'പത്മാവതി' സൈറ്റില് തീവെപ്പും ആക്രമണവും; സഞ്ജയ് ലീലാ ബെന്സാലി സുരക്ഷിതന്!!
മുംബൈ: ജയ്പൂരില് വച്ച് ആക്രമിക്കപ്പെട്ടതിന് പിന്നാലെ കോലാപ്പൂരിലെ ഷൂട്ടിംഗ് സൈറ്റിന് നേരെ ആക്രമണം. സഞ്ജയ് ലീലാ ബെന്സാവി സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് പുരോഗമിക്കുന്ന പന്ഹാല ഫോര്ട്ടിലാണ് ആക്രമണമുണ്ടായത്. ഷൂട്ടിംഗ് സാമഗ്രികള് തല്ലിത്തകര്ത്ത സംഘം അവ അഗ്നിക്കിരയാക്കുകയും ചെയ്തു. എന്നാല് സൈറ്റിലുണ്ടായിരുന്ന സഞ്ജയ് ലീലാ ബെന്സാലി സുരക്ഷിതനാണ്. ചൊവ്വാഴ്ച രാത്രിയായിരുന്നു സംഭവം.
അഞ്ജാതരാണ് റാണി പത്മാവതിയുടെ സൈറ്റും പുറത്ത് നിര്ത്തിയിട്ടിരുന്ന വാഹനങ്ങളും തകര്ത്തതെന്നാണ് പ്രാഥമിക അന്വേഷണത്തില് കണ്ടെത്തിയത്. രാവിലെ ഷൂട്ടിംഗ് സ്ഥലത്ത് തിരിച്ചെത്തിയ ടീം അംഗങ്ങളാണ് സംഭവമറിയുന്നത്. നാശനഷ്ടങ്ങള് തിട്ടപ്പെടുത്തിയിട്ടില്ല. സംഭവമറിഞ്ഞ് സ്ഥലത്തെത്തിയ പോലീസിന് സംഘം പരാതി നല്കിയിട്ടുണ്ട്. സൈറ്റിലുണ്ടായിരുന്ന മൃഗങ്ങളെയും പെട്രോള് ഒഴിച്ച് കത്തിയ്ക്കുകയും ചെയ്തിട്ടുണ്ട്.
പെട്രോള് ബോംബ്, കല്ല്, ലാത്തി എന്നിവ ഉപയോഗിച്ചാണ് ആക്രമിച്ചത്. സംഭവത്തെ തുടര്ന്ന് പ്രദേശത്തെ സുരക്ഷ ശക്തമാക്കിയിട്ടുണ്ട്. ബെന്സാലിയുടെ പരാതിയില് കേസെടുത്ത പോലീസ് സംഭവത്തില് പങ്കുണ്ടെന്ന്് സംശയിക്കുന്ന ചിലരെ കസ്റ്റഡിയിലെടുത്തിട്ടുണ്ട്. പത്മാവതിയുടെ ഷൂട്ടിംഗ് നടക്കുന്നതിനിടെ ജെയ്പൂരില് വച്ച് ശക്തമായ എതിര്പ്പ് നേരിട്ടതിനെ തുടര്ന്നാണ് ചിത്രത്തിന്റെ ഷൂട്ടിംഗ് ചരിത്രപ്രാധാന്യമുള്ള പന്ഹാല ഫോര്ട്ടിലേയ്ക്ക് മാറ്റിയത്. ചിത്രത്തിന്റെ പേരില് ബെന്സാലിയ്ക്ക് നേരെ കയ്യേറ്റവും ഉണ്ടായിരുന്നു. രാത്രിയാണ് സൈറ്റ് തകര്ത്ത് തീയിട്ട് നശിപ്പിച്ചതെന്നാണ് ടിവി റിപ്പോര്ട്ടുകള്.