യുവാക്കൾക്ക് ജോലി:മാസത്തിൽ 400 യൂണിറ്റ് സൗജന്യ വൈദ്യുതി,പഞ്ചാബിൽ വാഗ്ധാനപ്പെരുമഴയുമായി അകാലിദൾ- ബിഎസ്പി സഖ്യം

ചണ്ഡിഗഡ്: പഞ്ചാബ് നിമയസഭാ തിരഞ്ഞെടുപ്പിനുള്ള തയ്യാറെടുപ്പുകൾ നടക്കുന്നതിനിടെ സംസ്ഥാനത്തെ ജനങ്ങൾക്ഷക്ക് വാഗ്ധാനപ്പെരുമഴയുമായി ശിരോമണി അകാലിദൾ. പാർട്ടി അധ്യക്ഷൻ സുഖ്ബീർ സിംഗ് ബാദലാണ് ബിഎസ്സി- ശിരോമണി അകാലിദൾ സഖ്യത്തെ സംസ്ഥാനത്ത് അധികാരത്തിലെത്തിച്ചാൽ മാസം തോറും 400 യൂണിറ്റ് വൈദ്യുതി സൌജന്യമായി നൽകുമെന്ന് പ്രഖ്യാപിച്ചിട്ടുള്ളത്. ബിജെപിയുമായുള്ള സഖ്യമുപേക്ഷിച്ചതിന് പിന്നാലെയുള്ള നിർണ്ണായ തിരഞ്ഞെടുപ്പിനാണ് പഞ്ചാബിൽ കളമൊരുങ്ങുന്നത്.

അടുത്ത വർഷം പഞ്ചാബിൽ ശിരോമണി അകാലിദൾ സഖ്യം അധികാരത്തിലെത്തിയാൽ എല്ലാ കുടുംബങ്ങൾക്കും പ്രതിമാസം 400 യൂണിറ്റ് വരെ സൗജന്യ വൈദ്യുതി ലഭ്യമാക്കും. പഞ്ചാബിലെ യുവാക്കൾക്ക് സ്വകാര്യ മേഖലയിൽ 75 ശതമാനം ക്വാട്ടയും ശിരോമണി അകാലിദൾ വാഗ്ദാനം ചെയ്തിട്ടുണ്ട്.

തൊഴിലവസരങ്ങളിൽ സ്ത്രീ സംവരണം, പ്രൊഫഷണൽ കോളേജുകളിലെ സർക്കാർ സ്കൂളുകളിലെ വിദ്യാർത്ഥികൾക്ക് സംവരണം, വ്യവസായത്തിന് കുറഞ്ഞ നിറഞ്ഞ നിരക്കിൽ വൈദ്യുതി, പഴങ്ങൾക്കും പച്ചക്കറികൾക്കും മിനിമം താങ്ങുവില എന്നിവയും വാഗ്ദാനം ചെയ്തിട്ടുണ്ട്. ബിഎസ്പിയുമായി സഖ്യമുള്ള ശിരോമണി അകാലിദൾ ബ്ലൂ കാർഡ് ഉടമകളുടെ കുടുംബങ്ങൾക്ക് (ബിപിഎൽ ഗുണഭോക്താക്കൾ) പ്രതിമാസം 2,000 രൂപ ധനസഹായവും 10 രൂപ കുറച്ച് ഡീസലും നൽകുമെന്നാണ് വാഗ്ദാനം ചെയ്തിട്ടുള്ളത്. കർഷകർക്കാണ് ഇതിന്റെ ആനുകൂല്യം ലഭിക്കുക.

2022 ൽ പഞ്ചാബിൽ ശിരോമണി അകാലിദൾ അധികാരത്തിലെത്തിയാൽ സഖ്യത്തിലൂടെ 13 പോയിന്റ് സംരംഭങ്ങളുടെ ചാർട്ടർ നടപ്പാക്കുമെന്ന് എസ്എഡി പ്രസിഡന്റ് സുഖ്ബീർ സിംഗ് ബാദൽ പറഞ്ഞു. പഞ്ചാബി യുവാക്കൾക്കായി സ്വകാര്യ മേഖലയിൽ 75 ശതമാനം ജോലികൾ സംവരണം ചെയ്യുമെന്നും അദ്ദേഹം പറഞ്ഞു. വൈദ്യുതി ബില്ലുകൾ അടയ്ക്കാത്തതിനാൽ വിച്ഛേദിക്കപ്പെട്ട ബിപിഎൽ കുടുംബങ്ങളുടെ എല്ലാ കണക്ഷനുകളും പുനഃസ്ഥാപിക്കുമെന്ന് ബാദൽ ഉറപ്പുനൽകിയിട്ടുണ്ട്.

വ്യവസായികാവശ്യത്തിനുള്ള വൈദ്യുതി യൂണിറ്റിന് 5 രൂപ നിരക്കിൽ വൈദ്യുതി നൽകുമെന്നും വിദ്യാർത്ഥികൾക്ക് 10 ലക്ഷം രൂപ പലിശരഹിത വായ്പ നൽകുമെന്നും ബാദൽ നേതാവ് പറഞ്ഞു. കാർഷികാവശ്യത്തിനും ട്രാക്ടറുകൾക്കും ഉപയോഗക്കുന്ന ഡീസലിന് 10 ഡിസ്കൌണ്ടും ലഭിക്കും. കൂടാതെ സംസ്ഥാനത്തെ പട്ടിക ജാതി സ്കോളർഷിപ്പ് പുനരുജ്ജീവിപ്പിക്കും. പട്ടികജാതിയിൽപ്പെട്ട വിദ്യാർത്ഥികൾക്ക് കോളേജ് വിദ്യാഭ്യാസം ലഭിക്കുന്നുണ്ടെന്ന് ഉറപ്പാക്കുകയും ചെയ്യും. ശിരോമണി അകാലിദൾ- ബിഎസ്പി സഖ്യം അധികാരത്തിൽ വന്നാൽ യുവാക്കളെ രാജ്യത്തിനകത്തും പുറത്തും ഉന്നതപഠനത്തിന് അവരെ സഹായിക്കുമെന്നും 10 ലക്ഷം രൂപ വരെ പലിശരഹിത വായ്പയുള്ള സ്റ്റുഡന്റ് എജ്യുക്കേഷൻ കാർഡ് നൽകുമെന്നും അദ്ദേഹം വാഗ്ദാനം ചെയ്തിട്ടുണ്ട്.

എല്ലാ പൊതു, സ്വകാര്യ ആശുപത്രികളിലെ ചികിത്സ, മരുന്നുകൾ, രോഗനിർണയത്തിനുള്ള പരിശോധനകൾ, ശസ്ത്രക്രിയകൾ, മെഡിക്കൽ ഉപകരണങ്ങൾ എന്നിവ ഉൾപ്പെടുന്ന ആരോഗ്യ ഇൻഷുറൻസ് പരിരക്ഷയും ഉറപ്പുനൽകുന്നുണ്ട്. പ്രതിവർഷം 10 ലക്ഷം രൂപയുടെ ഇൻഷുറൻസാണ് അദ്ദേഹം വാഗ്ദാനം ചെയ്തിട്ടുള്ളത്.

കാർഷിക മേഖലയിൽ നടപ്പാക്കുന്ന സംരംഭങ്ങളെക്കുറിച്ച് സംസാരിച്ച ബാദൽ, കേന്ദ്രത്തിന്റെ മൂന്ന് കാർഷിക നിയമങ്ങൾ പഞ്ചാബിൽ നടപ്പാക്കുന്നില്ലെന്ന് ഉറപ്പുവരുത്താൻ സംസ്ഥാന നിയമസഭയിൽ നിയമം കൊണ്ടുവരുമെന്ന് പറഞ്ഞു. ഒരേസമയം പഴങ്ങൾക്കും പച്ചക്കറികൾക്കും സർക്കാർ ഏറ്റവും കുറഞ്ഞ താങ്ങുവില അവതരിപ്പിക്കുമെന്നും കർഷകർക്ക് വില കുറയുമ്പോൾ അതിനനുസരിച്ച് പരിഷ്കരിക്കുമെന്നും അദ്ദേഹം പറഞ്ഞു.കേന്ദ്രസർക്കാർ പാസാക്കിയ മൂന്ന് കാർഷിക നിയമങ്ങളെ കരിനിയമങ്ങളെന്ന് വിശേഷിപ്പിച്ച ബാദൽ സഖ്യം അധികാരത്തിലെത്തിയാൽ ഈ നിയമങ്ങളെ തള്ളിക്കളയുമെന്നും പ്രസ്താവിച്ചിട്ടുണ്ട്.

സംസ്ഥാനത്ത് എസ്എഡി- ബിഎസ്പി സഖ്യം അധികാരത്തിൽ വന്നാൽ ആരോഗ്യത്തിനും വിദ്യാഭ്യാസത്തിനും മുൻഗണന നൽകുമെന്നും സൂപ്പർ സ്പെഷ്യാലിറ്റി സൗകര്യങ്ങളുള്ള 500 കിടക്കകളുള്ള മെഡിക്കൽ കോളേജ് എല്ലാ ജില്ലയിലും സ്ഥാപിക്കുമെന്നും അദ്ദേഹം ഉറപ്പുനൽകിയിട്ടുണ്ട്. മെഡിക്കൽ കോളേജ് ഉൾപ്പെടെയുള്ള പ്രൊഫഷണൽ കോളേജുകളിൽ സർക്കാർ സ്കൂൾ വിദ്യാർത്ഥികൾക്ക് 33 ശതമാനം സംവരണം ഉറപ്പാക്കുമെന്ന് അദ്ദേഹം പറഞ്ഞു.

സർക്കാർ ജോലികളിൽ സ്ത്രീകൾക്ക് കുറഞ്ഞത് 50 ശതമാനം സംവരണം ഉറപ്പാക്കുമെന്ന് അദ്ദേഹം പറഞ്ഞു. സർക്കാർ മേഖലയിൽ ഒരു ലക്ഷം പുതിയ തൊഴിലവസരങ്ങളും സ്വകാര്യ മേഖലയിൽ 10 ലക്ഷം തൊഴിലവസരങ്ങളും സൃഷ്ടിക്കുമെന്ന് ശിരോമണി അകാലികൾ മേധാവി പറഞ്ഞു. സഫായി കരാറുകാർ ഉൾപ്പെടെ എല്ലാ കരാർ ജീവനക്കാരെയും ക്രമപ്പെടുത്തുമെന്ന് ബാദൽ പറഞ്ഞു.

സംസ്ഥാനത്തെ ട്രാൻസ്മിഷൻ ചാർജുകൾ ഒഴിവാക്കിക്കൊണ്ട് സൗരോർജ്ജത്തിലേക്ക് മാറാൻ വലിയ കമ്പനികളെ പ്രോത്സാഹിപ്പിക്കുമെന്ന് അദ്ദേഹം പറഞ്ഞു. സംസ്ഥാനത്ത് പുതിയ ടെക്സ്റ്റൈൽ, ഐടി ഹബ്ബുകൾ സൃഷ്ടിക്കുമെന്ന് അദ്ദേഹം വാഗ്ദാനം ചെയ്തു. തന്റെ പാർട്ടി നേരത്തെ കർഷകർക്ക് സൗജന്യ വൈദ്യുതി വാഗ്ദാനം ചെയ്യുകയും അത് നൽകുകയും ചെയ്തുവെന്ന് ബാദൽ പറഞ്ഞു. "സംസ്ഥാനത്തെ വൈദ്യുതി ഞങ്ങൾ വാഗ്ദാനം ചെയ്യുകയും അങ്ങനെ ചെയ്യുകയും ചെയ്തു. അതുപോലെ, ആളുകൾക്ക് ലോകോത്തര അടിസ്ഥാന സൗകര്യങ്ങൾ നൽകുമെന്ന് ഞങ്ങൾ വാഗ്ദാനം ചെയ്തതായും അദ്ദേഹം പറഞ്ഞു.

പ്രകാശ് സിംഗ് ബാദലിന്റെ ശിരോമണി അകാലിദളിന്റെ നേതൃത്വത്തിലുള്ള സർക്കാരുകൾ എല്ലായ്പ്പോഴും സമാധാനത്തിനും സാമുദായിക സൗഹാർദ്ദത്തിനും സാഹോദര്യത്തിനും എല്ലാ മതങ്ങളോടുള്ള ബഹുമാനത്തിനും വേണ്ടി നിലകൊണ്ടതായും അദ്ദേഹം പറഞ്ഞു.

കേന്ദ്രസർക്കാർ പാസാക്കിയ കാർഷിക നിയമങ്ങളുടെ പേരിലാണ് എൻഡിഎ സഖ്യകക്ഷിയായ ശിരോമണി അകാലിദൾ സഖ്യമുപേക്ഷിക്കുന്നത്. കാർഷിക നിയമങ്ങളോടുള്ള എതിർപ്പ് ശിരോമണി അകാലികൾ വ്യക്തമാക്കിയെങ്കിലും ഇതൊന്നും ബിജെപി കണക്കിലെടുത്തിരുന്നില്ല. ഇതിനൊപ്പം പഞ്ചാബിലെ കർഷകരിൽ നിന്നുള്ള എതിർപ്പും ശക്തമായിരുന്നു. ഇതോടെയാണ് കേന്ദ്രമന്ത്രി സ്ഥാനം അടക്കം രാജിവെച്ച് ശിരോമണി അകാലിദൾ സഖ്യം ഉപേക്ഷിക്കുന്നത്. ഇതിന് പിന്നാലെയാണ് പഞ്ചാബ് നിയമസഭാ തിരഞ്ഞെടുപ്പിന് മുന്നോടിയായി ബിഎസ്പിയുമായി സഖ്യമുണ്ടാക്കുന്നത്.

2017ലെ പഞ്ചാബ് നിയമസഭാ തിരഞ്ഞെടുപ്പിൽ ബിജെപിക്കൊപ്പം തിരഞ്ഞെടുപ്പിൽ മത്സരിച്ച ശിരോമണി അകാലിദൾ മായാവതി നയിക്കുന്ന ബിഎസ്പിക്കൊപ്പമാണ് ഇത്തവണ തിരഞ്ഞെടുപ്പിൽ മത്സരിക്കുന്നത്. 25 വർഷത്തിന് ശേഷമാണ് ഈ രണ്ട് പാർട്ടികളും തമ്മിലുള്ള ബാന്ധവത്തിന് വഴിയൊരുങ്ങുന്നതെന്നാണ് മറ്റൊരു വസ്തുത. നിലവിലെ സീറ്റ് ധാരണ അനുസരിച്ച് 117 സീറ്റുകളിൽ 97 സീറ്റുകളിലും ശിരോമണി അകാലിദളായിരിക്കും മത്സരിക്കുക. 20 സീറ്റുകളിലായിരിക്കും ബിഎസ്പി മത്സരിക്കുക. അതേ സമയം ബിഎസ്പിക്ക് ലഭിച്ചിട്ടുള്ള 20ൽ എട്ടെണ്ണവും സംവരണ സീറ്റുകളാണ്. പഞ്ചാബിൽ അധികാരത്തിലിരിക്കുന്ന കോൺഗ്രസിനെ താഴെയിറക്കി അധികാരം പിടിക്കാമെന്ന കണക്കുകൂട്ടലിലാണ് ഇപ്പോൾ ബിഎസ്പി- ശിരോമണി അകാലിദൾ സഖ്യം.

English summary

Punjab Assembly election 2022: SAD-BSP alliance promises free power up to 400 units, job and education for youth