സ്കൂളിലെ മികച്ച വിദ്യാര്ഥിനി ലാപ്ടോപ് തര്ക്കത്തില് ഭര്ത്താവിനെ കൊലപ്പെടുത്തി
ജയ്പുര്: ലാപ്ടോപ്പിനെ ചൊല്ലിയുണ്ടായ തര്ക്കത്തിനൊടുവില് പെണ്കുട്ടി ഭര്ത്താവിനെ കൊലപ്പെടുത്തി. ജയ്പുരിനടുത്ത് കനോട്ടയിലാമ് സംഭവം. മദ്യത്തിനടിമയായ ഭര്ത്താവ് ഭാര്യയുടെ ലാപ്ടോപ്പ് വില്ക്കാനായി ശ്രമിച്ചപ്പോഴാണ് വാക്കുതര്ക്കുമുണ്ടായതെന്നും ഇത് കൊലപാതകത്തില് കലാശിക്കുകയായിരുന്നെന്നും പോലീസ് പറഞ്ഞു.
ഹര്ഫൂല് എന്ന ഇരുപതുകാരനാണ് കൊല്ലപ്പെട്ടത്. ഇയാളുടെ പതിനാറുവയസുമാത്രം പ്രായമുള്ള ഭാര്യയെ പോലീസ് പിന്നീട് അറസ്റ്റ് ചെയ്തു. എട്ടാം ക്ലാസില് സ്കൂളിലെ മികച്ച വിദ്യാര്ഥിനിയായിരുന്നു പെണ്കുട്ടി. ഇതിനു ലഭിച്ച സമ്മാനമായിരുന്നു ലാപ്ടോപ്. പതിനാറാം വയസില് വീട്ടുകാര് വിവാഹം ചെയ്യിച്ചതോടെ പഠനം മുടങ്ങുകയായിരുന്നു.
ഓട്ടോമൊബൈല് ഷോറൂമില് ജോലിക്കാരനാണ് ഹര്ഫൂര്. മദ്യപാനിയായ ഇയാള് ഭാര്യയുമായി കലഹിക്കുന്നത് പതിവായിരുന്നു. മദ്യപിക്കാനുള്ള പണത്തിനുവേണ്ടി ലാപ്ടോപ് വില്ക്കാന് ശ്രമിച്ചതാണ് പ്രശ്നങ്ങള്ക്കിടയാക്കിയത്. ഇപ്പോള് പഠിക്കുന്നില്ലെന്നും അതിനാല് ലാപ്ടോപ്പിന്റെ ആവശ്യമില്ലെന്നുമായിരുന്നു ഭര്ത്താവിന്റെ വാദം.
എന്നാല്, സ്കൂളിലെ പഠനമികവിന് ലഭിച്ച സമ്മാനം ഭര്ത്താവിന്റെ മദ്യപാനശീലത്തിന് വിട്ടുകൊടുക്കാന് പെണ്കുട്ടി തയ്യാറായില്ല. ഇരുവരും തര്ക്കവും കൈയ്യാങ്കളിയും നടത്തവെ വീട്ടിനകത്തുണ്ടായിരുന്ന കല്ലെടുത്ത് പെണ്കുട്ടി ഭര്ത്താവിന്റെ തലയ്ക്കടിച്ചു. ഇതോടെ ബോധം നഷ്ടമായ ഹര്ഫൂലിനെ ബന്ധുക്കളുടെ സഹായത്തോടെ ആശുപത്രിയിലെത്തിച്ചെങ്കിലും ജീവന്രക്ഷിക്കാനായില്ല. പ്രായപൂര്ത്തിയാകാത്തതിനാല് പെണ്കുട്ടിക്കെതിരെ ഏതുവകുപ്പിലാണ് കേസ് ചുമത്തേണ്ടതിനെക്കുറിച്ച് ആലോചിക്കുകയാണെന്ന് പോലീസ് ഉദ്യോഗസ്ഥന് അറിയിച്ചു.