ഇത് അര്ച്ചന; കൈക്കുഞ്ഞുമായി രാത്രി പട്രോളിങിന് പോകുന്ന വനിതാ ഡി എസ് പി!
റായ്പൂര്: കൈക്കുഞ്ഞുമായി രാത്രി പട്രോളിങിന് പോകുന്ന വനിതാ പോലീസ് ഓഫീസറുടെ ചിത്രം സോഷ്യല് മീഡിയയില് കൗതുകമാകുന്നു. ഛത്തീസ്ഗഡിലെ റായ്പൂര് ഡെപ്യൂട്ടി പോലീസ് സൂപ്രണ്ട് അര്ച്ചന ഝായുടെ ചിത്രമാണ് ട്വിറ്ററിലൂടെ പരക്കുന്നത്. കൈയ്യില് കുഞ്ഞും വാക്കി ടോക്കിയുമായി പോലീസ് വാഹനത്തിന്റെ പിന്സീറ്റില് ഇരിക്കുകയാണ് അര്ച്ച. പോലീസ് യൂണിഫോമിലല്ല.
കെ പി ഗണേഷ് എന്നയാളാണ് മാര്ച്ച് 11ന് ചിത്രം മൈക്രോ ബ്ലോഗിങ് സൈറ്റായ ട്വിറ്ററില് പോസ്റ്റ് ചെയ്തത്. റായ്പൂര് ഡി എസ് പി അര്ച്ചന ഝാ കൈക്കുഞ്ഞുമായി രാത്രി പട്രോള് ഡ്യൂട്ടിയില്. ജോലിയാണ് പരമമായ ധര്മം - എന്ന് പറഞ്ഞാണ് ഇയാള് ഈ ചിത്രം ഷെയര് ചെയ്തത്. ആയിരക്കണക്കിന് പേര് ഈ ചിത്രം റീഷെയര് ചെയ്തു.
കുഞ്ഞിനെ നോക്കാന് മറ്റാരും ഇല്ലാത്തത് കൊണ്ടാണ് അഞ്ജന ഝാ ഈ സാഹസം കാട്ടുന്നത് എന്നാണ് റിപ്പോര്ട്ട്. അഞ്ജനയുടെ ഭര്ത്താവ് ജോലി ആവശ്യങ്ങള്ക്കായി റായ്പൂരിന് 120 കിലോമീറ്റര് ദൂരെയുള്ള ബിലാസ്പൂരിലാണ്. വീട്ടില് മറ്റാരും ഇല്ല. ആഴ്ചയില് രണ്ട് ദിവസമാണ് അഞ്ജന ഝായ്ക്ക് നൈറ്റ് ഡ്യൂട്ടി. അഞ്ജന മകളുമായിട്ടാണ് ഡ്യൂട്ടിക്ക് എത്തുക - റിപ്പോര്ട്ട് പറയുന്നു.
Archana Jha, DSP Crime (Raipur) on late night round with her new born daughter. "Seva parmodharma". Feminism anyone? pic.twitter.com/FpGX9mDNJP
— K P Ganesh (@KPGanesh) March 11, 2016
ഗര്ഭിണിയായിരുന്ന സമയത്തും അഞ്ജന ഇതുപോലെ രാത്രി പട്രോള് ഡ്യൂട്ടിക്ക് എത്തിയിരുന്നത്രെ. നാലരമാസമാണ് ഡി എസ് പി റാങ്കിലുള്ള ഓഫീസര്മാര്ക്ക് പ്രസവാവധി. ആഴ്ചയില് രണ്ട് ദിവസം രാത്രി മുഴുവന് മകളെയും കൊണ്ട് വേണം അഞ്ജനയ്ക്ക് ഡ്യൂട്ടി നിര്വഹിക്കാന്. ഇത്രയും കാലം ക്രമസമാധാന പ്രശ്നങ്ങളൊന്നും ഉണ്ടായിട്ടില്ല എന്ന് റിപ്പോര്ട്ട് പറയുന്നു.