ഒട്ടേറെ പെണ്കുട്ടികളെ വഞ്ചിച്ചു, പണം തട്ടി; പ്രത്യുഷയുടെ കാമുകനെതിരെ അമ്മയുടെ കത്ത്
മുംബൈ: ടിവി നടി പ്രത്യുഷ ബാനര്ജിയുടെ മരണവുമായി ബന്ധപ്പെട്ട് പ്രത്യുഷയുടെ അമ്മ മഹാരാഷ്ട്ര മുഖ്യമന്ത്രി ദേവേന്ദ്ര ഫട്നവിസിന് കത്തയച്ചു. സംഭവത്തില് ക്രൈംബ്രാഞ്ച് അന്വേഷണം വേണമെന്നും നിലവിലുള്ള അന്വേഷണം തൃപ്തികരമല്ലെന്നും പ്രത്യുഷയുടെ അമ്മ സോമ ബാനര്ജി കത്തില് ചൂണ്ടിക്കാട്ടിയിട്ടുണ്ട്.
മകളുടെ മരണത്തിന്റെ പൂര്ണ ഉത്തരവാദിത്വം രാഹുല് രാജ് സിങ്ങിനാണെന്നും അമ്മയുടെ കത്തില് പറയുന്നു. മകളെ പ്രണയിച്ച് വഞ്ചിച്ച രാഹുലാണ് മരണത്തിന് കാരണക്കാരന്. പ്രത്യുഷയെ മാത്രമല്ല, ഒട്ടേറെ നിഷ്കളങ്കരായ പെണ്കുട്ടികളെ പ്രണയം നടിച്ച് വഞ്ചിക്കുകയും രാഹുല് ലക്ഷങ്ങള് തട്ടിയെടുക്കുകയും ചെയ്തതായി അവര് പറഞ്ഞു.
വിഷയത്തില് കൂടുതല് ശക്തമായ അന്വേഷണം വേണം. രാഹുല് കേസിലെ സാക്ഷികളെയും തങ്ങളെയും ഭീഷണിപ്പെടുത്തുകയാണ്. മകളുടെ മരണം വിഷാദരോഗംമൂലമുള്ളതാണെന്ന് വരുത്തിത്തീര്ക്കാനുള്ള ശ്രമവും നടക്കുന്നുണ്ട്. മകളുടെ ദുരൂഹ മരണത്തിന്റെ കാരണമറിയുക മാതാപിതാക്കളുടെ അവകാശമാണ്. അത് നിഷേധിക്കരുതെന്നും സോമ ബാനര്ജി കത്തില് വ്യക്തമാക്കി.
മഹാരാഷ്ട്ര ആഭ്യന്തരമന്ത്രി രഞ്ജിത്ത്, മുംബൈ പോലീസ് കമ്മീഷണര് എന്നവര്ക്കും കത്തിന്റെ പകര്പ്പ് നല്കിയിട്ടുണ്ട്. ബാലികാ വധു എന്ന സീരിയയിലൂടെ പ്രശസ്തയായ പ്രത്യുഷ ബാനര്ജിയെ ഏപ്രില് 1 നാണ് സ്വന്തം വസതിയില് ആത്മഹത്യ ചെയ്ത നിലയില് കണ്ടെത്തിയത്. കാമുകന് രാഹുലിനെ പോലീസ് പിന്നീട് അറസ്റ്റ് ചെയ്തിരുന്നു.