കാണാന്‍ പെണ്‍കുട്ടിയെ പോലെയെന്ന് പറഞ്ഞ് കളിയാക്കി; സഹപാഠിയെ കുത്തിക്കൊന്ന് പ്ലസ് ടു വിദ്യാര്‍ത്ഥി

ചെന്നൈ: പെണ്‍കുട്ടി എന്ന് വിളിച്ച് കളിയാക്കിയതിന് സഹപാഠിയെ കുത്തിക്കൊന്ന് പ്ലസ് ടു വിദ്യാര്‍ത്ഥി. തമിഴ്നാട്ടിലെ കള്ളക്കുറിച്ചി ജില്ലയിലാണ് ഞെട്ടിക്കുന്ന സംഭവം. കേസില്‍ പ്രതിയായ വിദ്യാര്‍ഥിയെ പൊലീസ് അറസ്റ്റ് ചെയ്തു. പ്രായപൂര്‍ത്തിയാകാത്തതിനാല്‍ കുട്ടിയെ ഒബ്സര്‍വേഷന്‍ ഹോമിലേക്ക് മാറ്റിയിരിക്കുകയാണ്. കഴിഞ്ഞ ശനിയാഴ്ചയാണ് വിദ്യാര്‍ഥി സഹപാഠിയെ വിളിച്ച് വരുത്തി കൊലപ്പെടുത്തിയത് എന്ന് പൊലീസ് പറയുന്നു.

കൊല്ലപ്പെട്ട ആണ്‍കുട്ടി പ്രതിയായ വിദ്യാര്‍ത്ഥിയെ കളിയാക്കുന്നത് പതിവായിരുന്നു. പെണ്‍കുട്ടിയെ പോലയാണ് കാണാമനെന്ന് പറഞ്ഞാണ് സഹപാഠി പ്രതിയെ പരിഹസിച്ചിരുന്നത്. തന്നെ ഇങ്ങനെ വിളിക്കരുത് എന്ന് പറഞ്ഞ് ഇതിനെ പലതവണ എതിര്‍ത്തിരുന്നെങ്കിലും സഹപാഠി പരിഹാസം തുടരുകയായിരുന്നു എന്നാണ് പൊലീസിനോട് കുട്ടി പറഞ്ഞത്.. ഇതോടെയാണ് സഹപാഠിയെ പാര്‍ട്ടിയ്ക്കെന്ന് പറഞ്ഞ് വിളിച്ച് വരുത്തി കൊലപ്പെടുത്തിയത് എന്നാണ് പൊലീസ് പറയുന്നത്.

സ്‌കൂളിന് സമീപത്തെ ഒരിടത്തേക്കാണ് സഹപാഠിയെ പ്രതിയായ കുട്ടി വിളിച്ച് വരുത്തിയത്. തുടര്‍ന്ന് അരിവാളും കത്തിയും ഉപയോഗിച്ച് കുത്തിയും വെട്ടിയും സഹപാഠിയെ കൊല്ലുകയായിരുന്നു. സംഭവത്തില്‍ കൊലപാതകത്തിന് കേസ് രജിസ്റ്റര്‍ ചെയ്തിട്ടുണ്ടെന്ന് തമിഴ്‌നാട് പൊലീസ് പറഞ്ഞു. കൂടുതല്‍ അന്വേഷണം നടന്നുകൊണ്ടിരിക്കുകയാണ് എന്നും പ്രായപൂര്‍ത്തിയാകാത്ത ഒരാള്‍ നടത്തിയ നിഷ്ഠൂരമായ കൊലപാതകം ഞെട്ടിപ്പിക്കുന്നതാണെന്നും പൊലീസ് അറിയിച്ചു.

അതേസമയം പ്രതി കുറ്റം സമ്മതിച്ചിട്ടുണ്ട് എന്നും താന്‍ നേരിട്ട ഭീഷണിപ്പെടുത്തലും ബോഡി ഷെയ്മിംഗുമാണ് കുട്ടിയെ കൊലപാതകത്തിലേക്ക് നയിച്ചതെന്നും സബ് ഇന്‍സ്‌പെക്ടര്‍ ശിവചന്ദ്രന്‍ പറഞ്ഞു. അധ്യാപകരെ ലക്ഷ്യമിട്ട് ആക്രമിക്കുന്നതും ക്ലാസുകളിലെ അനുചിതമായ പെരുമാറ്റവും ഉള്‍പ്പെടെ വിദ്യാര്‍ത്ഥികളുടെ പെരുമാറ്റ പ്രശ്നങ്ങളില്‍ തമിഴ്നാട് ഈയിടെയായി വര്‍ദ്ധിച്ചുവരികയാണ്. കഴിഞ്ഞ മാസം ആദ്യം വിദ്യാര്‍ത്ഥി അധ്യാപകനെ ഭീഷണിപ്പെടുത്തുന്ന ഒരു വീഡിയോ പുറത്തുവന്നിരുന്നു.

ബോഡി ഷെയ്മിംഗ് ഉത്കണ്ഠയ്ക്കും വിഷാദത്തിനും ബോഡി ഡിസ്മോര്‍ഫിക് ഡിസോര്‍ഡറിനും കാരണമാകുന്നു. പലപ്പോഴും ഇത് ദേഷ്യമോ കടുത്ത വിഷാദമോ ആയി പ്രതിഫലിപ്പിക്കുന്നു എന്ന് സംഭവത്തിന് പിന്നാലെ സംസ്ഥാന ബാലാവകാശ സംരക്ഷണ കമ്മീഷന്‍ അംഗം ഡോ. ശരണ്യ ജയ്കുമാര്‍ പറഞ്ഞു. ബോഡി ഷെയ്മിങ്ങിന്റെ പേരില്‍ ഒരു വിദ്യാര്‍ത്ഥി നടത്തിയ ഈ കൊലപാതകം പുതിയ ആശങ്കയ്ക്ക് കാരണമായിട്ടുണ്ട്.

സംസ്ഥാന സര്‍ക്കാര്‍ സ്റ്റുഡന്റ് കൗണ്‍സിലിംഗ് ശക്തമാക്കിയിട്ടുണ്ടെന്നും പരിധി ലംഘിക്കുന്നവരെ ട്രാന്‍സ്ഫര്‍ സര്‍ട്ടിഫിക്കറ്റില്‍ പ്രതികൂലമായ പരാമര്‍ശങ്ങളോടെ സ്‌കൂളുകളില്‍ നിന്ന് പിരിച്ചുവിടുമെന്നും വിദ്യാഭ്യാസ മന്ത്രി അന്‍ബില്‍ മഹേഷ് പൊയ്യമൊഴി പറഞ്ഞു.

English summary

Plus Two student stabs classmate for calling him looks like girl