ബെംഗളൂരുവിൽ ബുധനാഴ്ച മുതൽ മഴ; ഇടിമിന്നലിനും ശക്തമായ കാറ്റിനും സാധ്യത

കർണാടകയിൽ 30 വരെ ശക്തമായ മഴയ്ക്ക് സാധ്യത. ബെംഗളൂരു ഉൾപ്പെടെ 15 ജില്ലകളിൽ കാലാവസ്ഥ വകുപ്പ് യെല്ലോ അലർട്ട് പ്രഖ്യാപിച്ചിട്ടുണ്ട്. ഇടിമിന്നലോട് കൂടിയ മഴയ്ക്കും ശക്തമായ കാറ്റിനുമുള്ള സാധ്യതയാണ് പ്രവചിക്കുന്നത്. വടക്കൻ ഉൾനാടൻ കർണാടക മുതൽ കോമറിൻ പ്രദേശം വരെ വ്യാപിക്കുന്ന ന്യൂനമർദ്ദപാത്തിയും ഉൾനാടൻ മഹാരാഷ്ട്രയിലെ പ്രതിചക്രവാതച്ചുഴിയുമാണ് മഴയ്ക്ക് കാരണം.

ദക്ഷിണ കന്നഡ, ഉടുപ്പി, ഉത്തര കന്നഡ തീരദേശ ജില്ലകളിൽ ഒറ്റപ്പെട്ട മഴയാണ് പ്രതീക്ഷിക്കുന്നത്. ബെളഗാവി, ധാർവാഡ്, ഹാവേരി, ഗദഗ്, കലബുറഗി, യാദ്ഗിർ, റായ്ച്ചൂർ, കൊപ്പൽ എന്നീ വടക്കൻ ഉൾനാടൻ ജില്ലകളും നിരീക്ഷണത്തിലാണ്.മലനാട് മേഖലയിൽ ഷിമോഗ, ചിക്കമഗളൂരു, ഹാസൻ, കൊടക് എന്നിവിടങ്ങളിലും മഴയ്ക്ക് സാധ്യതയുണ്ട്. ജില്ലകളിൽ ഒന്നോ രണ്ടോ സ്ഥലങ്ങളിൽ മാത്രമായി മഴ ഒതുങ്ങുമെങ്കിലും, ഇടിമിന്നലും ശക്തമായ കാറ്റുമുണ്ടാകും.

ഏപ്രിൽ 28 മുതൽ മഴയുടെ വ്യാപനത്തിലും തീവ്രതയിലും പ്രകടമായ മാറ്റമുണ്ടാകും. തീരദേശ കർണാടകയിൽ നേരിയ മഴ തുടരും. എന്നാൽ, വടക്കൻ ഉൾനാടൻ ജില്ലകളിൽ ശക്തമായ കാറ്റിനൊപ്പം നേരിയതോ മിതമായതോ ആയ മഴ ലഭിച്ചേക്കാം.തെക്കൻ ഉൾനാടൻ കർണാടകയിലായിരിക്കും പ്രധാന മാറ്റം. ഇവിടെ മഴ ആദ്യം ലിസ്റ്റ് ചെയ്ത ജില്ലകൾക്കപ്പുറത്തേക്ക് വ്യാപിക്കും. ഒറ്റപ്പെട്ട സ്ഥലങ്ങൾക്ക് പകരം കൂടുതൽ പ്രദേശങ്ങളിൽ മഴ ലഭിക്കും. 29, 30 തീയതികളിൽ കാലാവസ്ഥാ സംവിധാനം ഏറ്റവും സജീവമാകും. ഈ ദിവസങ്ങളിൽ കർണാടകയിൽ ഉടനീളം ഇടിമിന്നൽ കൂടുതൽ വ്യാപകവും ശക്തവുമാകാൻ സാധ്യതയുണ്ട്. മഴ തീവ്രമാകുമെന്നും പ്രതീക്ഷിക്കുന്നു.

വടക്കൻ ഉൾനാടൻ കർണാടകയിൽ ബിദർ ഉൾപ്പെടെ കൂടുതൽ ജില്ലകളിലേക്ക് മഴ വ്യാപിക്കും. തെക്കൻ ഉൾനാടൻ കർണാടകയിലെ മിക്ക ജില്ലകളിലെയും പല സ്ഥലങ്ങളിലും മഴയ്ക്ക് സാധ്യതയുണ്ട്. തീവ്ര ഘട്ടത്തിൽ ഈ മേഖലയാകും കൂടുതൽ മഴ ലഭിക്കുന്ന പ്രദേശം. ഇക്കാലയളവിൽ ശക്തമായ കാറ്റിനും സാധ്യതയുണ്ട്, മണിക്കൂറിൽ 40-50 കിലോമീറ്റർ വരെയാണ് കാറ്റിന് സാധ്യത.

അതേസമയം സംസ്ഥാനത്ത് താപനിലയിൽ വലിയ കുറവുണ്ടാകില്ല. കലബുറഗി, ബിദർ, റായ്ച്ചൂർ ജില്ലകളിൽ ഏകദേശം 41°C ആണ് നിലവിൽ രേഖപ്പെടുത്തിയത്. സമാനമായ ചൂടേറിയ കാലാവസ്ഥ തുടരും.

ഏപ്രിൽ 28 ഉച്ചയ്ക്ക് ശേഷം ബെംഗളൂരുവിൽ മഴ പെയ്തേക്കും. ഏപ്രിൽ 29 മുതൽ നേരിയതോ മിതമായതോ ആയ മഴയ്ക്കോ ഇടിമിന്നലോടുകൂടിയ മഴയ്ക്കോ സാധ്യതയുണ്ട്, കൂടെ മണിക്കൂറിൽ 30-40 കിലോമീറ്റർ വേഗതയിൽ കാറ്റും വീശിയേക്കാം. മെയ് 1 വരെ മഴ നീണ്ടേക്കാം. ബെംഗളൂരുവിലെ ഉയർന്ന താപനില 35°C-നും 37°C-നും ഇടയിൽ തുടരാൻ സാധ്യതയുണ്ട്. നഗര, ഗ്രാമപ്രദേശങ്ങളിൽ കുറഞ്ഞ താപനില 22°C-നും 24°C-നും ഇടയിലായിരിക്കുമെന്നും പ്രതീക്ഷിക്കപ്പെടുന്നുണ്ട്.

English summary

The India Meteorological Department warns of rain, thunderstorms and strong winds across 15 districts in Karnataka, including Bengaluru, from late April with intensification expected around April 29–30. Coastal and interior areas may experience varying rainfall, while temperatures remain high and humid conditions persist.