'നന്ദി സഖാവേ'; തമിഴിലെ പിണറായി ട്വീറ്റിന് സ്റ്റാലിന്റെ വക മലയാളത്തിൽ റീട്വീറ്റ്

Updated: Wednesday, March 2, 2022, 10:57 [IST]

ചെന്നൈ: കേരള മുഖ്യമന്ത്രി പിണറായി വിജയന് മലയാളത്തിൽ നന്ദി അറിയിച്ച് തമിഴ്നാട് മുഖ്യമന്ത്രി എം കെ സ്റ്റാലിൻ. സ്റ്റാലിന്റെ ജന്മദിനത്തിൽ ആയിരുന്നു സംഭവം നടന്നത്. എം കെ സ്റ്റാലിന്റെ ജന്മദിനത്തിൽ അദ്ദേഹത്തിന് ആശംസകൾ അറിയിച്ചു പിണറായി വിജയൻ തമിഴിൽ ട്വീറ്റ് രേഖപ്പെടുത്തിയിരുന്നു.

എന്നാൽ, പിറന്നാൾ ആശംസയ്ക്ക് പിന്നാലെയാണ് മലയാളത്തിലുള്ള ട്വീറ്റും എത്തിയത്. മുഖ്യമന്ത്രിയുടെ ട്വീറ്റിന് മറുപടിയായിരുന്നു സ്റ്റാലിന്റെ സ്നേഹ സന്ദേശം. "നന്ദി സഖാവേ"... എന്നായിരുന്നു സ്റ്റാലിന്റെ മറുപടി. മലയാളത്തിൽ ആണ് തിരിച്ച് സ്റ്റാലിൻ ട്വീറ്റ് ചെയ്തത്.

അതേസമയം തമിഴ്നാട് മുഖ്യമന്ത്രി എം എ സ്റ്റാലിനെ നേരിൽ കണ്ടാണ് പിണറായി വിജയൻ ജന്മദിനാശംസകൾ അറിയിച്ചിരുന്നത്. ഈ കൂടിക്കാഴ്ചയ്ക്ക് പിന്നാലെ മുഖ്യമന്ത്രി പിണറായി വിജയൻ തന്റെ ഔദ്യോഗിക ഫേസ്ബുക്കിലൂടെയും ട്വിറ്ററിലൂടെയും ആശംസ നേർന്നിരുന്നു.

'പ്രിയപ്പെട്ട സ്റ്റാലിനെ നേരിൽ കണ്ട് ജന്മദിനാശംസകൾ നേർന്നു. കേരളവും തമിഴ്‌നാടും തമ്മിലുള്ള ചരിത്രപരമായ ബന്ധം ശക്തിപ്പെടുത്താനും ഇന്ത്യൻ ഭരണഘടന ഉയർത്തിപ്പിടിക്കുന്ന ഫെഡറലിസം, മതേതരത്വം, ബഹുസ്വരത, സാമൂഹിക നീതി തുടങ്ങിയ ഉന്നതമായ ആശയങ്ങൾക്കുവേണ്ടി തുടര്‍ന്നും പോരാടാനും നമ്മുടെ ജനാധിപത്യത്തെ ശക്തിപ്പെടുത്താനും അദ്ദേഹത്തിന് കഴിയട്ടെ എന്ന് ആശംസിക്കുന്നു' - എന്നതായിരുന്നു മുഖ്യമന്ത്രി പിണറായി വിജയന്റെ ട്വീറ്റ്.

അതേസമയം , കഴിഞ്ഞ ദിവസം സ്റ്റാലിന്റെ പുസ്തക പ്രകാശന ചടങ്ങിലും പിണറായി വിജയൻ എത്തിയിരുന്നു. മലയാളികളും തമിഴരും ഒരേ മണ്ണിന്റെ മക്കൾ ആണെന്ന് പിണറായി പുസ്തക പ്രകാശന ചടങ്ങിൽ വ്യക്തമാക്കിയിരുന്നു. ഈ ബന്ധം കൂടുതൽ ശക്തമാക്കി ഉണ്ടെന്നും ഈ രാജ്യത്തെ എല്ലാ പൗരന്മാർക്കും തുല്യ നീതി വേണമെന്നും മുഖ്യമന്ത്രി പിണറായി വിജയൻ വ്യക്തമാക്കിയിരുന്നു. ഇത്തരം കാര്യങ്ങൾക്കായി എല്ലാവരും ഒന്നിച്ച് നിൽക്കണം എന്നാണ് പിണറായി വിജയൻ ചടങ്ങിൽ പറഞ്ഞു.