് തന്നെ ഭീഷണിപ്പെടുത്തിയെന്ന് കാണിച്ച് നൂറാനി പരാതി നല്‍കിയത്. ജാന്‍കി ബാസി എന്ന ചിത്രത്തില്‍ അഭിനയിക്കാമെന്ന് കരാര്‍ ഒപ്പിടുകയും, 50 ലക്ഷം രൂപ വാങ്ങിയ ശേഷം പിന്മാറിയെന്നും ആരോപിച്ചാണ് സഞ്ജയ് ദത്തിനെതിരെ നൂറാനി ആദ്യം പരാതി നല്‍കിയിരുന്നത്.

ഇതിന് ശേഷമാണ് കറാച്ചി, ദുബായ് എന്നിവിടങ്ങളില്‍ നിന്നും തനിക്ക് ഭീഷണി സന്ദേശം ലഭിച്ചെന്ന് കാണിച്ച് നൂറാനി വീണ്ടും സഞ്ജയ് ദത്തിനെതിരെ പരാതി നല്‍കിയത്. എന്നാല്‍ നൂറാനിയുടെ ആരോപണങ്ങളെ സഞ്ജയ് ദത്തിന്റെ അഭിഭാഷകന്‍ തള്ളിയിരുന്നു. ഈ കേസിലാണ് സഞ്ജയ് ദത്തിനെതിരെ ഇപ്പോള്‍ ജാമ്യമില്ലാ അറസ്റ്റ് വാറന്റ് പുറപ്പെടുവിച്ചിരിക്കുന്നത്.

English summary

Non Bailable Arrest Warrant issued against Sanjay Dutt over alleged threats to Noorani.