ക്രെഡിറ്റ് കാർഡ് വേണോ അതോ പേഴ്‌സണൽ ലോണോ? കടബാധ്യത കൂട്ടുന്നത് ഏത്

അപ്രതീക്ഷിതമായി വലിയൊരു സാമ്പത്തിക ചെലവ് വരുമ്പോള്‍, നമ്മുടെ മുന്നിലുള്ള പ്രധാന രണ്ട് വഴികളാണ് ക്രെഡിറ്റ് കാര്‍ഡും പേഴ്‌സണല്‍ ലോണും. രണ്ടും പെട്ടെന്ന് പണം ലഭ്യമാക്കുമെങ്കിലും, ഇവ രണ്ടും പ്രവർത്തിക്കുന്ന രീതി തികച്ചും വ്യത്യസ്തമാണ്. ശരിയായ തിരിച്ചറിവില്ലാതെ ഇതിൽ ഒന്ന് തിരഞ്ഞെടുത്താൽ വലിയ കടബാധ്യതയിലേക്ക് അത് നയിച്ചേക്കാം. ക്രെഡിറ്റ് കാര്‍ഡും പേഴ്‌സണല്‍ ലോണും തമ്മിലുള്ള പ്രധാന വ്യത്യാസങ്ങൾ താഴെ നൽകുന്നു.

ക്രെഡിറ്റ് കാര്‍ഡ്: ശ്രദ്ധിക്കേണ്ടത് 'മിനിമം ഡ്യൂ'

ക്രെഡിറ്റ് കാര്‍ഡുകള്‍ ഹ്രസ്വകാല ആവശ്യങ്ങള്‍ക്കാണ് കൂടുതൽ അനുയോജ്യം. ബില്‍ തുക കൃത്യസമയത്ത് പൂര്‍ണ്ണമായും അടച്ചുതീര്‍ത്താല്‍ പലിശ നല്‍കേണ്ടി വരുന്നില്ല എന്നതാണ് ഇതിന്റെ ഏറ്റവും വലിയ ഗുണം. എന്നാൽ തിരിച്ചടവ് മുടങ്ങിയാൽ സ്ഥിതി മാറും. ഇന്ത്യയിൽ ക്രെഡിറ്റ് കാര്‍ഡുകളുടെ വാര്‍ഷിക പലിശ നിരക്ക് ഏകദേശം 30 മുതല്‍ 45 ശതമാനം വരെയാണ്. പലിശ മാസത്തിലല്ല, ദിവസേനയാണ് കണക്കാക്കുന്നത്. 'മിനിമം ഡ്യൂ' മാത്രം അടച്ചുപോകുന്ന രീതി കടം കുറയ്ക്കാൻ സഹായിക്കില്ലെന്ന് മാത്രമല്ല, നിങ്ങളെ വർഷങ്ങളോളം വലിയ കടബാധ്യതയിൽ നിലനിർത്തുകയും ചെയ്യും. അതിനാൽ, ചെറിയ തുകയാണെങ്കിൽ അടുത്ത മാസം തന്നെ തിരിച്ചടയ്ക്കാൻ കഴിയുമെന്ന് ഉറപ്പുള്ളപ്പോൾ മാത്രം ക്രെഡിറ്റ് കാർഡ് ഉപയോഗിക്കുന്നതാണ് ബുദ്ധി.

പേഴ്‌സണല്‍ ലോണ്‍: കൃത്യമായ പ്ലാനിംഗ് വേണം

ഒരു നിശ്ചിത തുകയെടുത്ത് നിശ്ചിത കാലയളവിനുള്ളില്‍ മാസത്തവണകളായി (EMI) തിരിച്ചടയ്ക്കാൻ പേഴ്‌സണല്‍ ലോണാണ് നല്ലത്. ക്രെഡിറ്റ് കാര്‍ഡിനെ അപേക്ഷിച്ച് ഇതിന്റെ പലിശ നിരക്ക് വളരെ കുറവാണ്; സാധാരണയായി ഇത് 12 ശതമാനം മുതല്‍ 20 ശതമാനം വരെയാകാം. പേഴ്‌സണല്‍ ലോണിൽ അടയ്ക്കുന്ന ഓരോ ഇഎംഐയും പലിശയും മുതലും ഒരുപോലെ കുറയ്ക്കാൻ സഹായിക്കുന്നു. ലോൺ എന്നാണ് അവസാനിക്കുക എന്നതിനെക്കുറിച്ച് വ്യക്തമായ ധാരണയുള്ളതിനാൽ മാനസികമായ സമ്മർദ്ദവും കുറവായിരിക്കും. ചികിത്സാ ചെലവുകള്‍, വീട് അറ്റകുറ്റപ്പണി, വിവാഹം, ഉയർന്ന പലിശയുള്ള മറ്റു കടങ്ങൾ തീർക്കുക തുടങ്ങിയ ആവശ്യങ്ങൾക്ക് പേഴ്‌സണൽ ലോൺ തിരഞ്ഞെടുക്കുന്നതാണ് ഉചിതം.

ക്രെഡിറ്റ് കാര്‍ഡ് പരിധി പരമാവധി ഉപയോഗിക്കുന്നത് സിബില്‍ സ്‌കോറിനെ ദോഷകരമായി ബാധിച്ചേക്കാം. എന്നാൽ പേഴ്‌സണല്‍ ലോൺ തുക സ്‌കോറിനെ നേരിട്ട് ബാധിക്കില്ല. പകരം, ലോൺ കൃത്യമായി തിരിച്ചടയ്ക്കുന്നത് ക്രെഡിറ്റ് ഹിസ്റ്ററി മെച്ചപ്പെടുത്താൻ സഹായിക്കും. കടമെടുക്കുന്നതിന് മുൻപ് 'എത്ര തുക ആവശ്യമുണ്ട്', 'എത്ര കാലം കൊണ്ട് തിരിച്ചടയ്ക്കാൻ സാധിക്കും' എന്നീ രണ്ട് ചോദ്യങ്ങൾ സ്വയം ചോദിക്കുക. ഹ്രസ്വകാല സൗകര്യങ്ങൾ ദീർഘകാല പ്രശ്‌നങ്ങൾക്കുള്ള പരിഹാരമല്ലെന്ന് ഓർക്കുക.