ഓൺലൈൻ സെക്‌സ്‌റ്റോർഷൻ തട്ടിപ്പുകൾ കൂടുന്നു; ശക്തമായ നടപടിയുമായി ആഭ്യന്തര മന്ത്രാലയം

ഓൺലൈൻ ലൈംഗിക ഭീഷണികളിൽ നിന്നും മറ്റ് സൈബർ കുറ്റകൃത്യങ്ങളിൽ നിന്നും പൗരന്മാർക്ക് സംരക്ഷണം ഒരുക്കാനുള്ള ശ്രമങ്ങൾ ഊർജ്ജിതമാക്കി ആഭ്യന്തര മന്ത്രാലയം. ഇന്ത്യൻ സൈബർ ക്രൈം കോർഡിനേഷൻ സെൻ്റർ (I4C) വഴി, സാമൂഹിക മാധ്യമങ്ങളിലൂടെയും മെസ്സേജിംഗ് ആപ്ലിക്കേഷനുകളിലൂടെയും വീഡിയോ ആശയവിനിമയ പ്ലാറ്റ്‌ഫോമുകളിലൂടെയും പ്രവർത്തിക്കുന്ന സംഘടിത സൈബർ ക്രൈം ശൃംഖലകളെ കണ്ടെത്താനും തടയാനും കേന്ദ്ര-സംസ്ഥാന നിയമ നിർവ്വഹണ ഏജൻസികൾ തമ്മിലുള്ള ഏകോപനം മന്ത്രാലയം ശക്തിപ്പെടുത്തുന്നു.

ലൈംഗിക ഭീഷണി, വ്യക്തിത്വം ദുരുപയോഗം ചെയ്യൽ, സാമ്പത്തിക ചൂഷണം എന്നിവയുമായി ബന്ധപ്പെട്ട പരാതികൾ വർധിച്ചുവരികയാണ്. ഇവയ്ക്കെതിരായ നടപടി സ്വീകരിക്കാൻ പൗര കേന്ദ്രീകൃത സമീപനമാണ് കേന്ദ്രസർക്കാർ സ്വീകരിച്ചിരിക്കുന്നത്. തട്ടിപ്പുകൾ അതിവേഗം റിപ്പോർട്ട് ചെയ്യാനും തട്ടിപ്പുമായി ബന്ധപ്പെട്ട പണമിടപാടുകൾ കണ്ടെത്തി മരവിപ്പിക്കാനും 1930 സൈബർ തട്ടിപ്പ് ഹെൽപ്‌ലൈനും നാഷണൽ സൈബർ ക്രൈം റിപ്പോർട്ടിംഗ് പോർട്ടലും (www.cybercrime.gov.in) സഹായകമാണ്. ഡിജിറ്റൽ ബ്ലാക്ക്‌മെയിലിംഗ് എങ്ങനെ തിരിച്ചറിയാമെന്നും ഒഴിവാക്കാമെന്നും ആളുകളെ പഠിപ്പിക്കാൻ പോലീസ്, സ്കൂളുകൾ, കമ്മ്യൂണിറ്റി ഗ്രൂപ്പുകൾ എന്നിവ വഴി ബോധവൽക്കരണ കാമ്പെയ്‌നുകൾ നടത്താൻ മന്ത്രാലയം എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും നിർദ്ദേശം നൽകിയിട്ടുണ്ട്. വിവരങ്ങൾ അറിഞ്ഞിരിക്കാനും ജാഗ്രത പാലിക്കാനും, പ്രധാന സോഷ്യൽ മീഡിയ പ്ലാറ്റ്‌ഫോമുകളിൽ MHA-യുടെ ഔദ്യോഗിക സോഷ്യൽ മീഡിയ ഹാൻഡിലായ CYBERDOST പിന്തുടരാനും പൗരന്മാരോട് നിർദ്ദേശിച്ചിട്ടുണ്ട്.

ഹൈദരാബാദിൽ 70 വയസ്സുള്ള ഒരു മുൻ സർക്കാർ ഉദ്യോഗസ്ഥന് ഫെയ്സ്ബുക്കും മറ്റ് മെസ്സേജിംഗ് ആപ്ലിക്കേഷനുകളും ഉപയോഗിച്ച് പ്രവർത്തിക്കുന്ന ഒരു സംഘടിത സെക്സ്റ്റോർഷൻ സംഘത്തിൻ്റെ വലയിൽ കുടുങ്ങി 39 ലക്ഷം രൂപ അടുത്തിടെ നഷ്ടമായിരുന്നു. സാമ്പത്തിക ബുദ്ധിമുട്ടിലാണെന്ന് നടിച്ച് ഒരു യുവതി അയച്ച സൗഹൃദ അഭ്യർത്ഥനയിൽ നിന്നാണ് തട്ടിപ്പിന്റെ തുടക്കം.. മാസങ്ങളോളം, അവളും കൂട്ടാളികളും കുടുംബാംഗങ്ങളായും പോലീസ് ഉദ്യോഗസ്ഥരായും ചമഞ്ഞ്, വൈകാരിക സമ്മർദ്ദവും ഭീഷണികളും നടത്തി പണം തട്ടിയെടുക്കുകയായിരുന്നു.

ഇദ്ദേഹത്തിൻ്റെ പരാതിയെത്തുടർന്ന് ഹൈദരാബാദ് സൈബർ ക്രൈം പോലീസ് കേസ് രജിസ്റ്റർ ചെയ്യുകയും അന്വേഷണത്തിലൂടെ മുതിർന്ന പൗരന്മാരെ ലക്ഷ്യമിടുന്ന ഒരു വലിയ സിൻഡിക്കേറ്റിനെ കണ്ടെത്തുകയും ചെയ്തു. സമാനമായ മറ്റൊരു കേസിൽ, ഹൈദരാബാദിൽ നിന്നുള്ള ഇരുപത്തിമൂന്ന് വയസ്സുള്ള ഒരു സോഫ്റ്റ്‌വെയർ എഞ്ചിനീയർക്ക് അജ്ഞാത നമ്പറിൽ നിന്ന് ലഭിച്ച വാട്ട്‌സ്ആപ്പ് വീഡിയോ കോളിന് ശേഷം 2.6 ലക്ഷം രൂപ നഷ്ടപ്പെട്ടു. വ്യാജ വീഡിയോ പുറത്തുവിടാതിരിക്കാൻ പണം ആവശ്യപ്പെട്ട് വിളിച്ചയാൾ വ്യാജ ദൃശ്യങ്ങൾ ഉപയോഗിച്ച് ഇദ്ദേഹത്തെ ബ്ലാക്ക്‌മെയിൽ ചെയ്യുകയായിരുന്നു.

സൈബരാബാദ് സൈബർ ക്രൈം പോലീസിന്റെ കൃത്യമായ ഇടപെടലിലൂടെ കേസ് കണ്ടെത്തുകയും പ്രതികളുടെ അക്കൗണ്ടുകൾ മരവിപ്പിക്കുകയും ചെയ്തു. വ്യാജ തിരിച്ചറിയലുകളും കള്ളപ്പണം വെളുപ്പിക്കാനുള്ള അക്കൗണ്ടുകളും ഉപയോഗിച്ച് നിരവധി സംസ്ഥാനങ്ങളിൽ നിന്നാണ് ഈ ലൈംഗിക ഭീഷണി സംഘം പ്രവർത്തിക്കുന്നതെന്ന് അന്വേഷണത്തിൽ തെളിഞ്ഞു. ഈ സാഹചര്യത്തിൽ ഓൺലൈനിൽ ഇടപഴകുമ്പോൾ ജാഗ്രത പാലിക്കാനും അജ്ഞാതരായ വ്യക്തികളിൽ നിന്നുള്ള സൗഹൃദ അഭ്യർത്ഥനകളോ വീഡിയോ കോളുകളോ സ്വീകരിക്കരുതെന്നും മന്ത്രാലയം പൗരന്മാരെ ഉപദേശിച്ചു.

വ്യക്തിപരമായ ചിത്രങ്ങളോ ബാങ്കിംഗ് വിവരങ്ങളോ സെൻസിറ്റീവായ വിവരങ്ങളോ അപരിചിതരുമായി ഒരു ഡിജിറ്റൽ പ്ലാറ്റ്‌ഫോമിലും പങ്കുവെക്കരുതെന്നും ഉപയോക്താക്കളോട് അഭ്യർത്ഥിച്ചിട്ടുണ്ട്. ഡിജിറ്റൽ സേവനങ്ങൾ ദുരുപയോഗം ചെയ്യുന്നത് തടയാൻ കേന്ദ്ര ആഭ്യന്തര മന്ത്രാലയം (MHA) I4C (Indian Cybercrime Coordination Centre) വഴി സംസ്ഥാന സൈബർ സെല്ലുകൾ, ബാങ്കുകൾ, സോഷ്യൽ മീഡിയ പ്ലാറ്റ്‌ഫോമുകൾ എന്നിവയുമായി ചേർന്ന് പ്രവർത്തിക്കുന്നുണ്ട്. ലൈംഗിക അതിക്രമങ്ങൾ, മറ്റ് ഓൺലൈൻ തട്ടിപ്പുകൾ എന്നിവയിൽ ഉൾപ്പെട്ട നിരവധി മ്യൂൾ അക്കൗണ്ടുകളും വ്യാജ പ്രൊഫൈലുകളും സംയുക്ത ശ്രമങ്ങളിലൂടെ തിരിച്ചറിഞ്ഞ് ബ്ലോക്ക് ചെയ്തിട്ടുണ്ട്. ഇതിനിടെ, സൈബർ തട്ടിപ്പുകളെക്കുറിച്ച് പൗരന്മാരെ ബോധവാന്മാരാക്കാൻ CYBERDOST എന്ന ഔദ്യോഗിക സോഷ്യൽ മീഡിയ ഹാൻഡിൽ എല്ലാ പ്രധാന പ്ലാറ്റ്‌ഫോമുകളിലും പിന്തുടരാൻ ആഭ്യന്തര മന്ത്രാലയം അഭ്യർത്ഥിച്ചു.

YouTube - https://youtube.com/@cyberdosti4c

Instagram- https://www.instagram.com/cyberdosti4c?igsh=c2tteTd5Mjl2b2cw

Facebook- https://www.facebook.com/share/1KVuL1aJ9y/?mibextid=wwXIfr

X- https://x.com/cyberdost?s=11

Whatsapp- https://whatsapp.com/channel/0029Va3VAOY8fewrOtXqMw1V

Dailyhunt - https://m.dailyhunt.in/profile/I4C_MHA