സബ്സിഡി ഇല്ലാത്ത പാചകവാതക വില കുറച്ചു
ദില്ലി: സബ്സിഡി ഇല്ലാത്ത പാചക വാതക സിലിണ്ടറുകളുടെ വില കുറച്ചു. സിലിണ്ടറിന് 53.5 രൂപയാണ് കുറയുക. എണ്ണക്കമ്പനികളുടെ അവലോകന യോഗത്തിലാണ് വില കുറയ്ക്കാന് തീരുമാനിച്ചത്.
രാജ്യാന്തരവിപണിയിലെ വില കണക്കിലെടുത്താണ് എണ്ണക്കമ്പനികളുടെ നടപടി. രണ്ട് മാസത്തിനിടെ ഇത് രണ്ടാം തവണയാണ് പാചക വാതക സിലിണ്ടറിന്റെ വില കുറയ്ക്കുന്നത്. നേരത്തെ 220 രൂപ വര്ധിപ്പിച്ച ശേഷം ഈ മാസം തുടക്കത്തില് 107 രൂപ കുറച്ചിരുന്നു.
12 സബ്സിഡി സിലിണ്ടറുകള്ക്കു ശേഷം അധികമായി ലഭിക്കുന്ന സിലിണ്ടറുകള്ക്കണു വില കുറച്ചത്. വിമാനങ്ങളില് ഉപയോഗിക്കുന്ന ഇന്ധനത്തിന്റെ വില ഒരു ശതമാനം വര്ധിപ്പിക്കാനും എണ്ണകമ്പനികള് തീരുമാനിച്ചു. ഇതോടെ വിമാനയാത്രാക്കൂലി വര്ധിക്കും.
വില വര്ധനവോടെ ഏവിയേഷന് ടര്ബൈന് ഫ്യുവലിന്റെ വില ദില്ലിയില് കിലോലിറ്ററിന് 753.34 രൂപ വര്ധിക്കും. ഇതോടെ കിലോലിറ്ററിന് 74,825.54 രൂപയാകും. മുംബൈയില് ഇത് 77,322.6 രൂപയിലെത്തും.
ഗാര്ഹിക ഉപയോഗത്തിനുള്ള സബ്സിഡി രഹിത സിലിണ്ടറിന് ഇപ്പോള് വില 1134 രൂപയാണ്(ദില്ലി) വില. വിലക്കുറവ് പ്രാബല്യത്തില്വരുന്നതോടെ അത് 1080.5 രൂപയാകും. പാചകവാതകം വിതരണത്തില് നേരിടുന്ന നഷ്ടം ഫിബ്രവരിയ്ക്കുശേഷം കുറഞ്ഞുവെന്ന് ഇന്ത്യന് ഓയില് കോര്പ്പറേഷന് അധികൃതര് പറയുന്നു.
പൊതുമേഖലാ എണ്ണക്കമ്പനികളായ ഇന്ത്യന് ഓയില് കോര്പ്പറേഷന്, ഹിന്ദുസ്ഥാന് പെട്രോളിയം, ഭാരത് പെട്രോളിയം എന്നിവ എല്ലാമാസവും ആദ്യവാരമാണ് പാചകവാതക വില പരിഷ്കരിക്കുന്നത്. അന്താരാഷ്ട്ര വിപണിയിലെ വിലയ്ക്ക് അനുസൃതമായാണ് പരിഷ്കരണം.