ട്രംപിനും എനിക്കും ഒരേ മനസ്... ധൈര്യശാലി, ആത്മവിശ്വാസമുള്ളയാള്; പുകഴ്ത്തി മോദി
ന്യൂഡല്ഹി: യുഎസ് പ്രസിഡന്റ് ഡൊണാള്ഡ് ട്രംപിനെ പുകഴ്ത്തി പ്രധാനമന്ത്രി നരേന്ദ്ര മോദി. ട്രംപ് ആത്മവിശ്വാസവും ധൈര്യവും വേണ്ടുവോളമുള്ളയാളാണ് എന്ന് മോദി പറഞ്ഞു. എഐ ഗവേഷകനായ ലെക്സ് ഫ്രിഡ്മാനുമായി നടത്തിയ പോഡ്കാസ്റ്റില് ആയിരുന്നു അദ്ദേഹത്തിന്റെ പ്രതികരണം. യുഎസ് പ്രസിഡന്റ് സ്ഥാനത്തേക്കുള്ള തിരിച്ചുവരവിന് അദ്ദേഹം വലിയ തയ്യാറെടുപ്പാണ് നടത്തിയത് എന്നും മോദി ചൂണ്ടിക്കാട്ടി.
''പ്രസിഡന്റ് ട്രംപിന്റെ ആദ്യ ടേമിലും രണ്ടാം ടേമിലും ഞാന് അദ്ദേഹത്തെ നിരീക്ഷിച്ചിട്ടുണ്ട്. ഇത്തവണ, അദ്ദേഹം മുമ്പത്തേക്കാള് വളരെ തയ്യാറാണെന്ന് തോന്നുന്നു. അദ്ദേഹത്തിന്റെ മനസ്സില് വ്യക്തമായ ഒരു റോഡ് മാപ്പ് ഉണ്ട്, ഓരോന്നും അദ്ദേഹത്തെ തന്റെ ലക്ഷ്യങ്ങളിലേക്ക് നയിക്കാന് രൂപകല്പ്പന ചെയ്തിരിക്കുന്നു,''മോദി വ്യക്തമാക്കി. ട്രംപിന്റെ ദര്ശനം നടപ്പിലാക്കാന് അദ്ദേഹത്തിന്റെ ടീമിന് പൂര്ണ്ണമായും കഴിവുണ്ടെന്ന് പ്രധാനമന്ത്രി പറഞ്ഞു.
'അദ്ദേഹത്തിന്റെ ടീമിലെ അംഗങ്ങളെ കാണാനുള്ള അവസരവും എനിക്ക് ലഭിച്ചു, അദ്ദേഹം ശക്തരും കഴിവുള്ളവരുമായ ഒരു സംഘത്തെ ഒരുമിച്ച് ചേര്ത്തിട്ടുണ്ട്. തുളസി ഗബ്ബാര്ഡ്, വിവേക് രാമസ്വാമി, എലോണ് മസ്ക് തുടങ്ങി നിരവധി ആളുകളെ ഞാന് കണ്ടുമുട്ടി, ഒരു കുടുംബത്തിന് സമാനമായ അന്തരീക്ഷമാണ് എനിക്ക് അനുഭവപ്പെട്ടത്,' അദ്ദേഹം പറഞ്ഞു. ഹൂസ്റ്റണില് നടന്ന ഹൗഡി മോദി പരിപാടിയില് ട്രംപിനൊപ്പം വേദി പങ്കിട്ട നിമിഷം മോദി അനുസ്മരിച്ചു.
വലിയൊരു ഇന്ത്യന് പ്രവാസി സമൂഹം പരിപാടിക്കായി ഒത്തുകൂടിയതിനാല് ആ പരിപാടി തനിക്ക് അവിസ്മരണീയമായിരുന്നുവെന്നും അദ്ദേഹം പറഞ്ഞു. ''ഹൂസ്റ്റണില് ഞങ്ങള്ക്ക് ഒരു പരിപാടി ഉണ്ടായിരുന്നു, ഹൗഡി മോദി. പ്രസിഡന്റ് ട്രംപും ഞാനും അവിടെ ഉണ്ടായിരുന്നു. സ്റ്റേഡിയം മുഴുവന് നിറഞ്ഞിരുന്നു. യുഎസിലെ ഒരു രാഷ്ട്രീയ റാലിക്ക് ഇത് അസാധാരണമായിരുന്നു. ഇന്ത്യന് പ്രവാസികള് വന്തോതില് ഒത്തുകൂടി,' പ്രധാനമന്ത്രി പറഞ്ഞു.
പരിപാടിയെ അഭിസംബോധന ചെയ്ത് ഞങ്ങള് രണ്ട് പേരും പ്രസംഗിച്ചു. അദ്ദേഹം താഴെ ഇരുന്നു, എന്റെ പ്രസംഗം ശ്രദ്ധിച്ചു. അതാണ് അദ്ദേഹത്തിന്റെ വിനയം. ഞാന് വേദിയില് നിന്ന് സംസാരിക്കുമ്പോള് അമേരിക്കന് പ്രസിഡന്റ് സദസില് ഇരിക്കുകയായിരുന്നു. സമ്മേളനത്തെ അഭിസംബോധന ചെയ്ത ശേഷം ജനങ്ങള്ക്കിടയിലൂടെ നടക്കാന് താനാണ് ട്രംപിനെ ക്ഷണിച്ചത് എന്നും മോദി അവകാശപ്പെട്ടു.
യുഎസിലെ കര്ശനമായ സുരക്ഷാ പ്രോട്ടോക്കോളുകള് പ്രകാരം അത് അസാധാരണമാണെങ്കിലും ട്രംപ് ഒരു മടിയും കൂടാതെ സമ്മതിച്ചുവെന്നും തന്നോടൊപ്പം നടക്കാന് തുടങ്ങിയെന്നും അദ്ദേഹം പറഞ്ഞു. പരസ്പര വിശ്വാസത്തിന്റെ വികാരമായിരുന്നു അപ്പോള് എനിക്ക് തോന്നിയത്. ഒരു സുരക്ഷ പോലും ചോദിക്കാതെ ട്രംപ് അന്ന് ആയിരക്കണക്കിന് ആളുകളുടെ ഇടയിലേക്ക് നടന്നു നീങ്ങുന്നത് ശരിക്കും അത്ഭുതകരമായിരുന്നു എന്നും മോദി പറഞ്ഞു.
താന് ആദ്യം ഇന്ത്യ എന്ന് പറയുന്നത് പോലെയാണ് അദ്ദേഹം ആദ്യം അമേരിക്ക എന്ന് പറയുന്നത് എന്നും മോദി ചൂണ്ടിക്കാട്ടി. വിവിധ അവസരങ്ങളിലും വ്യത്യസ്ത സന്ദര്ഭങ്ങളിലും അദ്ദേഹം തന്നെ പരസ്യമായി അഭിനന്ദിക്കുന്നത് അദ്ദേഹത്തിന്റെ ഹൃദയവിശാലതയെ സൂചിപ്പിക്കുന്നു എന്നും മോദി പറഞ്ഞു.
Click it and Unblock the Notifications
Sign in with Google