ഇതെന്ത് മറിമായം...! റഷ്യയിലേക്ക് ഏറ്റവും കൂടുതല് പെട്രോള് കയറ്റി അയച്ചത് ഇന്ത്യ, കാരണമിത്
റഷ്യയിലേക്ക് ഗ്യാസോലിന് (പെട്രോള്) നല്കുന്ന പ്രധാന രാജ്യമായി മാറി ഇന്ത്യ. റഷ്യയിലെ എണ്ണ ശുദ്ധീകരണശാലകള്ക്ക് നേരെയുണ്ടായ ഉക്രേനിയന് ഡ്രോണ് ആക്രമണങ്ങളെത്തുടര്ന്ന് ഇന്ധന ഇറക്കുമതിയില് വര്ധനവുണ്ടായ സാഹചര്യത്തില് ആണ് ഇന്ത്യയില് നിന്നുള്ള ഇറക്കുമതി വര്ധിച്ചത്.
ശുദ്ധീകരണശാലകള്ക്ക് നേരെയുണ്ടായ തുടര്ച്ചയായ ആക്രമണങ്ങള് ആഭ്യന്തര ഇന്ധന ഉല്പ്പാദനത്തെ തടസപ്പെടുത്തിയതോടെ ഓഗസ്റ്റില് റഷ്യയുടെ കടല്മാര്ഗ്ഗമുള്ള ഗ്യാസോലിന് ഇറക്കുമതി പ്രതിദിനം ഏകദേശം 125,000 ബാരല് എന്ന റെക്കോര്ഡ് നിലവാരത്തിലെത്തി. ഊര്ജ്ജ വിശകലന സ്ഥാപനമായ വോര്ട്ടെക്സയുടെ കണക്ക് അനുസരിച്ച്, ഇത് ആ മാസത്തില് 470,000 ടണ് ഇറക്കുമതിക്ക് തുല്യമാണ്.
കഴിഞ്ഞ രണ്ട് മാസത്തിനുള്ളില് ഇന്ത്യന് ശുദ്ധീകരണശാലകള് 1 ദശലക്ഷം ബാരല് വരെ ഗ്യാസോലിന് വിതരണം ചെയ്തതായി വ്യാപാര വൃത്തങ്ങള് അറിയിച്ചു. റഷ്യയുടെ റോസ്നെഫ്റ്റിന് പകുതി ഉടമസ്ഥാവകാശമുള്ള നയാര എനര്ജി നടത്തുന്ന ഗുജറാത്തിലെ വദിനാര് ശുദ്ധീകരണശാലയില് നിന്നാണ് പ്രധാനമായും ഈ വിതരണം നടന്നത്.
പെട്രോള്, ഡീസല് തുടങ്ങിയ ഇന്ധനങ്ങള് നിര്മ്മിക്കുന്നതിനുള്ള അസംസ്കൃത വസ്തുവായ ക്രൂഡ് ഓയിലിന്റെ ഭൂരിഭാഗം ആവശ്യങ്ങളും നിറവേറ്റുന്നതിനായി 2022 മുതല് ഇന്ത്യ റഷ്യയെ ആണ് കൂടുതലായി ആശ്രയിക്കുന്നത്. ഗള്ഫ് മേഖലയിലെ സംഘര്ഷം മറ്റ് സ്രോതസുകളില് നിന്നുള്ള വിതരണത്തെ ബാധിച്ചതോടെ, റഷ്യന് ക്രൂഡ് ഓയില് വാങ്ങുന്നതില് ഇന്ത്യ റെക്കോര്ഡ് വര്ധനവ് രേഖപ്പെടുത്തി.
ജൂണിലും ജൂലൈയിലും ഇന്ത്യ പ്രതിദിനം 2.6 ദശലക്ഷം ബാരലിലധികം റഷ്യന് ക്രൂഡ് ഓയില് ഇറക്കുമതി ചെയ്തു; ഫെബ്രുവരിയില് ഇത് പ്രതിദിനം 1 ദശലക്ഷം ബാരല് മാത്രമായിരുന്നു. രാജ്യത്തിന്റെ മൊത്തം ക്രൂഡ് ഓയില് ഇറക്കുമതിയുടെ പകുതിയിലധികവും ഇപ്പോള് റഷ്യയില് നിന്നാണ്. റഷ്യയിലേക്ക് കയറ്റുമതി ചെയ്ത ഇന്ധനം റഷ്യന് ക്രൂഡ് ഓയില് ഉപയോഗിച്ച് തന്നെ നിര്മ്മിച്ചതാകാനാണ് സാധ്യത.
ലോകത്തിലെ ഏറ്റവും വലിയ ക്രൂഡ് ഓയില് കയറ്റുമതിക്കാരില് ഒന്നായ റഷ്യയ്ക്ക്, ഊര്ജ്ജ അടിസ്ഥാന സൗകര്യങ്ങള്ക്ക് നേരെയുണ്ടായ ഉക്രേനിയന് ഡ്രോണ് ആക്രമണങ്ങളെത്തുടര്ന്ന് ആഭ്യന്തര ഉല്പ്പാദനത്തില് 70 ശതമാനം വരെ കുറവുണ്ടായതോടെ ഗ്യാസോലിന് ഇറക്കുമതി ചെയ്യേണ്ടി വന്നു. ഇത് ഇന്ധന വിതരണത്തില് വലിയ പ്രതിസന്ധി സൃഷ്ടിച്ചു.
രാജ്യത്തുടനീളം ഇന്ധന വില്പ്പനയില് നിയന്ത്രണങ്ങള് തുടരുമ്പോള് തന്നെ പെട്രോളിയം ഉല്പ്പന്നങ്ങള് ഇറക്കുമതി ചെയ്യാന് മോസ്കോ നിര്ബന്ധിതരായി. ആഭ്യന്തര ഇന്ധന വിതരണവും ആവശ്യകതയും തമ്മിലുള്ള അന്തരം വര്ധിച്ചതോടെ, ഓഗസ്റ്റില് ഇന്ത്യ, തുര്ക്കി, മൊറോക്കോ എന്നീ രാജ്യങ്ങള് റഷ്യയിലേക്ക് ഗ്യാസോലിന് വിതരണം ചെയ്തു. ഉല്പ്പാദകര്ക്കും അല്ലാത്തവര്ക്കും ബാധകമായ ഗ്യാസോലിന് കയറ്റുമതി നിരോധനം 2027 ജനുവരി അവസാനം വരെ റഷ്യ ജൂലൈയില് നീട്ടിയിരുന്നു.
ഡീസല് കയറ്റുമതി നിരോധനം 2026 സെപ്റ്റംബര് 1 വരെയും നീട്ടിയിട്ടുണ്ട്. ഓഗസ്റ്റില് റഷ്യ ഇറക്കുമതി ചെയ്ത ഗ്യാസോലിനില് ഏകദേശം 55 ശതമാനവും (ഏകദേശം 2,60,000 ടണ്) ഉപരോധം നേരിടുന്ന കപ്പലുകളിലാണ് എത്തിയതെന്ന് വോര്ട്ടെക്സ അറിയിച്ചു. മൊത്തത്തില്, റഷ്യയുടെ ഓഗസ്റ്റിലെ ഗ്യാസോലിന് ഇറക്കുമതിയുടെ 40 ശതമാനത്തോളം ഷിപ്പ്-ടു-ഷിപ്പ് കൈമാറ്റങ്ങളിലൂടെയാണ് നടന്നത്.
ഇതില് ഭൂരിഭാഗവും കപ്പലുകള് തങ്ങളുടെ ഓട്ടോമാറ്റിക് ഐഡന്റിഫിക്കേഷന് സിസ്റ്റം സിഗ്നലുകള് ഓഫാക്കി, രഹസ്യമായാണ് നടത്തിയത്. ഗ്യാസോലിന് ഇറക്കുമതി കുത്തനെ വര്ധിച്ചെങ്കിലും, കയറ്റുമതി നിരോധനം, റിഫൈനറികള്ക്കുണ്ടായ കേടുപാടുകള്, ഇന്ധന ടെര്മിനലുകളിലെ തടസ്സങ്ങള് എന്നിവ കാരണം റഷ്യയുടെ ഡീസല് കയറ്റുമതി ഇപ്പോഴും വലിയ തോതില് പരിമിതപ്പെട്ടിരിക്കുകയാണ്.
Click it and Unblock the Notifications
Sign in with Google