ഒറ്റയടിക്ക് 20 രൂപ വരെ കുറയും! പെട്രോളും ഡീസലും ജിഎസ്ടിയിലേക്ക് എത്തുമോ? നിർണ്ണായക നീക്കം

രാജ്യത്ത് ഇന്ധനവില വർദ്ധനവ് ജനങ്ങളെയും വ്യാപാരികളെയും ഒരുപോലെ പ്രതിസന്ധിയിലാക്കുന്ന പശ്ചാത്തലത്തിൽ നിർണ്ണായക ആവശ്യവുമായി പ്രമുഖ വ്യാപാരി സംഘടനയായ ചേംബർ ഓഫ് ഇന്ത്യൻ ട്രേഡേഴ്സ് (CTI). പെട്രോളും ഡീസലും ചരക്ക് സേവന നികുതിയുടെ (GST) പരിധിയിൽ കൊണ്ടുവരണമെന്ന് ആവശ്യപ്പെട്ട് സംഘടന പ്രധാനമന്ത്രി നരേന്ദ്ര മോദിക്ക് കത്തയച്ചു. ഇന്ധന വില ജിഎസ്ടിക്ക് കീഴിലാക്കിയാൽ വിലയിൽ വൻ കുറവുണ്ടാകുമെന്നും ഇത് രാജ്യത്തെ വ്യാപാര-വ്യവസായ മേഖലകൾക്ക് വലിയ ഉത്തേജനമാകുമെന്നും സിടിഐ ചൂണ്ടിക്കാട്ടുന്നു.

നിലവിൽ രാജ്യത്ത് പെട്രോളിനും ഡീസലിനും മേൽ കേന്ദ്ര സർക്കാർ എക്സൈസ് ഡ്യൂട്ടിയും സംസ്ഥാന സർക്കാരുകൾ വാല്യൂ ആഡഡ് ടാക്സും (VAT) ആണ് ഈടാക്കുന്നത്. ഇത് കാരണം പല സംസ്ഥാനങ്ങളിലും ഇന്ധനവില 100 രൂപയ്ക്ക് മുകളിലാണ്. എന്നാൽ, ഇന്ധനങ്ങളെ ജിഎസ്ടിയുടെ ഏറ്റവും ഉയർന്ന സ്ലാബായ 28 ശതമാനത്തിൽ ഉൾപ്പെടുത്തിയാൽ പോലും പെട്രോൾ, ഡീസൽ വിലയിൽ 10 മുതൽ 20 രൂപ വരെ കുറവുണ്ടാകുമെന്നാണ് സിടിഐ ചെയർമാൻ ബ്രിജേഷ് ഗോയൽ വ്യക്തമാക്കുന്നത്.

എന്തുകൊണ്ട് ഈ ആവശ്യം?

ഇന്ധനവില ഉയർന്നുനിൽക്കുന്നത് രാജ്യത്തെ ചരക്കുനീക്ക കൂലി വർദ്ധിപ്പിക്കാൻ കാരണമാകുന്നുണ്ടെന്ന് വ്യാപാരികൾ കത്തിൽ വ്യക്തമാക്കുന്നു. അസംസ്കൃത വസ്തുക്കളുടെ വിലക്കയറ്റത്തിലേക്കും ഇത് വഴി സാധാരണക്കാരെ ബാധിക്കുന്ന പണപ്പെരുപ്പത്തിലേക്കും ഇത് നയിക്കുന്നു. പെട്രോളിയം ഉൽപ്പന്നങ്ങൾ ജിഎസ്ടിക്ക് കീഴിൽ വരികയാണെങ്കിൽ വ്യാപാരികൾക്ക് ഇൻപുട്ട് ടാക്സ് ക്രെഡിറ്റ് (ITC) ക്ലെയിം ചെയ്യാൻ സാധിക്കും. ഇത് ബിസിനസ്സ് ചെയ്യാനുള്ള ചിലവ് ഗണ്യമായി കുറയ്ക്കാൻ സഹായിക്കും.

വരാനിരിക്കുന്ന ജിഎസ്ടി കൗൺസിൽ യോഗത്തിൽ ഈ വിഷയം അജണ്ടയായി ഉൾപ്പെടുത്തണമെന്നും സംസ്ഥാനങ്ങളുമായി ആലോചിച്ച് ഇതിൽ അനുകൂല തീരുമാനം എടുക്കണമെന്നുമാണ് പ്രധാനമന്ത്രിയോട് സംഘടന ആവശ്യപ്പെട്ടിരിക്കുന്നത്. മുൻപും പല സാമ്പത്തിക വിദഗ്ദ്ധരും ഈ ആവശ്യം ഉന്നയിച്ചിട്ടുണ്ടെങ്കിലും, തങ്ങളുടെ പ്രധാന വരുമാന മാർഗ്ഗം നഷ്ടപ്പെടുമെന്ന ഭയത്താൽ ഭൂരിഭാഗം സംസ്ഥാന സർക്കാരുകളും ഇതിനെ എതിർക്കുകയാണ് പതിവ്. എന്നാൽ രാജ്യത്തിന്റെ സമഗ്രമായ സാമ്പത്തിക വളർച്ചയ്ക്ക് ഈ മാറ്റം അനിവാര്യമാണെന്നാണ് സിടിഐ വ്യക്തമാക്കുന്നത്.

പെട്രോളും ഡീസലും ജിഎസ്ടിയിൽ ഉൾപ്പെടുത്തണമെന്ന വ്യാപാരികളുടെ ആവശ്യം ശക്തമാകുമ്പോൾ കേന്ദ്ര-സംസ്ഥാന സർക്കാരുകൾ ഇതിനോട് എങ്ങനെ പ്രതികരിക്കുമെന്നാണ് രാജ്യം ഉറ്റുനോക്കുന്നത്. ഇന്ധനവില കുറയുന്നത് ചില്ലറ വില്പന മേഖലയിലും വിപണിയിലും വലിയ ചലനങ്ങൾ ഉണ്ടാക്കുമെന്നതിൽ തർക്കമില്ല. വരാനിരിക്കുന്ന ബജറ്റിലോ ജിഎസ്ടി കൗൺസിൽ യോഗങ്ങളിലോ ഈ വിഷയത്തിൽ നിർണ്ണായകമായ എന്തെങ്കിലും പ്രഖ്യാപനം ഉണ്ടാകുമോ എന്ന് വരും ദിവസങ്ങളിൽ അറിയാം.