സച്ചിന് സ്മരണികയും പോസ്റ്റല് സ്റ്റാമ്പും
മുംബൈ: ടെസ്റ്റ് ക്രിക്കറ്റില് നിന്നും വിരമിക്കുന്ന സച്ചിനെ ബി സി സി ഐ പോസ്റ്റല് സ്റ്റാംപിലുമാക്കുന്നു. ടോസിടാന് സച്ചിന് നാണയവും കളി ടിക്കറ്റില് സച്ചിന്റെ പടവും ഉപയോഗിക്കുന്നതിന് പുറമേയാണ് ക്രിക്കറ്റ് ബോര്ഡ് സച്ചിനെ പോസ്റ്റല് സ്്റ്റാംപിലാക്കുന്നത്.
സച്ചിന് തെണ്ടുല്ക്കര് ടെസ്റ്റ് ക്രിക്കറ്റില് നിന്നും വിരമിക്കുന്നതിന്റെ സ്മരണികയായാണ് പോസ്റ്റല് സ്റ്റാംപില് സച്ചിനെ കൊണ്ടുവരുന്നത്. ബി സി സി ഐയും എം സി എയും ചേര്ന്നാണ് സച്ചിന് സ്റ്റാംപ് അവതരിപ്പിക്കുന്നത് - മുംബൈ ക്രിക്കറ്റ് അസോസിയേഷന് പ്രസ്താവനയില് അറിയിച്ചു.
സച്ചിന്റെ വിരമിക്കലിനോട് അനുബന്ധിച്ച് 64 പേജുള്ള ഒരു സ്മരണികയും അസോസിയേഷന് പുറത്തിറക്കുന്നുണ്ട്. സ്പോര്ട്സ്, ബിസിനസ്, ജേര്ണലിസം തുടങ്ങിയ രംഗങ്ങളിലുള്ളവര് സച്ചിനെക്കുറിച്ച് പറഞ്ഞ കാര്യങ്ങളാണ് സ്മരണികയില് ഉണ്ടാകുക.
സച്ചിന്റെ അവസാനടെസ്റ്റിന് വേണ്ടിയുള്ള കാത്തിരിപ്പിലാണ് മുംബൈ നഗരം. ദിവസവും പതിനായിരത്തിലധികം സച്ചിന് മാസ്കുകളാണ് വിറ്റുപോകുന്നത് എന്നാണ് കണക്കുകള്. പതിനായിരക്കണക്കിന് സച്ചിന് സ്കോര് കാര്ഡുകളും വിറ്റുപോകുന്നുണ്ടത്രെ.
സച്ചിന്റെ മുഖമുള്ള നാണയമാണ് ടോസിന് വേണ്ടി ഉപയോഗിക്കുക എന്ന് എം സി എ നേരത്തെ അറിയിച്ചിരുന്നു. ഈ സ്വര്ണനാണയം പിന്നീട് മുംബൈ ക്രിക്കറ്റ് അസോസിയേഷന് സൂക്ഷിച്ചുവെക്കും.