ഗെലോട്ടിന് പണികിട്ടുമോ? ചോദ്യപ്പേപ്പര്‍ അഴിമതി രാജസ്ഥാനില്‍ പ്രചാരണ വിഷയം, നേട്ടം ബിജെപിക്ക്

Updated: Friday, November 10, 2023, 0:50 [IST]

രാജസ്ഥാനില്‍ കോണ്‍ഗ്രസ് വലിയൊരു പ്രതിസന്ധിക്ക് മുന്നിലാണ്. തെരഞ്ഞെടുപ്പ് അടുത്ത് വരുന്ന ഘട്ടത്തില്‍ ചോദ്യ പേപ്പര്‍ അഴിമതി അതിശക്തമായ പ്രചാരണ വിഷയമായി കഴിഞ്ഞു. ബിജെപി മുഖ്യമന്ത്രി അശോക് ഗെലോട്ടിനെ സമ്മര്‍ദത്തിലാക്കുന്നതും ഇക്കാര്യത്തിലാണ്. കാരണം 22 ലക്ഷം പ്രഥമ വോട്ടര്‍മാര്‍ ഇത്തവണയുണ്ട്. ഈ യുവ വോട്ടര്‍മാരാണ് ചോദ്യ പേപ്പര്‍ അഴിമതി ബാധിക്കപ്പെട്ടവര്‍.

തീര്‍ച്ചയായും ഇവര്‍ കോണ്‍ഗ്രസിനെതിരായി വോട്ട് ചെയ്താല്‍ അതോടെ പാര്‍ട്ടി തകര്‍ന്ന് തരിപ്പണമാകും. കഴിഞ്ഞ അഞ്ച് വര്‍ഷം 12 തവണയാണ് ചോദ്യ പേപ്പര്‍ ചോര്‍ന്നത്. ഈ വിഷയം യുവവോട്ടര്‍മാരിലേക്ക് എത്തിക്കാനുള്ള തീവ്ര ശ്രമത്തിലാണ് ബിജെപി. കഴിഞ്ഞ പന്ത്രണ്ട് വര്‍ഷത്തോളമായി സംസ്ഥാനത്ത് ചോദ്യ പേപ്പര്‍ ചോര്‍ച്ച ശക്തമാണ്. ഇത് കോണ്‍ഗ്രസ്-ബിജെപി സര്‍ക്കാരുകളില്‍ സ്ഥിരം സംഭവിക്കാറുമുണ്ട്.

എന്നാല്‍ ഇരുപാര്‍ട്ടികളും ശക്തമായ നടപടികള്‍ എടുത്തിട്ടുണ്ടെന്നാണ് എപ്പോഴും പറയാറുള്ളത്. കേസിലെ പ്രതിയെന്ന സംശയിക്കുന്നയാള്‍ കോച്ചിംഗ് ക്ലാസുകള്‍ എടുത്തിരുന്ന അഞ്ച് നില കെട്ടിടം നേരത്തെ കോണ്‍ഗ്രസ് ഇടിച്ച് നിരത്തിയിരുന്നു. ഡിസംബറില്‍ അധ്യാപക റിക്രൂട്ട്‌മെന്റ് പരീക്ഷയുടെ ചോദ്യപ്പേപ്പര്‍ ചോര്‍ന്നതിന് പിന്നാലെയായിരുന്നു ഈ നടപടി. അഴിമതിക്കെതിരെ എപ്പോഴും നിലകൊള്ളുന്നുവെന്നാണ് കോണ്‍ഗ്രസ് പറയുന്നത്. എന്നാല്‍ ഇത് പ്രഹസനമാണെന്ന് വിദ്യാര്‍ത്ഥികള്‍ പറയുന്നു.

ഇഡി നേരത്തെ കോണ്‍ഗ്രസ് നേതാക്കളുടെ വീട്ടില്‍ പരിശോധനകള്‍ നടത്തിയിരുന്നു. രാജസ്ഥാന്‍ കോണ്‍ഗ്രസ് അധ്യക്ഷന്‍ ഗോവിന്ദ് സിംഗ് ദൊത്താസരയുടെ വീട്ടില്‍ അടക്കമായിരുന്നു റെയ്ഡ്. ഇഡിയുടെ നടപടി രാഷ്ട്രീയപ്രേരിതമാണെന്ന് കോണ്‍ഗ്രസ് ആരോപിക്കുന്നു. സച്ചിന്‍ പൈലറ്റ് അടക്കം ഇഡി പരിശോധനകള്‍ വന്ന സമയത്തെ വിമര്‍ശിച്ചിരുന്നു.

തെരഞ്ഞെടുപ്പില്‍ വിജയിക്കാനുള്ള ഏറ്റവും വലിയ ആയുധമായിട്ടാണ് ചോദ്യ പേപ്പര്‍ ചോര്‍ച്ചയെ ബിജെപി കാണുന്നത്. ബിജെപി അധികാരത്തില്‍ വന്നാല്‍ ഉത്തരവാദികള്‍ക്കെതിരെ നടപടിയെടുക്കുമെന്നും ബിജെപി നേതാവ് രാജ്യവര്‍ധന്‍ റാത്തോഡ് പറഞ്ഞു. അഞ്ച് ലക്ഷം മുതല്‍ 15 ലക്ഷം വരെ രൂപയ്ക്കാണ് ചോദ്യപ്പേപ്പര്‍ വിറ്റിരുന്നതെന്ന് അന്വേഷണ ഏജന്‍സികള്‍ കണ്ടെത്തിയിട്ടുണ്ട്.

നിലവില്‍ ഗെലോട്ട് ഈ പ്രതിസന്ധിയെ മറികടക്കാനാണ് ക്ഷേമ പദ്ധതികള്‍ക്ക് പ്രാധാന്യം നല്‍കുന്നത്. കുടുംബ വോട്ടുകള്‍ ഒന്നിച്ച് വരുന്നതോടെ അതിനെ മറികടക്കാനാവുമെന്നാണ് കോണ്‍ഗ്രസ് പ്രതീക്ഷ. ഗെലോട്ടിന്റെ റാലികള്‍ക്കെല്ലാം വന്‍ തോതില്‍ ആളുകള്‍ എത്തുന്നുണ്ട്. അതിലുപരി ഗെലോട്ടിനോട് യാതൊരു വിരോധവും ഇല്ലെന്നാണ് ജനങ്ങള്‍ക്കിടയില്‍ നിന്നുള്ള റിപ്പോര്‍ട്ട്.

ഗ്രാമീണ മേഖല ഇത്തവണ കോണ്‍ഗ്രസ് തൂത്തുവാരിയാലും അത്ഭുതപ്പെടാനില്ല. എന്നാല്‍ നഗര മേഖലകള്‍ ബിജെപിയിലേക്ക് പോകാതെ നോക്കുകയാണ് ഇനി ഗെലോട്ടിന് ചെയ്യാനുള്ളത്. പെന്‍ഷനും, ക്ഷേമ പദ്ധതികള്‍ക്കുമെല്ലാം വലിയ ആരാധകരാണ് രാജസ്ഥാനില്‍ ഉള്ളത്. ചെറിയ ഭൂരിപക്ഷത്തിന് ജയിച്ച് കയറാമെന്ന പ്രതീക്ഷയിലാണ് കോണ്‍ഗ്രസ്.