ധോണിയുടെ മകള് സിവയുടെ ആദ്യത്തെ ഫോട്ടോ കാണണ്ടേ?
ഇന്ത്യന് ക്രിക്കറ്റ് ടീം ക്യാപ്റ്റന് എം എസ് ധോണിയുടെ മകള് സിവയുടെ ആദ്യത്തെ ഫോട്ടോ പുറത്ത്. സിവയുടെ അമ്മയും ധോണിയുടെ ഭാര്യയുമായ സാക്ഷി ധോണിയാണ് സിവയുടെ ആദ്യത്തെ ചിത്രം പരസ്യമാക്കിയത്. മൈക്രോ ബ്ലോഗിംഗ് സൈറ്റായ ട്വിറ്ററിലാണ് സാക്ഷി കുഞ്ഞിന്റെ ചിത്രം പോസ്റ്റ് ചെയ്തത്.
ധോണി - സാക്ഷി ദമ്പതികളുടെ കുഞ്ഞിന്റെ ആദ്യത്തെ ചിത്രം കാണാന് കൊതിച്ചെത്തിയവര് തെല്ല് നിരാശരായിട്ടുണ്ടാകും എന്ന് പറഞ്ഞാലും തെറ്റില്ല. കാരണം കുഞ്ഞിന്റെ മുഖം സാക്ഷി ട്വിറ്ററില് പോസ്റ്റ് ചെയ്തിട്ടില്ല. സിവയുടെ ഇടത്തേ കൈയ്യുടെ ചിത്രമാണ് ട്വിറ്ററിലുള്ളത്. ഈ കൈ അമ്മ സാക്ഷിയുടെ കൈയില് പിടിച്ചിരിക്കുന്നു.
സന്തോഷത്തിന്റെ കെട്ട് എന്നാണ് സാക്ഷി ധോണി ട്വിറ്ററിലെ ഫോട്ടോയ്ക്ക് അടിക്കുറിപ്പിട്ടത്. കുട്ടി ജനിച്ചയുടന് മനോഹരമായ ഈ ലോകത്തിലേക്ക് സ്വാഗതം സിവ എന്ന് സാക്ഷി പോസ്റ്റിട്ടിരുന്നു. ഫെബ്രുവരി 9ന് ഇട്ട ഈ പോസ്റ്റിലാണ് സാക്ഷി മകളുടെ പേര് പുറത്ത് വിട്ടത്. സാക്ഷി - ധോണി ദമ്പതികളുടെ ആദ്യത്തെ കുട്ടിയാണിത്.
ഗുഡ്ഗാവിലെ ഒരു സ്വകാര്യ ആശുപത്രിയില് വെച്ചായിരുന്നു സാക്ഷി ധോണി പെണ്കുഞ്ഞിന് ജന്മം നല്കിയത്. 33കാരനായ ധോണി ഇപ്പോള് ലോകകപ്പ് ക്രിക്കറ്റ് മത്സരങ്ങളുമായി ഓസ്ട്രേലിയയിലാണ്. മകള് കാത്തിരിക്കട്ടെ ആദ്യം ലോകകപ്പ്, അതാണ് പ്രധാനം എന്നായിരുന്നു മകളെ കാണാന് പോകുന്നില്ലേ എന്ന ചോദ്യത്തിന് ധോണി നല്കിയ മറുപടി.