വദ്രയ്ക്കും എനിക്കും പ്രത്യേക ഇളവ് വേണ്ട: പ്രിയങ്ക
ദില്ലി: തനിക്കും ഭര്ത്താവ് റോബര്ട്ട് വദ്രയ്ക്കും വിമാനത്താവളത്തില് നല്ക്കുന്ന പ്രത്യേക ഇളവ് വേണ്ടെന്ന് കോണ്ഗ്രസ് അദ്ധ്യക്ഷ സോണിയാ ഗാന്ധിയുടെ മകള് പ്രിയങ്കാ ഗാന്ധി.
സോണിയാ ഗാന്ധിയുടെ മരുമകന് റോബര്ട്ട് വദ്രയ്ക്ക് വിമാനത്താവളത്തില് നല്കുന്ന വി ഐ പി പരിഗണന പുനപരിശോധിക്കാന് കഴിഞ്ഞ ദിവസം ആഭ്യന്തരമന്ത്രാലയം തീരുമാനിച്ച പശ്ചാത്തലത്തിലാണ് പ്രിയങ്കയുടെ പ്രതികരണം.
വിമാനത്താവളത്തില് പരിശോധനയ്ക്ക് ഇളവനുവദിച്ചവരുടെ പട്ടികയില് നിന്ന് തന്നെയും ഭര്ത്താവ് വദ്രയെയും പിന്വലിക്കണമെന്ന് പ്രിയങ്ക ആവശ്യപ്പെട്ടു. എസ് പി ജി ഡയറക്ടര്ക്ക് അയച്ചിട്ടുള്ള കത്തിലൂടെയാണ് പ്രിയങ്ക ഇക്കാര്യം ആവശ്യപ്പെട്ടത്.
സുരക്ഷാ പരിശോധന അര്ത്ഥവത്തായിരിക്കണമെന്നും അലങ്കാരികമാകരുതെന്നും വ്യോമയാന മന്ത്രി അശോക് ഗണപതിരാജു പറഞ്ഞതിന്റെ അടിസ്ഥാനത്തിലാണ് വദ്രയ്ക്കുള്ള ഇളവ് പരിശോധിക്കാന് ആഭ്യന്തരമന്ത്രാലയം തീരുമാനിച്ചത്. സുരക്ഷാ പരിശോധനകള് പ്രഹസനമാകരുതെന്നും മറ്റുള്ളവരെപോലെ വദ്രയെയും സുരക്ഷാ പരിശോധനയ്ക്ക് വിധേയനാക്കണമെന്നും ഗണപതിരാജു പറഞ്ഞിരുന്നു.
സോണിയാ ഗാന്ധിയുടെ മരുമകനെന്ന നിലയിലാണ് വദ്രയ്ക്ക് വി ഐ പി പരിഗണന നല്കിയത്. വദ്രയ്ക്ക് നല്കിയ ഇത്തരം ഇളവുകള്ക്കെതിരെ നേരത്തെയും പ്രതിഷേധങ്ങളുണ്ടായിരുന്നു.