സൈനികരുടെ കുടുംബത്തിന് സഹായവുമായി കായിക ലോകം.... സാമ്പത്തിക സഹായവുമായി ധവാന്‍

ദില്ലി: പുല്‍വാമയില്‍ കൊല്ലപ്പെട്ട സൈനികരുടെ കുടുംബത്തിന് സഹായഹസ്തവുമായി കായിക ലോകം. വീരേന്ദര്‍ സെവാഗാണ് ഇതിന് തുടക്കമിട്ടത്. ഇപ്പോഴിതാ ഇന്ത്യന്‍ ടീമംഗമായ ശിഖര്‍ ധവാനാണ് സഹായം വാഗ്ദാനം ചെയ്തിരിക്കുന്നത്. ട്വിറ്ററില്‍ വൈകാരികമായ വീഡിയോ പോസ്റ്റ് ചെയ്താണ് ധവാന്‍ സഹായം പ്രഖ്യാപിച്ചത്. സൈനികരുടെ കുടുംബത്തിന് ധനസഹായം നല്‍കുമെന്നാണ് പ്രഖ്യാപനം. തന്റെ ആരാധകരും എല്ലാ ഇന്ത്യക്കാരും വീരമൃത്യു വരിച്ച സൈനികരുടെ കുടുംബത്തെ സഹായിക്കാന്‍ മുന്നോട്ട് വരണമെന്നും ധവാന്‍ വീഡിയോയില്‍ ആഹ്വാനം ചെയ്തു.

നേരത്തെ വീരേന്ദര്‍ സെവാഗ് സൈനികരുടെ കുട്ടികള്‍ക്കുള്ള വിദ്യാഭ്യാസ ചെലവുകള്‍ ഏറ്റെടുക്കാമെന്ന് വ്യക്തമാക്കിയിരുന്നു. അതേസമയം ബോക്‌സിംഗ് താരം വിജേന്ദര്‍ സിംഗ് തന്റെ ഒരുമാസത്തെ ശമ്പളം നല്‍കുമെന്നാണ് പ്രഖ്യാപിച്ചത്. എല്ലാവരും ഇത്തരം സഹായങ്ങളുമായി മുന്നോട്ട് വരണമെന്ന് അദ്ദേഹം ആവശ്യപ്പെട്ടിട്ടുണ്ട്. ഹരിയാന പോലീസിലാണ് വിജേന്ദറിന് ജോലി. ഇറാനി ട്രോഫിയില്‍ കിരീടം നേടിയ വിദര്‍ഭ ടീമിന്റെ ക്യാപ്റ്റന്‍ ഫൈസ് ഫസല്‍ ടീമിന്റെ പ്രൈസ് മണി ജവാന്‍മാരുടെ കുടുംബത്തിന് നല്‍കുമെന്നാണ് പ്രഖ്യാപിച്ചത്. ജവാന്‍മാരുടെ ജീവത്യാഗത്തിന് ചെറിയൊരു ആദരം അര്‍പ്പിക്കല്‍ മാത്രമാണ് ഇതെന്നും ഫൈസ് ഫസല്‍ പറഞ്ഞു.

അതേസമയം ഇന്ത്യന്‍ താരം വിരാട് കോലി, സച്ചിന്‍ ടെണ്ടുല്‍ക്കര്‍, ഹര്‍ദിക് പാണ്ഡ്യ, രോഹിത് ശര്‍മ, വിവിഎസ് ലക്ഷ്മണ്‍, സുരേഷ് റെയ്‌ന, മുഹമ്മദ് കൈഫ് എന്നിവര്‍ നേരത്തെ തന്നെ അനുശോചനമറിയിച്ചിരുന്നു. ബിസിസിഐയുടെ ആക്ടിങ് പ്രസിഡന്റ് സികെ ഖന്ന സൈനികരുടെ കുടുംബാംഗങ്ങള്‍ക്ക് അഞ്ച് കോടി രൂപ നല്‍കണമെന്ന് ആവശ്യപ്പെട്ടിട്ടുണ്ട്. ഐപിഎല്‍ ടീമുകളോടും സംസ്ഥാന ബിസിസിഐ സമിതികളോടും നല്ലൊരു തുക സംഭാവന ചെയ്യാന്‍ ആവശ്യപ്പെട്ടിട്ടുണ്ട്. ബിസിസിഐ അഞ്ച് കോടി രൂപ തന്നെ ജവാന്‍മാരുടെ കുടുംബത്തിന് നല്‍കുമെന്നാണ് വ്യക്തമാക്കുന്നത്.

English summary

pulwama attack shikhar dhawan to donate money to families of soldiser