മൻസൂഖ് മാണ്ഡാവ്യ ആരോഗ്യ മന്ത്രി, സിന്ധ്യയ്ക്ക് വ്യോമയാന വകുപ്പ്; പുനഃസംഘടനയിൽ വകുപ്പുകളിലെ മാറ്റങ്ങൾ ഇങ്ങനെ...

കെമിക്കൽ രാസവള വകുപ്പിന്റെ ചുമതലയും മൻസൂഖ് മാണ്ഡ്യയ്ക്കാണ്

Updated: Thursday, July 8, 2021, 0:00 [IST]

ന്യൂഡൽഹി: രണ്ടാം മോദി മന്ത്രിസഭയിലെ ആദ്യ പുനഃസംഘടന പൂർത്തിയാകുമ്പോൾ വകുപ്പുകളിലും കാര്യമായ അഴിച്ചുപണി. ക്യാബിനറ്റ് റാങ്ക് ലഭിച്ച മൻസൂഖ് മാണ്ഡ്യവ്യയെ ആരോഗ്യ മന്ത്രിയായി നിയമിച്ചു. പുനഃസംഘടനയിൽ ഏറ്റവും സുപ്രധാനമായ വകുപ്പായിരുന്നു ആരോഗ്യം. കോവിഡ് വ്യാപനത്തിന്റെ പശ്ചാത്തലത്തിൽ സർക്കാർ ഏറെ പഴികേൾക്കുകയും ചെയ്തിരുന്നു. ഈ സാഹചര്യത്തിലാണ് വകുപ്പിന്റെ ചുമതലയുണ്ടായിരുന്ന ഹർഷ വർധനും സഹമന്ത്രി അശ്വിനി കുമാറും രാജിവെച്ചത്. കെമിക്കൽ രാസവള വകുപ്പിന്റെ ചുമതലയും മൻസൂഖ് മാണ്ഡാവ്യയ്ക്കാണ്.

അതേസമയം ശാസ്ത്ര സാങ്കേതിക വകുപ്പ് ഇനി പ്രധാനമന്ത്രി നരേന്ദ്ര മോദിക്ക് കീഴിൽ വരും. പുതിയ സഹകരണ വകുപ്പിന്റെ ചുമതല മന്ത്രിസഭയിലെ രണ്ടാമനായ അമിത് ഷായ്ക്കാണ്. നിതിൻ ഗഡ്കരി, നിർമല സീതാരാമൻ, നരേന്ദ്ര സിങ് ഠോമർ തുടങ്ങി മന്ച്രിസഭയിലെ മറ്റ് പ്രമുഖരുടെ വകുപ്പുകളിലൊന്നും മാറ്റമില്ല.

ജ്യോതിരാദിത്യ സിന്ധ്യയെ വ്യോമയാന വകുപ്പ് മന്ത്രിയായി നിയമിച്ചു. ഈ വകുപ്പ് കൈകാര്യം ചെയ്തിരുന്ന ഹർദീപ് സിങ് പൂരിക്ക് ക്യാബിനറ്റിലേക്ക് സ്ഥാനക്കയറ്റം ലഭിച്ചപ്പോൾ നഗരവികസനത്തിനൊപ്പം പെട്രോളിയം വകുപ്പിന്റെ ചുമതലയും ലഭിച്ചു. അശ്വനി വൈഷ്ണവാണ് റെയിൽവേ, ഐടി മന്ത്രി. ധനകാര്യ വകുപ്പിൽ സഹമന്ത്രിയായിരുന്ന അനുരാഗ് ഠാക്കൂറിന് ക്യാബിനറ്റ് പദവിക്കൊപ്പം വാർത്ത പ്രക്ഷേപണ വകുപ്പും സ്പോർട്സ്, യുവജാനകാര്യത്തിന്റെ ചുമതലയും ലഭിച്ചു.

ഗിരിരാജ് സിങ്ങിന് ഗ്രാമവികസനവും പശുപതി കുമാർ പാരസിന് ഭക്ഷ്യസംസ്കാരണത്തിന്റെയും ചുമതല ലഭിച്ചപ്പോൾ ഭൂപേന്ദ്ര യാദവാണ് പുതിയ തൊഴിൽ, പരിസ്ഥിതി മന്ത്രി. മുൻ അസം മുഖ്യമന്ത്രി സർബാനന്ദ സോനോവാൾ ഷിപ്പിങ്, ആയുഷ് വകുപ്പുകൾ കൈകാര്യം ചെയ്യും. പിയൂഷ് ഗോയലിനെ വാണിജ്യം, വ്യവസായം, ഭക്ഷ-പൊതുവിതരണം, ടെക്സ്റ്റെയിൽസ് മന്ത്രിയായി നിയമിച്ചു. നാരായൺ റാണെയ്ക്ക് ചെറുകിട വ്യവസായത്തിന്റെ ചുമതലയും നൽകി.