പ്രത്യുഷയുടെ മരണം; നടിമാര്‍ക്കെതിരെ നടപടി ഉണ്ടായേക്കും

By Anwar Sadath

Updated: Thursday, April 14, 2016, 15:53 [IST]

മുംബൈ: ടെലിവിഷന്‍ നടി പ്രത്യുഷ ബാനര്‍ജിയുടെ മരണവുമായി ബന്ധപ്പെട്ട് നടിമാരായ രാഖി സാവന്തും, ഡോളി ബിന്ദ്രയും കുഴപ്പത്തില്‍. വായില്‍ തോന്നുന്നത് അപ്പപ്പോള്‍ വിളിച്ചു പറയുന്ന ഇരുവര്‍ക്കുമെതിരെ നടപടിയെടുക്കാന്‍ CINTAA (Cine and TV Artistes' Association) തീരുമാനിച്ചതായാണ് റിപ്പോര്‍ട്ട്. പ്രത്യുഷയുടെ മരണത്തിനുശേഷം ഇരുവരും നടത്തിയ വ്യത്യസ്ത അഭിപ്രായ പ്രകടനങ്ങളാണ് നടപടിക്ക് കാരണം.

നടിമാര്‍ക്ക് രണ്ടുപേര്‍ക്കും നടപടിയുമായി ബന്ധപ്പെട്ട് ഉടന്‍ നോട്ടീസ് അയക്കുമെന്ന് CINTAA ചെയര്‍പേഴ്‌സണ്‍ അമിത് ബെഹല്‍ പറഞ്ഞു. രണ്ടുപേരുടെയും പരസ്യമായ പെരുമാറ്റം അത്യധികം മോശമായ രീതിയിലുള്ളതായിരുന്നു. മെയ് 1ന് നടക്കുന്ന വാര്‍ഷിക പൊതുയോഗത്തില്‍ ഇരുവരെയും വിലക്കുന്ന കാര്യം താന്‍ ഉന്നയിക്കുമെന്നും അദ്ദേഹം പറഞ്ഞു.

പ്രത്യുഷയുടെ അമ്മയുമായുള്ള കൂടുക്കാഴ്ചയുടെ വിശദാംശങ്ങള്‍ പരസ്യമായി പറഞ്ഞതിനെ തുടര്‍ന്ന് ഡോളി ബിന്ദ്രയ്‌ക്കെതിരെ വിമര്‍ശനം ഉണ്ടായിരുന്നു. രാഖി സാവന്ത് ആകട്ടെ പ്രത്യുഷയുടെ മരണം മുതലെടുത്ത് പതിവുപോലെ വാര്‍ത്താ പ്രാധാന്യം പിടിച്ചുപറ്റാനുള്ള ശ്രമമാണ് നടത്തിയത്.

പ്രത്യുഷയുടെ മരണം ആത്മഹത്യ നിയന്ത്രിക്കേണ്ടതിനെക്കുറിച്ച് ചിന്തിപ്പിക്കുന്നതാണെന്നും ഇതിനായി സീലിങ് ഫാന്‍ നിരോധിക്കണമെന്നുമായിരുന്നു രാഖി സാവന്തിന്റെ ആവശ്യം. ഒരു ഫാനുമായി പത്രസമ്മേളനത്തിനെത്തിയായിരുന്നു രാഖിയുടെ വേഷംകെട്ടല്‍. പ്രത്യുഷയെ മരണം മുതലെടുത്തും വാര്‍ത്തകളില്‍ ഇടം നേടാനാണ് രാഖിയുടെ ശ്രമമെന്ന് അന്നുതന്നെ വിമര്‍ശനമുണ്ടായിരുന്നു.