'ഞങ്ങൾക്ക് ചെലവ് കൂടുകയല്ലേ'; എംഎൽഎമാരുടെ ശമ്പളം 100 ശതമാനം വർധിപ്പിക്കാൻ കർണാടക

എംഎൽഎമാർ മുതൽ മുഖ്യമന്ത്രി വരെയുള്ളവരുടെ ശമ്പളം വർധിപ്പിക്കാനൊരുങ്ങി കർണാടക. ഇത് സംബന്ധിച്ച കരട് ബിൽ നിയമസഭയിൽ അവതരിപ്പിച്ചു. ബിൽ അംഗീകരിക്കുന്നതോടെ ഇവരുടെ ശമ്പളം ഇരട്ടിയായി ഉയരും. പുതിയ നിർദേശ പ്രകാരം 1.5 ലക്ഷം രൂപയായിരിക്കും മുഖ്യമന്ത്രിയുടെ ശമ്പളം. നിലവിൽ 75000 രൂപയാണ് മുഖ്യമന്ത്രിയുടെ ശമ്പളം. ഇതിന് പുറമെ ആനുകൂല്യങ്ങളും ലഭിക്കും.

മന്ത്രിമാരുടെ ശമ്പളം 60,000ത്തിൽ നിന്നും 1,25,000 ആയി ഉയരും. എം എൽ എമാരുടേയും എം എൽ സിമാരുടേയും ശമ്പളം 40,000ത്തിൽ നിന്നും 80,000 ആകും. ഇവരുടെ പെൻഷനിലും വൻ വർധനവ് ഉണ്ടാകും. നിലനിൽ 55,000 ആണ് പെൻഷൻ. ഇത് 95,000 രൂപയായി ഉയരും. ട്രാവൽ അലവൻസ് 3,50,000ത്തിൽ നിന്ന് 2,50,000 രൂപയാകും. മെഡിക്കൽ അലൻസ് തുക 85,000ത്തിൽ നിന്നും 1,10,000 വും. നിയമസഭാ സ്പീക്കറുടെയും ലെജിസ്ലേറ്റീവ് കൗൺസിൽ ചെയർമാന്റെയും ശമ്പളവും വർധിക്കും. 67 ശതമാനം വർധനവാണ് ഉണ്ടാകുക. അതായത് പ്രതിമാസ ശമ്പളമായി 1,25000 രൂപ ലഭിക്കും. നിലവിൽ ത് 75,000 രൂപയാണ്.

പ്രതിപക്ഷ നേതാവിന്റെയും ട്രഷറി ചീഫ് വിപ്പുമാരുടെയും വീട്ടുവാടക അലവൻസുകളും ഉയരും. പുതിയ വ്യവസ്ഥ പ്രകാരം പ്രതിമാസം 2,50,000 രൂപയായിരിക്കും ലഭിക്കുക. ഇവരുടെ ഡെപ്യൂട്ടിമാരുടെ ശമ്പളവും ഉയരും. പ്രതിമാസം 80,000 വരെയായിരിക്കും ലഭിക്കുക. കടുത്ത സാമ്പത്തിക പ്രതിസന്ധിക്കിടെ സംസ്ഥാന സർക്കാരിന്റെ 'ദുർചെലവി'നെതിരെ പരാതി ഉയർത്തുന്ന ബി ജെ പി നേതാക്കൾ ആരും തന്നെ ബില്ലിനെ ചോദ്യം ചെയ്തില്ലെന്നത് ശ്രദ്ധേയമാണ്. കോൺഗ്രസ് നേതാക്കളും യാതൊരു സംശയവും ആശങ്കയും ഇക്കാര്യത്തിൽ പങ്കുവെച്ചിട്ടില്ല. അതേസമയം ശമ്പള വർനവിനെ ന്യായീകരിക്കുകയാണ് കോൺഗ്രസ് മന്ത്രിമാർ. സാധാരണക്കാർക്ക് ചെലവ് കൂടുകയാണെന്നത് പോലെ തന്നെയാണ് തങ്ങളുടേയും അവസ്ഥ എന്നാണ് ആഭ്യന്തര മന്ത്രി ജി പരമേശ്വര പറഞ്ഞത്.

'സാധാരണക്കാർ കഷ്ടപ്പെടുകയല്ലേ, ഞങ്ങൾ എംഎൽഎമാരും കഷ്ടപ്പെടുകയാണ്. എം എൽ എമാരിൽ നിന്ന് തന്നെയാണ് ഈ നിർദേശങ്ങൾ വന്നത്. അതിനാലാണ് മുഖ്യമന്ത്രി ഇത് സംബന്ധിച്ച് തീരുമാനം കൈക്കൊണ്ടത്. എല്ലാവർക്കും ജീവിക്കണ്ടേ', പരമേശ്വര പറഞ്ഞു.

എം എൽ എമാരുട ശമ്പളം വർധിപ്പിക്കുന്നതിൽ യാതൊരു തെറ്റുമില്ലെന്നായിരുന്നു കോൺഗ്രസ് നേതാവായ എച്ച്ബി പാട്ടീലിന്റെ പ്രതികരണം. സിംഗപ്പൂരിലെ പ്രധാനമന്ത്രിയുടേയും അവിടുത്തെ സർക്കാർ ഉദ്യോഗസ്ഥരുടേയും ശമ്പളം ചൂണ്ടിക്കാട്ടി അദ്ദേഹം നടപടിയെ ന്യായീകരിച്ചു.