സൗദി അറേബ്യയിൽ നിന്ന് മാത്രമല്ല, ഇറാഖിൽ നിന്നും ഖത്തറിൽ നിന്നും വീണ്ടും വാങ്ങിത്തുടങ്ങി ; പക്ഷെ

റഷ്യൻ എണ്ണക്കമ്പനികൾക്ക് മേൽ യുഎസ് കൂടുതൽ ഉപരോധം ഏർപ്പെടുത്തിയതിന് പിന്നാലെ ഇന്ത്യയും റഷ്യൻ എണ്ണ വാങ്ങുന്നതിൽ നിന്നും പിന്നോട്ടടിക്കുകയാണ്. റഷ്യയിൽ നിന്നും കൂടുതലായി എണ്ണ വാങ്ങിയിരുന്ന റിലയൻസ് ഇൻഡസ്ട്രീസ് ലിമിറ്റഡ് മധ്യേഷ്യയിൽ നിന്നും അമേരിക്കയിൽ നിന്നും ക്രൂഡ് ഓയിൽ വാങ്ങാൻ തുടങ്ങി. പുതിയ ഉപരോധങ്ങൾ പ്രധാന ഇന്ത്യൻ റിഫൈനറികളിലേക്കുള്ള റഷ്യൻ ക്രൂഡ് ഓയിലിന്റെ വരവ് കുറയാൻ കാരണമാകുമെന്നാണ് വിലയിരുത്തപ്പെടുന്നത്.

റഷ്യയിൽ നിന്നുള്ള പ്രധാന കമ്പനികളായ റോസ്‌നെഫ്റ്റ്, ലൂക്കോയിൽ പിജെഎസ്‌സി തുടങ്ങിയവയ്ക്ക് മേലാണ് ട്രംപ് ഉപരോധം ഏർപ്പെടുത്തിയത്. റോസ്‌നെഫ്റ്റിന്റെ പിന്തുണയുള്ള നയാര എനർജി ലിമിറ്റഡ് മാത്രമാണ് ഈ ഉപരോധങ്ങളിൽ നിന്ന് ഒഴിവാക്കപ്പെട്ട ഏക സ്ഥാപനം. അതേസമയം, യുഎസ് ഉപരോധങ്ങളുടെ പ്രത്യാഘാതങ്ങൾ വിലയിരുത്തുന്നതിനായി പല ചൈനീസ് കമ്പനികളും താൽക്കാലികമായി എണ്ണ വാങ്ങുന്നത് നിർത്തിവെച്ചിട്ടുണ്ട്. ഇത് ആഗോള എണ്ണ വിപണിയിൽ വലിയ ആശങ്കകൾക്കാണ് വഴിവെച്ചിരിക്കുന്നത്.

ബ്ലൂംബെർഗ് റിപ്പോർട്ട് അനുസരിച്ച്, ഈ വർഷം റഷ്യൻ എണ്ണ ഏറ്റവും കൂടുതൽ ഇറക്കുമതി ചെയ്തത് റിലയൻസ് ആണ്. എന്നാൽ ട്രംപിന്റെ ഉപരോധങ്ങൾക്ക് പിന്നാലെ അമേരിക്കയിൽ നിന്നും മിഡിൽ ഈസ്റ്റിൽ നിന്നും ദശലക്ഷക്കണക്കിന് ബാരൽ ക്രൂഡ് ഓയിലാണ് ഇപ്പോൾ റിലയൻസ് വാങ്ങിയത്. സൗദി അറേബ്യയിൽ നിന്നുള്ള ഖഫ്ജി, ഇറാഖിൽ നിന്നുള്ള ബസ്ര മീഡിയം, ഖത്തറിൽ നിന്നുള്ള അൽ-ഷഹീൻ, യുണൈറ്റഡ് സ്റ്റേറ്റ്സിൽ നിന്നുള്ള വെസ്റ്റ് ടെക്സസ് ഇന്റർമീഡിയറ്റ് തുടങ്ങിയ നിരവധി തരം എണ്ണകളാണ് റിലയൻസ് വാങ്ങിയത്. ഈ എണ്ണകൾ ഡിസംബറിലോ ജനുവരിയിലോ ഇന്ത്യയിൽ എത്തുമെന്നാണ് റിപ്പോർട്ടുകൾ വ്യക്തമാക്കുന്നത്. റോസ്‌നെഫ്റ്റും ലൂക്കോയിലും ഇന്ത്യയുടെ പ്രധാന റഷ്യൻ ക്രൂഡ് ഓയിൽ വിതരണക്കാരാണ്. റോസ്‌നെഫ്റ്റ് പിജെഎസ്‌സിയുമായുള്ള ദീർഘകാല കരാറിലൂടെ ഈ വർഷം ഇന്ത്യയിലെ ഏറ്റവും വലിയ റഷ്യൻ എണ്ണ ഇറക്കുമതിയാണ് റിലയൻസ് നടത്തിയത്.

സാധാരണയായി റിലയൻസ് മിഡിൽ ഈസ്റ്റിൽ നിന്നുള്ള ക്രൂഡ് ഓയിൽ വാങ്ങാറുണ്ടെങ്കിലും, യുഎസ് ഉപരോധങ്ങൾ പ്രഖ്യാപിക്കുന്നതിന് തൊട്ടുമുമ്പ് നടന്ന പുതിയ ഇടപാടുകൾ പതിവിലും വലിയ തോതിലുള്ളതായിരുന്നുവെന്ന് വ്യാപാരികൾ ചൂണ്ടിക്കാട്ടുന്നു. ഇന്ത്യൻ റിഫൈനറികൾ സ്പോട്ട് മാർക്കറ്റിൽ നിന്നും ഗണ്യമായ അളവിൽ എണ്ണ വാങ്ങിയിട്ടുണ്ട്.

ഈ മാസം മാത്രം റിലയൻസ് ഇൻഡസ്ട്രീസ് കുറഞ്ഞത് 10 ദശലക്ഷം ബാരൽ എണ്ണയാണ് വാങ്ങിയത്. ഈ വാങ്ങലുകളിൽ ഭൂരിഭാഗവും,പ്രത്യേകിച്ച് യുഎസ് ഉപരോധങ്ങൾക്ക് ശേഷം നടന്നവ, മിഡിൽ ഈസ്റ്റേൺ ക്രൂഡ് ഇനങ്ങളാണെന്ന് മാർക്കറ്റ് വ്യാപാരികളെ ഉദ്ധരിച്ചുള്ള ടൈംസ് ഓഫ് ഇന്ത്യ റിപ്പോർട്ടിൽ പറയുന്നു. കൂടുതൽ ഇന്ത്യൻ റിഫൈനറികൾ സ്പോട്ട് ഷിപ്പ്‌മെന്റുകൾക്കായി സജീവമായി ശ്രമിക്കുന്നുണ്ടെന്നും, പ്രധാനമായും മിഡിൽ ഈസ്റ്റ്, യുണൈറ്റഡ് സ്റ്റേറ്റ്സ്, ബ്രസീൽ എന്നിവിടങ്ങളിലെ വിതരണക്കാരെയാണ് സമീപിക്കുന്നതെന്നും റിപ്പോർട്ടുകൾ വ്യക്തമാക്കി.

ഇന്ത്യക്ക് നഷ്ടം

പ്രതിദിനം 1.6-1.7 ദശലക്ഷം ബാരൽ റഷ്യൻ ക്രൂഡ് ഓയിൽ ഇന്ത്യ ഇറക്കുമതി ചെയ്തിരുന്നു. ഇത് രാജ്യത്തിന്റെ മൊത്തം ക്രൂഡ് ഇറക്കുമതിയുടെ ഏകദേശം 30% വരും. , ഭാരത് പെട്രോളിയം കോർപ്പറേഷൻ (BPCL), ഹിന്ദുസ്ഥാൻ പെട്രോളിയം (HP) തുടങ്ങിയ ഇന്ത്യൻ ഓയിൽ മാർക്കറ്റിംഗ് കമ്പനികളും (OMCs) റിലയൻസ് ഇൻഡസ്ട്രീസ് പോലുള്ള സ്വകാര്യ റിഫൈനറികളും റോസ്നെഫ്റ്റ്, ലൂക്കോയിൽ തുടങ്ങിയ നിർമ്മാതാക്കളിൽ നിന്ന് നേരിട്ട് ക്രൂഡ് വാങ്ങാതെ റഷ്യൻ ഇടനിലക്കാർ വഴിയാണ് പ്രധാനമായും ക്രൂഡ് ഓയിൽ ശേഖരിച്ചിരുന്നത്.

ഇന്ത്യയുടെ മൊത്തം ശുദ്ധീകരണ ആവശ്യം പ്രതിദിനം ഏകദേശം 5.4 ദശലക്ഷം ബാരലാണ്. ONGC, ഓയിൽ ഇന്ത്യ, റിലയൻസ് ഇൻഡസ്ട്രീസ്, കെയ്ൻ ഇന്ത്യ എന്നിവയുടെ നേതൃത്വത്തിലുള്ള ആഭ്യന്തര ഉത്പാദനം ഈ ആവശ്യത്തിന്റെ 13-14% മാത്രമാണ് നിറവേറ്റുന്നത്. ഏകദേശം 86% ഇറക്കുമതിയെ ആണ് ഇന്ത്യ ആശ്രയിക്കുന്നത്. 2022-ലെ റഷ്യ-യുക്രെയ്ൻ യുദ്ധത്തിന് മുമ്പ്, റഷ്യൻ ക്രൂഡ് ഇന്ത്യയുടെ ഇറക്കുമതിയുടെ ഒരു ശതമാനത്തിൽ താഴെയായിരുന്നു. എന്നാൽ കഴിഞ്ഞ മൂന്ന് വർഷത്തിനിടെ ഈ ഓഹരി 30-35% ആയി ഉയർന്നു.

ഇന്ത്യ റഷ്യൻ ക്രൂഡ് വാങ്ങുന്നത് നിർത്തി യു.എ.ഇ, സൗദി അറേബ്യ, ഇറാഖ് തുടങ്ങിയ പരമ്പരാഗത വിതരണക്കാരിലേക്ക് മടങ്ങുന്നതോടെ, റഷ്യൻ എണ്ണയ്‌ക്കെതിരായ നിലവിലെ ഉപരോധങ്ങൾക്കിടയിൽ ആഗോള എണ്ണവില വർദ്ധിക്കാമെന്നാണ് ഊർജ്ജ വിശകലന വിദഗ്ദ്ധർ മുന്നറിയിപ്പ് നൽകുന്നത്. ഇത് ഇന്ത്യയുടെ ഇറക്കുമതി ചെലവ് വർദ്ധിപ്പിക്കുകയും റഷ്യൻ എണ്ണയിലെ കിഴിവുകളിലൂടെ നേടിയ സാമ്പത്തിക ലാഭം ഇല്ലാതാക്കുകയും ചെയ്യും.