ഒരു രാജ്യം ഒരു തിര‍ഞ്ഞെടുപ്പ്: ബിൽ അവതരിപ്പിക്കുമ്പോൾ ഹാജരാവാതിരുന്ന എംപിമാർക്ക് ബിജെപി നോട്ടീസ് അയക്കും

ന്യൂഡൽഹി: ഒരു രാജ്യം ഒരു തിര‍ഞ്ഞെടുപ്പ് ബിൽ അവതരിപ്പിക്കുന്നതിനിടെ ലോക്സഭയിൽ ഹാജരാകാതിരുന്ന എം പിമാർക്ക് ബി ജെ പി കാരണംകാണിക്കൽ നോട്ടീസ് അയക്കുമെന്ന് റിപ്പോർട്ടുകൾ. 20 ൽ അധികം ബി ജെ പി എം പിമാർ സഭയിൽ ഹാജരായിട്ടില്ലെന്നാണ് കണ്ടെത്തിയത്.

എം പിമാരോട് സഭയിൽ ഹാജരാകണമെന്ന് നിർദ്ദേശിച്ച് നേരത്തെ തന്നെ പാർട്ടി വിപ്പ് അയച്ചിരുന്നു. എം പിമാരുടെ അഭാവം ബിൽ അവതരിപ്പിക്കുന്നതിന് തടസ്സമായില്ലെങ്കിലും സർക്കാരിന് ഈ വിഷയത്തിൽ വേണ്ടത്ര പിന്തുണയില്ലെന്നതിന്റെ തെളിവാണിതെന്ന് കോൺ​ഗ്രസ് പരി​ഹസിച്ചിരുന്നു.

നിയമന്ത്രി അർജുൻ റാം മേഘ് വാൾ ആണ് ബിൽ അവതരിപ്പിച്ചത്. ഭരണഘടന ഭേദ​ഗതി ബില്ലുകൾ വിശദപരിശോധനയ്ക്കായി സംയുക്ത പാർലമെന്ററി സമിതിക്ക് വിടാൻ തീരുമാനിച്ചിട്ടുണ്ട്. ഇലക്ട്രോണിക് വോട്ടിം​ഗിൽ 369 വോട്ടുകളാണ് സാധുവായത്. അതിൽ 220 പേർ പിന്തുണച്ചു. 149 പേർ എതിർത്തു. തുടർന്ന് സ്ലിപ്പ് വിതരണം ചെയ്ത് വീണ്ടും വോട്ടിം​ഗ് നടന്നു. 467 പേരിൽ 269 പേർ പിന്തുണച്ചു. 198 പേർ എതിർത്തു. ബിൽ പാസാക്കാൻ മൂന്നിൽ രണ്ട് ഭൂരിപക്ഷം വേണ്ടിവരുമെന്ന് കോൺ​ഗ്രസ് പറഞ്ഞു.

തിരഞ്ഞെടുപ്പ് പരിഷ്കാരങ്ങൾക്കായി നിയമങ്ങൾ കൊണ്ടുവരാം. ഈ ബിൽ തിരഞ്ഞെടുപ്പ് പ്രക്രിയ ലഘൂകരിക്കുന്നതിനുള്ള പ്രക്രിയയുമായി യോജിപ്പിച്ചിരിക്കുന്നുവെന്നും അത് സമന്വയിപ്പിക്കുമെന്നും ഒരു പ്രശ്നവും ഉണ്ടാവില്ലെന്നും ഈ ബില്ലിലൂ‍ടെ ഭരണഘടനയുടെ അടിസ്ഥാന ഘടനയിൽ കൃത്രിമം കാണിക്കില്ലെന്നും അർജുൻ റാം മേഘ് വാൾ പറഞ്ഞു. അതേ സമയം, ജെ പി സി സി സമിതിയിലേക്കുള്ള പ്രതിനിധികളെ ഇന്ന് പാർട്ടികൾ നിർദ്ദേശിക്കും ബി ജെ പിക്ക് ആയിരിക്കും സമിതിയുടെ അധ്യക്ഷ പദവി ലഭിക്കുക.