ജോലിക്ക് പോകാതെ തന്നെ മാസം 20,000 രൂപ നേടാം; ഇതാണ് വഴി

ജോലിയിൽ നിന്ന് വിരമിച്ച ശേഷം സുരക്ഷിതമായ വരുമാനം ആഗ്രഹിക്കുന്നവർക്ക് ഏറ്റവും അനുയോജ്യമായ പദ്ധതികളിലൊന്നാണ് പോസ്റ്റ് ഓഫീസ് സീനിയർ സിറ്റിസൺ സേവിംഗ്‌സ് സ്‌കീം (SCSS). വിരമിക്കൽ സമയത്ത് ലഭിക്കുന്ന തുക എവിടെ നിക്ഷേപിക്കണം എന്ന് ആശങ്കപ്പെടുന്നവർക്ക് സർക്കാർ ഗ്യാരണ്ടിയോടെ ഉയർന്ന പലിശ വാഗ്ദാനം ചെയ്യുന്ന ഈ പദ്ധതി മികച്ചൊരു തിരഞ്ഞെടുപ്പാണ്.

പദ്ധതിയുടെ പ്രത്യേകതകൾ

60 വയസ് കഴിഞ്ഞ ഏതൊരു ഇന്ത്യൻ പൗരനും ഈ പദ്ധതിയിൽ ചേരാം. 55 മുതൽ 60 വയസ്സിനുള്ളിൽ സ്വയം വിരമിച്ച (VRS) സർക്കാർ ജീവനക്കാർക്കും, 50 വയസ്സ് കഴിഞ്ഞ പ്രതിരോധ സേനാംഗങ്ങൾക്കും നിബന്ധനകളോടെ ഈ അക്കൗണ്ട് തുടങ്ങാവുന്നതാണ്. ഒറ്റയ്ക്കോ പങ്കാളിയോടൊപ്പം ചേർന്നോ ജോയിന്റ് അക്കൗണ്ടായും ഇത് ആരംഭിക്കാം.

ഉയർന്ന പലിശയും വരുമാനവും

നിലവിൽ 8.2 ശതമാനമാണ് ഈ പദ്ധതിയുടെ വാർഷിക പലിശ നിരക്ക്. ബാങ്ക് സ്ഥിര നിക്ഷേപങ്ങളേക്കാൾ ഉയർന്ന പലിശയാണ് ഇതിലൂടെ ലഭിക്കുന്നത്. പരമാവധി 30 ലക്ഷം രൂപ വരെ ഈ അക്കൗണ്ടിൽ നിക്ഷേപിക്കാൻ സാധിക്കും. ഒരാൾ 30 ലക്ഷം രൂപ നിക്ഷേപിച്ചാൽ വർഷത്തിൽ 2.46 ലക്ഷം രൂപ പലിശയായി ലഭിക്കും. അതായത് പ്രതിമാസം ഏകദേശം 20,500 രൂപ വരുമാനം ഉറപ്പാക്കാം. ഈ പലിശ തുക ഓരോ മൂന്ന് മാസം കൂടുമ്പോഴും നിക്ഷേപകന്റെ അക്കൗണ്ടിലേക്ക് എത്തും.

പോസ്റ്റ് ഓഫീസ് എസ്‌സിഎസ്എസ് പദ്ധതിയിലെ നിക്ഷേപത്തിന് ആദായനികുതി നിയമത്തിലെ 80C പ്രകാരം 1.5 ലക്ഷം രൂപ വരെ നികുതി ഇളവ് ലഭിക്കും. എന്നാൽ പലിശ വരുമാനം ഒരു നിശ്ചിത പരിധിയിൽ കൂടുതലാണെങ്കിൽ അതിന് നികുതി ബാധകമായിരിക്കും.

കാലാവധിയും നിക്ഷേപവും
അഞ്ച് വർഷമാണ് ഈ പദ്ധതിയുടെ കാലാവധി. ആവശ്യമെങ്കിൽ കാലാവധി കഴിഞ്ഞ ശേഷം മൂന്ന് വർഷത്തേക്ക് കൂടി പദ്ധതി നീട്ടാവുന്നതാണ്. അടിയന്തര സാഹചര്യങ്ങളിൽ അക്കൗണ്ട് ക്ലോസ് ചെയ്യാനുള്ള സൗകര്യമുണ്ടെങ്കിലും ചെറിയൊരു തുക പിഴയായി നൽകേണ്ടി വരും. ഒരു വർഷത്തിനുള്ളിൽ അക്കൗണ്ട് ക്ലോസ് ചെയ്താൽ പലിശ ലഭിക്കില്ല.

വിരമിക്കൽ ജീവിതം സാമ്പത്തിക ഭദ്രതയുള്ളതാക്കാൻ ആഗ്രഹിക്കുന്നവർക്ക് പോസ്റ്റ് ഓഫീസ് സീനിയർ സിറ്റിസൺ സേവിംഗ്‌സ് സ്‌കീം വലിയൊരു ആശ്വാസമാണ്. സുരക്ഷിതമായ നിക്ഷേപത്തിലൂടെ സ്ഥിരവരുമാനം കണ്ടെത്താൻ ഈ പദ്ധതി സഹായിക്കുന്നു.